Kulvi Outer Seraji Bible
शधाणूं 19
इफिसुस नगरी जोहन्ने च़ेल्लै
ज़ेभै अपूलोस करिन्थ नगरी त, पल़सी पुजअ उझै फ्रूगिआ गलात मुल्खै सारै सराज़ै हांढी एशिया बाती इफिसुस नगरी। तिधी भेटे तेऊ कई च़ेल्लै इहै तिन्नैं बोलअ, “हाम्हैं बी आसा विश्वासी।” पल़सी पुछ़अ तिन्नां का, “ज़ेभै तम्हैं परमेशरे खुशीए समादा दी विश्वास किअ तेभै तम्हां पबित्र आत्मां आअ?” तिन्नैं किई इहअ बोली नांह,
“हाम्हैं निं पबित्र आत्में बारै शूणअ द बी आथी।” पल़सी बोलअ तिन्नां लै, “तै ज़ेभै तम्हैं पाणीं दी डुबकी लई तेते बारै तम्हैं किज़ै समझ़ा?”
तिन्नैं दैनअ ज़बाब, “हाम्हैं करा तिन्नां गल्ला दी विश्वास ज़ुंण जोहन्ना डुबकी दैणैं आल़ै आसा खोज़अ द।” तेखअ समझ़ाऊऐ तिंयां पल़सी, “जोहन्ना दैनी इहअ बोली पापो प्राश्त करने डुबकी कि ज़ुंण तेऊ बाद आसा एछणैं आल़अ, मतलब मसीहा प्रभू ईशू दी करै विश्वास।”
इहअ शूणीं लई तिन्नैं प्रभू ईशूए नाओंऐं पाणीं दी डुबकी। ज़ांऊं पल़सी तिन्नां दी हाथ डाहै, तिन्नां लै आअ पबित्र आत्मां अर तिंयां लागै कई बोली बोल्दै अर आजू हणैं आल़ी गल्ला प्रगट करदै। ईंयां सोभै तै कोई बारा मणछ।
इफिसुस नगरी दी पल़सीए च़ाकरी
पल़सी रहअ सभागृहा डेऊई चिई भिन्नैं तैणीं नडरै हई बोल्दअ लागी अर परमेशरे राज़े बारै खोज़दअ अर समझ़ाऊंदअ लागी। पर ज़ांऊं कई लोगै काठै हई तेऊए नांईं शूणीं अर लोगा नदरी इहअ बोल्दै लागै कि एऊए बात आसा बूरी, पल़सी किऐ तिन्नां छ़ाडी च़ेल्लै ज़ुदै अर हर धैल़ै करा त तरन्नुसे सभा दी ईशूए बारै सुआल-ज़बाब। दूई साला तैणीं रहअ इहअ ई हंदअ लागी, इधी तैणीं कि एशिया मुल्खै रहणैं आल़ै कै यहूदी, कै यूनानी, सोभी शूणअ प्रभूओ समाद।
परमेशर रहैऊआ त पल़सी करै शगतीए बडै-बडै काम। इधी तैणीं कि शाट्टै अर गाची निंयां तै लोग तेऊए देही का छुंआऊंई करै अर तिन्नां पाआ तै बमारा प्रैंदै अर तिंयां हआ तै सोभी रोगा का नरोगै अर दूत-भूता का आज़ाद।
पर कई यहूदी ज़ुंण ज़ादू करदै फिरा तै तिंयां बी लागै तै इहअ करदै कि ज़हा दी भूत होए तिन्नां लै प्रभू ईशूओ नाओं लई करै इहअ बोली मारा तै फूक, “ज़हा ईशूए बारै पल़सी खोज़ा, तेऊए नाओंऐं दैआ हुंह ताल्है हुकम कि दूर हअ।” एक थिअ सकीबा नाओं यहूदी अर सह बोला त आप्पू लै बडअ प्रोहत, तेऊए तै सात शोहरू अर तिंयां बी करा तै इहअ ई। पर भूतै दैनअ तिन्नां लै ज़बाब, “मुखा आसा ईशूओ थोघ अर पल़सी बी बछ़ैणा हुंह, पर तम्हैं कुंण आसा?”
तेऊ मणछा ज़हा दी भूत तै शाचै दै, तेऊ दैनी तिन्नां प्रैंदै एही छ़ाहल़ा कि तिंयां किऐ आपणैं बशै अर इहअ उपद्रभ किअ तिन्नां लै कि तिंयां ठुर्है नांगै अर मूंड माथै फाल़ी तेऊ घअरा का पोर्ही।
ऐहा गल्लो थोघ लागअ इफिसुस नगरी दी रहणैं आल़ै यूनानी अर यहूदी सोभी का। तिंयां डरै अर प्रभू ईशूओ नाअं लागअ बढदअ।
तिन्नां मांझ़ै किअ कई विश्वास बी, अर तिन्नां मांझ़ै आऐ कई अर तिन्नैं बोलअ सोभी नदरी इहअ कि हाम्हैं तै आप्पू बी एऊ ई कामां दी लागै दै। ज़ादू करनै आल़ै कई मणछै झाल़ी आपणीं बही-पोथी संघा चैल़ी सोभी नदरी तेथ आग। ज़ांऊं तिन्नें किम्मत ज़ोल़ी, सह निखल़ी कोई पज़ाह हज़ार च़ंदीए सिक्कै बराबर। इहअ करै शूणअ खास्सै मणछै प्रभू ईशूओ बैण अर खास्सै मणछै किअ विश्वास।
ज़ांऊं पल़सी इफिसुस नगरी आपणअ काम पूरअ करी मुक्कअ, पल़सी किअ आपणैं मन्नैं बच़ार कि मकिदुनिया अर अखाया मुल्खै डेऊई लणअ पैहलै तिधे विश्वासी भाई सेटा पुजी। तेऊ बोलअ इहअ, “एरुशलेम डेऊई आसा मुंह रोम बी डेऊणअ ज़रूरी।” आपणैं दूई साथी तिमोथी अर इरास्तुस छ़ाडै पल़सी मकिदुनिया अर आप्पू रहअ थोल़ै धैल़ै एशिया मुल्खै।
इफिसुस नगरी उपद्रभ
तिन्नां धैल़ै हुअ तिधी पंथे बारै खास्सअ उपद्रभ। किल्हैकि तिन्नां धैल़ै दिमेत्रियुस नाओं एक सनार। सह दैआ त अरतिमिस देबीए च़ंदीए देहुरै बणाईं कारीगीरा लै खास्सअ काम। तेऊ किऐ एऊ कामां करनै आल़ै सोभै कारीगीर कठा संघा बोलअ तिन्नां लै,
“हे मणछो, तम्हां का आसा थोघ कि एऊ कामां करी हआ म्हारी खास्सी कमाई।
“तम्हैं भाल़ा बी अर शूणां बी कि सिधअ इफिसुस नगरी ई निं, पर सारै एशिया दी पाऐ एऊ पल़सी खास्सै मणछ इहअ शकाऊई करै कबाता, ‘ज़ुंण च़िज़ा कुंण कारीगीर हाथा करै बणाआं सह निं परमेशर हंदअ।’ ऐबै निं हाम्हां सिधी ऐहा गल्ले डअर आथी कि म्हारअ ढब्बै खटणैओ धांधअ हणअ खतम। पर डअर आसा एही बी कि म्हारी महान अरतिमिस देबीए देहुरे बी निं लोगा कदर करनी। ज़हा देबी सारै एशिया मुल्खै अर संसारे कई लोग पूज़ा। इहअ करै निं एऊ देहुरे बी कोई कदर हणीं।”
तिंयां भर्हुऐ इहअ शूणीं रोश्शै अर लैल़ा पाई लागै बोल्दै, “इफिसुस नगरी रहणैं आल़ै मणछे देबी अरतिमिस आसा बडी!” सारी नगरी मच़अ खास्सअ हाल्लअ-गोल्लअ अर तिन्नैं लोगै ढाकै गयुस अर मकिदुनिया मुल्खो अरिस्तखोरस ज़ुंण पल़सीए साथी-संघी थिऐ। तिंयां निंयैं तिन्नैं घिशी करै अर सोभ ठुर्है एक मन्न बणाईं करै रंगशाल़ा दी।
ज़ांऊं पल़सी लोगा सेटा लै भितरा लै डेऊणअ च़ाहअ, होरी च़ेल्लै निं तेऊ डेऊणैं दैनी। सैणैं मांझ़ै ज़ुंण पल़सीए कई साथी तै तिन्नैं बी दैनअ तेऊ लै समाद अर तिन्नैं किई एही अरज़ कि रंगशाल़ा लै डेऊई निं खातरै दी पल़ी।
पर तिन्नां खास्सै मणछे जेल्ह-मरेल्ही मांझ़ा का लागै कोई किछ़ बोल्दै अर कोई किछ़ लैल़ा लांदै। सभा दी थिऐ लोग डरै दै अर कई लोगा का निं इहअ थोघ बी आथी त कि हाम्हैं इधी कठा किल्है आसा हुऐ दै। तिधी थिअ लोगा जैंदरी एक यहूदी मणछ, तेऊ नाअं त सकंदर। यहूदी निंयं सह लोगा जैंदरा का आजू लै घिशी। सकंदरै किअ आपणअ हाथ खल़अ करी लोगा लै शारअ कि तिंयां च़ुप्पी रहे, संघा च़ाहा त सह इहअ बोल़णअ कि तेऊ अर तेऊए यहूदी साथी निं किछ़ै बूरअ किअ।
पर ज़ांऊं तिन्नां का थोघ लागअ कि अह आसा यहूदी, तिंयां सोभ रहै कोई खास्सी घल़ी कोई एकी पहरै तैणीं एकी बोला दी लैल़ा लांदै लागी, “इफिसुस नगरी रहणैं आल़ै मणछे देबी अरतिमिस आसा महान!”
नगरीए बज़ीरै किऐ तेखअ लोग शांत, संघा बोलअ तिन्नां लै इहअ, “हे इफिसुस नगरी रहणैं आल़ै लोगो, ऐहा गल्लो आसा सोभी का थोघ कि सारी इफिसुस नगरी आसा म्हारी बडी देबी अरतिमिस देबीए देहुरै अर ज्यूस देअए सरगा का पल़ी दी मुहुर्तीए च़ाकरी करनै आल़ै। ज़ै सोभी का थोघ आसा, तै निं इना गल्ला कोहै झ़ुठअ बोली सकदअ। एता लै आसा इहअ ई ठीक कि तम्हैं रहा च़ुप्पी अर हर गल्ला करनी सोठी-समझ़ी। किल्हैकि तम्हैं ज़ुंण ईंयां मणछ ढाकी आसा आणै दै, ईंयां नां देहुरै लुटणैं आल़ै आथी, अर नां म्हारी देबीए निंदा करदै।
“ज़ै दिमेत्रियुस अर तेऊए साथी कारीगीरा कहा संघै झ़गल़अ आसा होए, तेता लै आसा दालता खुल्ही दी, अर पांच़ बी आसा, अर तिंयां सका एकी-दुजैओ दोश खोज़ी। पर ज़ै तम्हैं किज़ू होरी गल्ले बारै च़ाहा पुछ़णअ, तेतो फैंसलअ हणअ सभा दी। किल्हैकि आझ़कै एऊ हाल्लै-गोल्लै हणें बारै सका हाम्हां लै बी दोश लागी। किल्हैकि एतो निं कोई कारण ई आथी अर हाम्हैं निं एऊ झाल़ै कठा हणैंओ बी कोई ज़बाब दैई सकदै।” इहअ बोली किई तेऊ सभा बिदा।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.