Kulvi Outer Seraji Bible
शधाणूं 9
शाऊलो दिल बदल़णअ
(शधाणूं 22:6-16; 26:12-18)
शाऊल ज़ुंण नर्दैई हई प्रभू ईशू दी विश्वास करनै आल़ै च़ेल्लै मारा त, सह डेऊअ माहा प्रोहता सेटा लै, तेऊ अर तेऊए साथी मांगी दमिश्क नगरी सभागृहे नाओंऐं एऊ कामां करने हक भेटणें च़िठी कि कै मर्ध, कै बेटल़ी, ज़ुंण बी ईशू मनणै आल़अ होए, तिंयां आणनैं कैद करी एरुशलेम नगरी लै।
पर हांढदी-हांढदी ज़ांऊं सह दमिश्क नगरी नेल़ पुजअ, हेरा-हेरी च़मकी सरगा का बिज़ल़ी तेऊ फेर। सह बधल़ुअ धरनीं अर तेऊ शूणअ इहअ बैण, “हे शाऊल, ए शाऊल, तूह किल्है आसा मुंह दुखी करदअ लागअ द?”
शाऊलै पुछ़अ, “हे प्रभू, तूह कुंण आसा?”
तेऊ दैनअ मुल्है ज़बाब, “हुंह आसा ईशू नासरी ज़हा तूह दुखी करदअ आसा लागअ द। पर ऐबै उझ़ू तूह खल़अ संघा डेऊ नगरी लै अर ज़ुंण ताह आजू करनअ, सह हेरनअ ताखा खोज़ी।”
ज़ुंण शाऊले तिंयां होरी साथी तै तिन्नैं निं किछ़ै बोलअ। किल्हैकि तिंयां बोल, शूणैं पर तिधी निं तिन्नां का कोहै शुझुअ! तेखअ उझ़ुअ शाऊल धरनीं माट्टै जैंदरा का खल़अ। पर ज़ांऊं आछी घुआल़ी, तेऊ का निं किछ़ै शुझुअ। तेखअ निंयं तिन्नें होरी सह हाथा ढाकी करै दमिश्क नगरी लै। तेखअ रहअ सह चिई धैल़ै तैणीं कांणअ, अर तेऊ निं तेतरै धैल़ै किछ़ खाअ-पिअ।
दमिश्क नगरी थिअ एक हनन्याह नाओं परमेशरे डरा हेठै रहणैं आल़अ च़ेल्लअ। प्रभू ईशू बोलअ तेऊ लै, दर्शण दैई करै, “हनन्याह!”
तेऊ दैनअ ज़बाब, “हाँ प्रभू हुंह आसा शूणअ लागअ द।”
तेखअ बोलअ प्रभू तेऊ लै, “उझ़ू, अर तैहा बाता डेऊ, ज़हा लै आज़री बात बोला, अर यहूदा नाओंए मणछे घअरै आसा शाऊल नाओं एक तरसुस नगरीओ मणछ। पुछ़ी लऐ, किल्हैकि भाल़ सह आसा लागअ द प्राथणां करदअ। मंऐं रहैऊअ तेऊ का दर्शणा दी हनन्याह नाओं एक मर्ध भितरा लै एछदअ अर तेऊ प्रैंदै हाथा डाहंदअ ताकि तेऊए आछी का भिई शुझदअ लागे।”
हनन्याह दैनअ ज़बाब, “हे प्रभू, मंऐं आसा एऊ मणछे बारै कई लोगा का शूणअ द कि एऊ आसा एरुशलेम नगरी तेरै पबित्र लोगा संघै बडअ उपद्रभ किअ द। इधी बी आसा एऊ लै बडै प्रोहता का हक भेटअ द कि ज़ुंण लोग तेरअ नाअं लए, तिन्नां बी सह कैद करी एरुशलेम नगरी लै निंए।” पर प्रभू बोलअ तेऊ लै, “तूह डेऊ, किल्हैकि अह आसा मंऐं होरी ज़ाती लै राज़ै, माहा राज़ै अर इज़राईली सम्हनै मेरै नाओंआं प्रगट करना लै मेरअ छ़ांटअ द भांडअ। मुंह खोज़णअ तेऊ का कि मेरै नाओंआं लै ताह किहअ-किहअ दुख लागणअ भुगतणअ।”
तेखअ डेऊअ हनन्याह तिधा का तेऊ घअरा लै संघा ज़िधी शाऊल त। तेखअ शाऊला दी हाथ डाही करै तेऊ लै बोलअ, “भाई शाऊल, प्रभू, मतलब ईशू ज़ुंण ताह तैहा बाता, ज़हा बाता तूह आअ, ताखा शुझुअ त, तेऊ ई छ़ाडअ हुंह कि ताखा लोल़ी भिई शुझदअ लागअ अर तूह लोल़ी पबित्र आत्मां करै भर्हुअ।” तेऊए आछी का होथै तेभी ज़िहै तरोल़ै अर तेऊ का लागअ शुझदअ अर सह उझ़ुअ तेभी खल़अ अर पाप माफी लै पापो प्राश्त करने डुबकी। तेखअ खाई तेऊ रोटी अर तेखअ आअ तेऊए देही बल।
दमिश्क नगरी शाऊलो प्रच़ार
सह रहअ कई धैल़ै तैणीं तिन्नां च़ेल्लै संघै ज़ुंण दमिश्क नगरी तै। तेखअ लागअ शाऊल तेभी सभागृहा प्रभू ईशूए बारै खोज़दअ कि सह ई आसा परमेशरो पूत।
तिधी ज़ुंण पल़सीए गल्ला शूणैं तै लागै दै, तिंयां हुऐ रहैन संघा लागै इहअ बोल्दै, “अह सह ई मणछ निं आथी, ज़ुंण एरुशलेम नगरी ईशू दी विश्वास करनै आल़ै लै खास्सअ ज़ुल्म करा थिअ? ऐबै आअ अह इधी दमिश्क नगरी कि इधे ईशू दी विश्वास करनै आल़ै कैद करी एरुशलेम नगरी लै निंए! अह च़ाहा तिन्नां सैणैं अर प्रोहता सेटा पेश करनअ।”
पर शाऊल लागअ होर बी खास्सअ ईशूए बारै खोज़दअ अर ऐहा गल्लो सबूत दैई-दैई बोल्दअ कि ईशू ई आसा मसीहा। ज़ुंण सबूत तेऊ मसीहे बारै दैनै, तेते बारै निं दमिश्क रहणैं आल़ै यहूदी तेऊ लै ज़बाब दैई सकै।
ज़ांऊं खास्सै धैल़ै बितै, यहूदी किअ आप्पू मांझ़ै एक्कअ कि शाऊल पाणअ हाम्हां मारी। तिन्नैं पाअ राची धैल़ी शाऊला मारना लै पहरअ पर शाऊला का गअ ऐहा गल्लो थोघ लागी। तेखअ होरी विश्वासी भाई थुआल़अ शाऊल राची एकी बडै च़ठै भितरी बशैल़ी नगरीए दुआली बाती छ़ड़ाऊई करै उंधै अर सह काढअ बागा लै।
एरुशलेम नगरी शाऊल
एरुशलेम नगरी पुजी किई च़ेल्लै सेटा मिलणें शाऊलै कोशिश, पर तिंयां सोभै डरा तै तेऊ का, किल्हैकि तिन्नां निं इहअ भरोस्सअ ई हंदअ त कि अह बी आसा ऐबै प्रभू ईशूओ च़ेल्लअ। पर बरनबास नाओंए प्रभूए एकी च़ेल्लै निंयं सह आप्पू संघै शधाणूं सेटा लै अर तिन्नां का सोभै गल्ला खोज़ी कि किहअ करै शाऊलै बाता प्रभू ईशू मसीहा भाल़अ अर एऊ संघै किई गल्ला, अर तेखअ दमिश्क नगरी केही हिम्मता संघै किअ प्रभूओ प्रच़ार।
तेखअ रहअ तिन्नां संघै एरुशलेम नगरी एछदअ-डेऊंदअ लागी। शाऊलै किअ नधड़क हई किअ प्रभूए नाओं प्रच़ार, अर यूनानी बोली बोल़णैं आल़ै यहूदी संघै रहअ हठल़दअ लागी, पर तिन्नें ती हर बगत एही सोठ कि शाऊल पाणअ त किहअ करै मारी। इहअ थोघ लागी करै आणअ सह होरी भाई कैसरिया नगरी लै अर तिधा का छ़ाडअ सह तेऊए आपणीं घअर तरसुस नगरी लै।
इहअ करै हुई सारै यहूदा, गलील अर सामरी मुल्खै टोली दी शांती। विश्वासी रहा तै प्रभूए डरा हेठै। पबित्र आत्मों हैअ भेटी करै लागी विश्वासीए गणांई होर बी खास्सी हंदी।
लुदा अर जोपा नगरी दी पतरास
तेखअ हुअ इहअ कि पतरास पुजअ कई ज़ैगा हांढदी-फिरदी तिन्नां पबित्र लोगा सेटा बी ज़ुंण लुदा नगरी रहा तै। तिधी भेटअ तेऊ अनिआस नाओं दरंगे बमारी आल़अ मणछ ज़ुंण आठा साला ओर्ही च़ैन्नै त पल़अ द। पतरासै बोलअ तेऊ लै, अनिआस! ईशू मसीहा किअ तूह ऐबै ठीक, उझ़ू, आपणअ च़ैन च़क। तेखअ सह तेभी खल़अ उझ़ुअ। इहअ करै फिरै लुदा अर शारोने रहणैं आल़ै कई प्रभू बाखा लै।
जोपा नगरी दी रहा ती तबिता नाओंए एक च़ेल्ली, सह करा ती कई भलै काम अर गरीबा लै दान। तिन्नां ई धैल़ै हुई सह बमार अर मूंईं। तिन्नैं विश्वासी बी डाही सह न्हैऊई धोई करै पांडा। लुदा नगरी ती जोपा नगरी नेल़ तिन्नैं विश्वासी भाई शूणअ इहअ कि पतरास आसा तिधी आअ द। तिन्नैं छ़ाडै दूई मणछ एही अरज़ करदै, “ज़ेतरअ छ़ेक्कै हई सका, एभी एछै हाम्हां सेटा लै।”
तेखअ डेऊअ पतरास तिन्नां संघै अर ज़ांऊं तिधी पुजअ अर तिन्नैं निंयं सह पांडा लै अर सोभ बिधबा बेटल़ी ती लेरदी लागी दी अर तिंयां खल़्हुई पतरासा सेटा अर ज़ुंण झिकल़ै तैहा तिन्नां संघै रहंदी बणाऐं तै तिन्नां रहैऊंदी लागी। तेखअ काढै पतरासै तिंयां सोभ बागा लै अर ज़ान्हूं दी बेशी किई प्राथणां अर ल्हासा बाखा भाल़ी बोलअ, “हे तबिता, उझ़ू।” तैहा घुआल़ी आछी अर पतरासा भाल़ी उझ़ुई खल़ी। पतरासै झ़ैऊई सह हाथ ढाकी करै खल़ी अर तिंयां पबित्र लोग अर बिधबा शादी करै रहैऊई सह तिन्नां का ज़िऊंदी होश-बाशा दी।
अह गल्ल पुजी सारी जोपा नगरी अर कई लोगै किअ प्रभू ईशू दी विश्वास। पतरास रहअ जोपा नगरी कहा शमौन नाओंऐं च़ाम्भल़े बपारा करनै आल़ै सेटा कई धैल़ै तैणीं।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.