शधाणूं 18

करिन्थ नगरी दी

1तेखअ आअ पल़सी एथेंस नगरी छ़ाडी करिन्थ नगरी लै, 2अर तिधी भेटअ एकी अकबिला नाओंए यहूदी का, तेऊए ज़ल्म त पुंतुस नाओंए मुल्खै हुअ द। सह त तेऊए लाल़ी प्रिस्किला संघै नऊंअ-नऊंअ इटल़ी देशा का करिन्थ नगरी लै आअ द। किल्हैकि क्लौदिउस माहा राज़ै दैनअ त सोभी यहूदी लै रोम नगरी का डेऊणेओ हुकम। पल़सी डेऊअ तिन्‍नां सेटा लै। 3अकबिला अर प्रिस्किला करा तै तरपाला बणाणैं अर बेच़णेंओ बपार अर पल़सीओ बी त अह ई बपार। एते तैणीं रहअ पल़सी तिन्‍नां संघा अर तिन्‍नैं किअ कठा काम।

4हर बशैघे धैल़ै डेओआ त पल़सी यहूदी मणछे सभागृहा ज़िधी सह यहूदी अर यूनानी संघै गल्‍ला करी ईशूए बारै खोज़ा त।

5ज़ांऊं मकिदुनिया मुल्खा का सिलास अर तिमोथी करिन्थ नगरी आऐ, पल़सी रहअ आपणैं काम छ़ाडी पबित्र आत्में साबै यहूदी मणछा का खोज़दअ लागी कि ईशू ई आसा मसीहा। 6पर ज़ांऊं यहूदी पल़सीओ बरोध अर निंदा करदै लागै, तेऊ बोलअ आपणैं झिकल़ै ठुल़्हकी करै तिन्‍नां लै, “थारअ लोहू लोल़ी थारै कैल़ै पल़अ, हुंह आसा एता का नर्दोश अर शुचअ, ऐबै डेऊणअ मुंह होरी ज़ाती सेटा लै।”

7तिधा का आअ पल़सी तितस जस्तुस नाओंए एकी परमेशरे भगत मणछे घअरा लै तेऊओ घअर त ज़सरअ घअर सभागृहा नेल़। 8तेखअ क्रिस्पुस नाओंए सभागृहे कारदारै किअ आपणैं सारै टबरा संघी प्रभू दी विश्वास अर कई करिन्थ नगरी का आऐ दै लोगै बी किअ मसीहा दी विश्वास अर तिन्‍नैं बी बदल़अ मन्‍न संघा लई पापो प्राश्त करना लै डुबकी।

9प्रभू बोलअ राची दर्शण दैई पल़सी लै, “डरै निं आथी, खुशीए समादा खोज़दअ रह लागी, च़ुप्पी निं रही। 10किल्हैकि हुंह आसा ताह संघा अर कोहै निं ताल्है हान्‍नी करी सकदअ। किल्हैकि ऐहा नगरी आसा मेरै कई भगत।”1

11इहअ करै रहअ पल़सी तिन्‍नां मांझ़ै परमेशरे बैणा सखाऊंदअ देहुल़ साला तैणीं।

12ज़धू गलिओ त अखाया मुल्खो राज़पाल, तधू किअ यहूदी मणछै आप्पू मांझ़ै एक्‍कअ अर तिंयां आऐ पल़सी संघै च़िखदै अर पल़सी निंयं दालता लै अर तेऊ लै लाअ इहअ दोश, 13“अह सखाऊआ लोगा का इहअ कि परमेशरे च़ाकरी करनी एऊ साबै, ज़ुंण म्हारै यहूदी बधाना का बिलकुल उंबल़ी आसा।”

14ज़ांऊं पल़सी किज़ै बोली लाअ त, गलिओ लागअ तिन्‍नां यहूदी मणछा लै इहअ बोल्दअ, “हे यहूदी मणछो, ज़ै अह बूरअ या ज़ुल्म करनै आल़अ हंदअ, तै त ठीक किई हुंह शुणदअ थारी। 15पर तम्हैं आसा लागै दै बधाने बैण अर नाओंए बारै हठल़दै ज़ुंण थारै आपणैं यहूदी शास्त्रा दी आसा। तम्हैं करा एते बारै आप्पै एऊ संघै गल्‍ला, हुंह निं एतो नसाफ करी सकदअ!” 16तेखअ काढै तेऊ तिंयां दालता का बागै। 17तिन्‍नां मांझ़ै कई लोगै ढाकअ सभागृहो कारदार सोस्थिनेस अर नसाफ राज़गाद्दी सम्हनै च़िक्‍कअ बी। पर गलिओ निं इना गल्‍ले किछ़ै फिकर किई।

अन्ताकिया लै बापस फिरनअ

18पल़सी रहअ करिन्थ नगरी खास्सै धैल़ै अर होरी विश्वासी भाई का बिदा हई आअ किंखिया नगरी। तिधी छाम्बअ तेऊ आपणअ मूंड, किल्हैकि तेऊ ती तेते मानत मनी दी। तिधा का डेऊअ सह ज़हाज़ा दी बेशी सिरीया मुल्खा लै अर तेऊ संघै तै प्रिस्किला अर अकबिला बी।2

19पल़सी छ़ाडै प्रिस्किला अर अकबिला इफिसुस नगरी पुजी तिधी अर आप्पू लागअ सभागृहा डेऊई यहूदी मणछा का ईशूए बारै खोज़दअ। 20ज़ांऊं तिन्‍नैं पल़सी सेटा अरज़ करदै लागै थोल़ै धैल़ै दै हाम्हां सेटा रहणैं पर पल़सी किअ नांईं। 21पर तिन्‍नां लै इहअ बोली लागअ सह तिधा का हांढदअ, “ज़ै परमेशर च़ाहे तै एछणअ हुंह तम्हां सेटा लै फिरी।” 22तेखअ पुजअ पल़सी इफिसुस नगरी का ज़हाज़ खोल्ही करै अर कैसरिया मुल्खै, संघा डेऊअ एरुशलेम नगरी लै अर विश्वासीए टोली लै राज्ज़ी-खुशी दैई आअ अन्ताकिया नगरी लै।

खुशीए समादा खोज़णा लै पल़सीए चिऊथी हांढ

23तेखअ थोल़ै धैल़ै तिधी रही डेऊअ तिधा का अर एकी बाखा गलात अर फ्रूगिआ मुल्खै, संघा लागअ च़ेल्‍लै लै हैअ दैई आजू हांढदअ।

इफिसुस नगरी दी अपूलोस

24अपूलोस नाओं एक यहूदी आअ इफिसुस नगरी लै, ज़ुंण सकंदरीआ नगरी दी त पैईदा हुअ द, सह थिअ पबित्र शास्त्रो ज़ाणकार। 25तेऊ का थिअ थोघ कि प्रभू सेटा डेऊणे असली बात कुंण आसा अर सह खोज़ा त मन्‍न लाई करै प्रभू ईशूए बारै ठीक-ठीक, अर सखाऊआ बी त, पर तेऊ का थिअ सिधअ जोहन्‍ने पाणीं दी डुबकी दैणें बारै ज़ाणकारी। 26सह लागअ यहूदी सभागृहा नडरै हई बोल्दअ। पर तेऊए गल्‍ला शूणीं आणअ सह प्रिस्किला अर अकबिला आप्पू सेटा लै अर परमेशरे गल्‍ला समझ़ाऊई तेऊ का होर बी राम्बल़ै करै।

27ज़ांऊं अपूलोसै पारा बाखा होथी अखाया लै डेऊणेओ बच़ार किअ, होरी विश्वासी भाई लिखी हैअ दैई यूनान रहणैं आल़ै विश्वासी च़ेल्‍लै लै च़िठी कि एऊ संघै मिलै शोभलै करै। तेऊ किई तिधी पुजी तिन्‍नें खास्सी मज़त, ज़ुंणी जशा दी विश्वास किअ त। 28किल्हैकि अपूलोस दैआ त पबित्र शास्त्रा का यहूदी लै सबूत कि ईशू मसीहा ई आसा मसीहा, ज़ेभै सह शास्त्र पहल़ा त, लोगा का निं तेतो कोई ज़बाब हंदअ त।