Kulvi Outer Seraji Bible
शधाणूं 24
सैणअ फेलिक्सा सेटा पल़सीए पेशी
पांज़ा धैल़ै बाद आअ हनन्याह माहा प्रोहत कई सैणैं अर तिरतुल्लुस नाओंए कहा बकीला संघा लई कैसरिया नगरी लै। संघा खोज़अ तिन्नैं राज़पाला सम्हनै पल़सीओ दोश। ज़ांऊं पल़सी शादअ, तिरतुल्लुस बकील लागअ तेऊ लै दोशा लांदअ,
“हे माहा प्रतप्पी फेलिक्स, ताह करै भेटा हाम्हां सराहुणां लै अर तेरै इंतज़ामा करै सधेरा ऐहा ज़ातीए कई बूराई। ताह अर तेरै बधाना मना हाम्हैं हर ज़ैगा अर हर गल्ला दी शूकर करी। तेरअ निं हाम्हैं खास्सअ बगत ज़ांऐं करनअ च़ाहंदै, हुंह करा ताह सेटा अरज़ कि म्हारी शूणैं दूई गल्ला,
“किल्हैकि हाम्हैं भाल़अ अह मणछ उपद्रभ अर देशै-देशै बस्सै दै यहूदी जैंदरी खरोल़ा पांदअ! अह आसा तिन्नां सोभी लोगो सैणअ ज़ुंण ईशू नासरी पंथे आसा। एऊ लाई ती म्हारै परमेशरे भबनै छ़ोत लाई, तेते तैणीं ढाकअ हाम्हैं अह। हाम्हां दैणीं आपणीं बधाने साबै एऊ लै सज़ा।
“पर लासिआस नाओंए सपाही दले सरदारै छ़ड़ैऊअ अह ज़ोरा-ज़ोरी म्हारै हाथा का पोर्ही अर दुशमणा लै दैनी ताह सेटा एछणें ज़ाज़त किई इना सोभी गल्ला, ज़ेते बारै हाम्हैं इना दोशा एऊ दी लाआ, ताखा लागणअ आप्पै एऊ पुछ़ी-ज़ाच़ी करै थोघ।” यहूदी बी बोलअ तेऊओ साथ दैई कि सच्च़ी किअ एऊ इहअ ई।
पल़सीओ ज़बाब
ज़ांऊं राज़पाल फेलिक्सै पल़सी लै बोल़णा लै शारअ किअ, पल़सी दैनअ ज़बाब, “मुखा ज़ांऊं इहअ थोघ लागअ कि तूह करा कई साला ओर्ही ऐहा ज़ातीओ नसाफ, मुंह आसा ऐहा गल्ला ताह सेटा खोज़णें बडी खुशी। तूह सका आप्पै समझ़ी कि ज़ेभै हुंह एरुशलेम नगरी परमेशरे च़ाकरी करदअ आअ, मुंह निं अज़ी बारा धैल़ै का उझै हुऐ, अर इनै नां भाल़अ हुंह भबनै, नां सभागृहा अर नां नगरी दी कहा संघै हठल़दअ अर नां लोगा कठा करदअ भाल़अ? ज़हा गल्लो ईंयां मुल्है दोश लाआ नां ईंयां इना गल्ला सच्च़ी साबत करी सकदै।
“पर हाँ, हुंह मना ताह सेटा ऐहा गल्ला कि हुंह करा तेऊ ई बधाने साबै परमेशरे च़ाकरी ज़ेऊ साबै मेरै दाद-बाब करदी आऐ। अह गल्ल बी आसा सच्च़ी कि हुंह च़ला मसीहा ईशूए मरज़ी दी। हुंह करा तिन्नां सोभी गल्ला दी बी विश्वास ज़ुंण परमेशरै आपणैं गूर मोसा लै दैनी अर परमेशरे होरी कई गूरै आसा शास्त्रा दी लिखी दी।
“मेरअ विश्वास आसा तिहअ ई ज़ेही इना होरी आसा एही आशा कि एकी धैल़ै करनै परमेशरा धर्मीं अर कदुष्ट मणछ दुहै ज़िऊंदै।1 तैहा धैल़ी लै करा हुंह बी इहै करने कोशिश कि परमेशरा सम्हनै अर लोगा सम्हनै लोल़ी हर गल्ला दी मेरी सोर-समझ़ नर्दोश रही।
“कई साला बाद आअ त हुंह एरुशलेम नगरी लै मेरै आपणैं गरीब विश्वासी भाई-बैहणी लै दान दैनै दै धख ढब्बै-धेल्लै पजैल़अ। एशिया का आऐ दै यहूदी भाल़अ हुंह भबने ताटी परमेशरा सेटा माथअ टेक्कणै का आजी शुधी करनैओ बधान पूरअ करी एक्कै ज़ण्हअ, अर नां मुंह संघै कोई लोग आथी तै। ज़ै तिन्नां एशिया मुल्खे यहूदी का मेरै खलाफ किज़ै दोश शुझुअ बी होए, तै सका तै तिंयां इधी ताह सम्हनै मुल्है दोश लाई।
“कि खोज़े ईंयां आप्पै कि ज़ेभै हुंह माहा सभा सम्हनै खल़अ किअ त, तेभै इनै मुंह दी कै ज़ुल्म भाल़अ? ऐहा एकी गल्ला छ़ाडी ज़ुंण मंऐं तिन्नां सम्हनै खल़ै हई बोली, ‘मरी करै ज़िऊंदै हणें बारै आसा आझ़ तम्हां सम्हनै मेरअ नसाफ लागअ द हंदअ।’”
फेलिक्स राज़पाला का थिअ एऊ पंथे सारी गल्लो थोघ, पल़सी लै निं तेभै तेऊ किछ़ै सज़ा खोज़ी अर इहअ बोली टाल़ी सह गल्ल कि ज़ेभै सपाही दलो सरदार लासिआस एछे, तेभै हणअ थारी गल्लो फैंसलअ। तेखअ दैनअ सुबैदारा लै हुकम कि पल़सी लै निं कोई तंगी तकलिफी दैई अर एऊए हेर-सभाल़ करै बडै सुखा संघै, अर एऊए साथी-भाई मांझ़ै ज़ुंण बी एऊए च़ाकरी लै एछे, तिन्नां निं रोक्की।
फेलिक्स अर द्रुसिल्ला सेटा पल़सीए पेशी
कई धैल़ै बाद आअ राज़पाल फेलिक्स आपणीं लाल़ी संघा लई, तेऊए लाल़ी नाअं त द्रुसिल्ला अर सह थिई यहूदी। तेऊ शादअ पल़सी आप्पू सेटा अर तेखअ शूणीं मसीहा ईशू दी विश्वास करने बारै सारी गल्ला। ज़ांऊं पल़सी धर्म, सबर अर आजू हणैं आल़ै नसाफ बारै खोज़अ, फेलिक्से दैनअ हैल़ुई करै पल़सी लै ज़बाब, “एभै; डेऊ, ज़ेभै भिई मुंह मोक्कअ भेटे, तेभै शादूं हुंह ताह आप्पै।” तेऊ ती पल़सी का किछ़ ढब्बै-धेल्ले आशा बी, तैही शादा त सह पल़सी गल्ला करना लै।
पर ज़ांऊं दूई साला बिति, पुरकियस फेस्तुस आअ फेलिक्से ज़ैगा राज़पाल अर फेलिक्सै डाहअ यहूदी खुश करने तैणीं पल़सी कैदी ई बणाईं।
Source notes (1)
- Cross-reference दान. 12:2
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.