Kulvi Outer Seraji Bible
शधाणूं 14
इकुनिम नगरी पल़सी अर बरनबास
इकुनिम नगरी हुअ इहअ कि तिंयां डेऊऐ यहूदी मणछे सभागृहा लै संघा-संघा। तिन्नैं किई एही गल्ला कि यहूदी अर यूनानी मांझ़ै किअ कई लोगै विश्वास। पर ज़हा परमेशरो बैण नांईं मनणअ त, तिन्नैं यहूदी दैनी होरी ज़ातीए लोगा लै तिन्नां विश्वासी भाईए खलाफ च़ुघ अर तिन्नैं किऐ विश्वासीए खलाफ उपद्रभ।
शधाणूं रहै कई धैल़ै तैणीं तिधी अर प्रभूए भरोस्सै बडी हिम्मता संघै लागै परमेशरे बैणा खोज़दै। प्रभू बी दैआ त तिन्नें हाथै बडै-बडै नछ़ैण रहैऊई करै अर नुआहरै काम करी परमेशरे जशे बैणो सबूत। पर नगरीए लोगा मांझ़ै पल़ी फूट अर इहअ करै कई हुऐ यहूदी बाखा लै अर कई हुऐ शधाणूं बाखा लै।
यहूदी, तिन्नें सैणैं, अफसर अर होरी ज़ातीए कई लोगै किअ इहअ एक्कअ कि ईंयां पाणै हाम्हां पात्थरो ढो दैई मारी। पल़सी अर बरनबासा का गअ ऐहा गल्लो थोघ लागी अर तिंयां ठुर्है लुकानिआ मुल्खे लुस्रा अर दिरबे नगरी लै अर ओरी-पोरीए देशा लै। तिधी रहै तिंयां खुशीए समादा खोज़दै लागी।
लुस्रा अर दिरबे दी पल़सी
लुस्रा नगरी त एक मणछ बेठअ द, सह थिअ ज़ल्मां ओर्ही लाट्टअ अर तेऊए निं हांढदअ त अर आपणीं ज़िन्दगी निं सह किधी हांडअ-फिरअ त। सह थिअ पल़सी गल्ला करदै शूणअ लागअ द अर पल़सी भाल़अ तेऊ बाखा लै कोहरअ कि एऊ आसा पाक्कअ भरोस्सअ कि प्रभू ईशू सका मुंह ऐहा बमारी का बच़ाऊई। पल़सी बोलअ ज़ोरै, “आपणीं ज़ांघा टेक्क खल़अ,” तेखअ लागअ सह मणछ उझै छ़ाहल़ दैई हांढदअ-फिरदअ।
लोगै बोलअ पल़सीए एऊ च़मत्कारा भाल़ी लुकानिआ बोली दी ज़ोरै-ज़ोरै, “देअ होथै सरगा का मणछे रुपै हाम्हां जैंदरा लै।” तिन्नैं बोलअ बरनबास लै ज्यूस अर पल़सी लै हिरमेस देअ किल्हैकि सह थिअ गल्ला करना लै सैणअ। ज्यूस देअए देहुरे पज़ैरै ज़ुंण तैहा नगरी सम्हनै थिअ, तेऊ आणअ एक गाभू अर फूले हार नगरीए प्रऊल़ी सेटा तिन्नां लै बल़ीदान करना लै।
पर ज़ांऊं बरनबास अर पल़सी शधाणूं का इहअ थोघ लागअ, तिन्नैं धेल़ै आपणैं झिकल़ै संघा ठुर्है लोगा जैंदरा लै। संघा बोलअ तिन्नैं ज़ोरै-ज़ोरै इहअ,
“भाईओ, तम्हैं अह किज़ै लाअ करी? हाम्हैं बी आसा तम्हां ई ज़िहै दुखा-सुखा भुगतणै आल़ै मणछ, अर तम्हां का खोज़ा हाम्हैं अह खुशीओ समाद कि तम्हैं फिरा इना बृथा च़िज़ा का ज़ुदै हई तेऊ ज़िऊंदै परमेशरा बाखा लै, ज़ुंणी सरग, पृथूई, समुंदर अर ज़ुंण बी तेथ दी आसा, सोभै गल्ला बणाईं।1
“आझ़ा कै पैहलै रहै तम्हैं होर सोभै ज़ाती आपणैं-आपणैं साबै कई देअ पिछ़ू हांढदै लागी। किल्हैकि तम्हां का निं तेऊ परमेशरे बारै थोघै त। तैबी निं सह आप्पू शाजत बाझ़ी रहअ, पर भलाई रहअ करदअ लागी अर सरग रहअ हंदअ लागी अर फल़ा-फल़ूटे ऋत दैई रहअ थारै मन्नां रोटी-पाणीं करै बडी खुशी दी भरदअ लागी।”2
इहअ बोली बी तिन्नैं तिंयां बडै मसा जाई करै रोक्कै बल़ीदान करनै का।
पर कई यहूदी आऐ अन्ताकिया नगरी अर इकुनिम नगरी का तिन्नैं किऐ तिंयां लोग आप्पू बाखा लै, तेखअ पल़सी लै दैनअ पात्थरो ढो। तिन्नैं समझ़अ कि पल़सी गअ मरी अर सह निंयं तिन्नैं घिशी करै नगरी बागै। पर ज़ांऊं होर च़ेल्लै आऐ अर तेऊ फेर खल़्हुऐ, सह उझ़ुअ खल़अ अर तेखअ डेऊअ नगरी भितरा लै। संघा डेऊअ दुजै धैल़ै बरनबासा संघै दिरबे नगरी लै।
सिरीया मुल्खे अन्ताकिया नगरी लै बापस फिरनअ
तेखअ फिरै पल़सी अर बरनबास दिरबे लोगा लै खुशीओ समाद खोज़ी करै, कई च़ेल्लै बणाईं करै लुस्रा अर इकुनिम बाती अन्ताकिया मुल्खा लै बापस। सारै दी रहै तिंयां च़ेल्ले मना पाक्कै करी शिक्षा दैंदै कि विश्वासा दी रहा टेक्की। तिंयां बोला तै इहअ बी कि हाम्हां लागणअ बडै दुख ज़िरी परमेशरे राज़ा दी डेऊणअ। तेखअ बणाऐं तिन्नैं हरेक विश्वासी टोली दी तिन्नां लै सैणैं, अर ब्रत डाही प्राथणां करी सभाल़ै तिंयां प्रभूए हाथै ज़हा दी तिन्नैं विश्वास किअ त।
तेखअ पुजै तिंयां पिसदिया मुल्खै बाती हांढदी पंफूलिआ मुल्खै। तिधा का पुजै पिरगा नगरी बैण खोज़ी करै तिंयां इटल़ी देशै।
तेखअ आऐ तिंयां तिधा का ज़हाज़ा दी बेशी अर अन्ताकिया नगरी लै ज़िधा का तिंयां तेऊ कामां लै निखल़ै तै ज़ुंण परमेशरे जशा दी तिन्नां का सभाल़अ त अर ज़ुंण तिन्नैं पूरअ किअ त। तिधी पुजी किई तिन्नैं विश्वासीए टोली कठा अर तिन्नां सोभी का खोज़ी सोभ गल्ला कि परमेशरै किऐ तिन्नां संघै बडै-बडै काम अर होरी ज़ाती लै बी खोल्हअ परमेशरै दुआर ताकि तिंयां बी विश्वास करी सके। तेखअ रहै तिंयां च़ेल्लै संघै खास्सै धैल़ै तिधी।
Source notes (2)
- Cross-reference लुआ. 20:11; भज. 146:6
- Cross-reference भज. 147:8; जेर. 5:24
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.