Kulvi Outer Seraji Bible
शधाणूं 6
सात दास छ़ांटणैं
तिन्नां धैल़ै ज़ांऊं खास्सै मणछै मसीहा दी विश्वास किअ, यूनानी बोली बोल़णैं आल़ै विश्वासी लागै इब्रानी बोली बोल़णैं आल़ै लै बोल्दै कि हर धैल़ै निं ढब्बै-धेल्लै अर खाणैं-पिणैं दी म्हारी बिधबा बेटल़ीओ ईंयां च़ेल्लै मांझ़ै कोहै धैन-खैल करदअ।
तेखअ हुऐ तिंयां बारा च़ेल्लै आप्पू मांझ़ै कठा अर तेखअ बोलअ तिन्नैं एरुशलेम टोलीए होरी च़ेल्लै लै, “अह गल्ल निं ठीक हणीं कि हाम्हैं परमेशरे बैणा छ़ाडी खैऊंदै-पणैंऊंदै रहे लागी। भाईओ, तैही बोला हुंह, आप्पू मांझ़ा का छ़ांटा सात छ़ल़ैघ मणछ ज़ुंण पबित्र आत्मां अर अक्ली दी भरपूर होए, ताकि तिंयां एऊ काम-काज़ करे। पर हाम्हां रहणअ प्राथणां अर बैणे शिक्षा दैणें च़ाकरी लागी।”
अह गल्ल लागी सारी टोली बधिया अर तिन्नैं स्तिफनुस नाओं एक मर्ध ज़ुंण विश्वास अर पबित्र आत्मां दी भरपूर थिअ, अर फलिप्प, प्रखरुस, नीकानोर, तिमोन, परमनास अर अन्ताकिया रहणैं आल़अ निकूलस ज़ुंण यहूदी पक्षा का आअ त, तिंयां छ़ांटै। तिन्नैं आणै तिंयां सात ज़ण्हैं शधाणूं सेटा लै अर प्राथणां करी तिन्नां प्रैंदै हाथ डाही करै दैनअ तिन्नां लै च़ाकरी करनैओ हक।
परमेशरो बैण लागअ सारै दी पुजदअ अर एरुशलेम हुऐ नगरी खास्सै च़ेल्लै अर कई यहूदी प्रोहत बी मनअ अह समाद अर तिन्नैं बी किअ मसीहा ईशू दी विश्वास।
स्तिफनुस कैद करनअ
स्तिफनुस रहैऊआ त जश अर शगती दी भर्हुई करै लोगा मांझ़ै बडै-बडै च़मत्कार अर नछ़ैण। तेखअ लागै आज़ादी नाओंए सभागृहे कई लोग स्तिफनुसे बरोध करी हठल़दै ज़ुंण कुरेन नगरी, सकंदरीआ नगरी, किलकिआ अर एशिया मुल्खा का थिऐ। पर तिंयां निं स्तिफनुसे अक्ल अर पबित्र आत्मां करै भेटै दै ज्ञैना सम्हनै टेक्की सकै।
एता लै शकाऊऐ तिन्नैं होर लोग अर तिंयां लागै इहअ बोल्दै, “हाम्हैं शूणीं मोसा गूरे बधाने अर परमेशरे बारै निंदा करने गल्ला।” तिन्नैं शकाऊऐ स्तिफनुसे खलाफ होर यहूदी सैणैं अर शास्त्री अर तिन्नैं किअ सह कैद संघा निंयं सह माहा सभा लै।
तेऊ लै आणै तिन्नैं झ़ुठी शाजत दैणैं आल़ै लोल़ी, तिन्नैं दैनी एही झ़ुठी शाजत, “अह मणछ निस्सअ ऐहा पबित्र ज़ैगा अर बधाने खलाफ बोल़णअ छ़ाडी।1 किल्हैकि हाम्हैं शूणअ अह इहअ बोल्दअ कि नासरत नगरीए ईशू पाणअ अह पबित्र भबन ढोल़ी अर तिंयां रबाज़ पाणै तेऊ बदल़ी ज़ुंण मोसा गूरै आसा हाम्हां लै खोज़ै दै।”
ज़ुंण माहा सभा दी तै बेठै दै तिंयां सोभ लागै स्तिफनुसा बाखा भाल़ै, तेऊओ मुंह त स्वर्ग दूता ज़िहअ च़मकदअ लागअ द।
Source notes (1)
- Cross-reference जेर. 26:11
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.