Kulvi Outer Seraji Bible
शधाणूं 3
लाट्टअ भिख मांगणै आल़अ किअ ठीक
पतरास अर जोहन्ना तै लागै दै चिऊथै पहरै प्राथणां करने बगती दै भबना लै डेऊंदै। लोग तै लागै दै एकी ज़ल्मां ओर्ही लाट्टै च़की आणदै। तेऊ डाहा तै तिंयां धैल़ भबने तैहा प्रऊल़ी आजू बशैल़ी ज़ेता लै सुंदर प्रऊल़ बोला तै। ताकि सह एछदै डेऊंदै लोगा का भिख मांगे।
ज़ांऊं तेऊ लाट्टै पतरास अर जोहन्ना भबना लै डेऊंदै भाल़ै, सह लागअ तिन्नां का भिख मांगदअ। पतरासै अर जोहन्ना बोलअ तेऊ लाट्टै बाखा कोहरअ भाल़ी करै, “हाम्हां बाखा लै भाल़।” सह लागअ ऐहा आशा तिन्नां बाखा लै कोहरअ भाल़अ कि इनै लाअ मुल्है किज़ै दैई।
तेखअ बोलअ पतरासै, “सुन्नअ च़ंदी ता निं मुखा आथी। पर ज़ुंण मुखा आसा सह लाअ मंऐं ताल्है दैई। प्रभू ईशू मसीहा नासरीए नाओंऐं उझ़ू खल़अ अर हांढ-फिर।”
पतरासै झ़ैऊअ सह तेऊओ खाणअ हाथ ढाकी करै खल़अ अर तेभी हुऐ तेऊए ज़ान्हूं अर खूर राम्बल़ै किंडै अर तेऊ दैनी उझै छ़ाहल़ अर सह उझ़ुअ खल़अ, सह लागअ हांढदअ-फिरदअ अर सह लागअ छ़ाहल़ा दैंदअ अर ठुहर्दअ अर परमेशरे स्तोती करदअ अर तिन्नां संघै डेऊअ भितरा लै भबने खोल़ै।
तेखअ होरी लोगै सह हांढदअ-फिरदअ भाल़ी अर परमेशरे स्तोती भाल़ी सह बछ़ैणअ कि अह आसा सह ई ज़ुंण भबने सुंदर प्रऊल़ी आजू बेठी करै भिख मांगा त। ज़ुंण तेऊ लाट्टै लै हुअ, तेऊ च़मत्कारा भाल़ी हुऐ सोभ रहैन।
भबनै पतरासो प्रच़ार
भबनै ज़ांऊं सह लाट्टअ पतरास अर जोहन्ना का थिअ ढाखुअ द, तेऊ भाल़ी हुऐ सोभ लोग हुऐ रहैन अर तिंयां आऐ भबने खोल़ै तैहा ज़ैगा लै ठुर्ही ज़ेता लै सुलैमानो च़ऊंरअ बोला तै।
इहअ भाल़ी बोलअ पतरासै तिन्नां मणछा लै, “हे इज़राईली मणछो, तम्हैं किल्है हुऐ एऊ मणछा भाल़ी रहैन? अर हाम्हां बाखा लै किल्है आसा लागै दै इहअ करै भाल़ै कि ज़िहअ हाम्हैं ई किअ अह आपणीं शगती अर करै हांढदअ-फिरदअ? आबराम, इसहाक, याकब अर म्हारै दादा-बाबे परमेशरै रहैऊअ आपणैं दास ईशूओ प्रतप्प। ज़ुंण तम्हैं ढाकअ अर ज़ांऊं राज़पाल पिलातुसै तेऊ छ़ाडणेंओ बच़ार किअ, तेभै बोलअ तम्हैं सोभी-सोभी कि नांईं एऊ लोल़ी सज़ा भेटी।
“तम्हैं निं सह पबित्र अर धर्मीं मणछ मनअ, तम्हैं किई राज़पाला का एही मांग कि एकी हत्या करनै आल़ै पापी करा कैद खानै का ईशूए बदल़ै थारी तैणीं आज़ाद। तम्हैं पाअ ज़िन्दगी दैणैं आल़अ मारी, पर सह किअ परमेशरै मरी करै भिई ज़िऊंदअ अर एते शाजत आसा हाम्हैं ज़ुंणीं ईंयां गल्ला आपणीं आछी भाल़ी।
“एऊ मणछा ज़हा तम्हैं धैल़ भाल़ा अर बछ़ैणा बी अर ज़हा तम्हैं एभै भाल़ै आसा लागै दै, एऊए देही दी आई मसीहा ईशूए नाओंऐं तागत। लाट्टअ मणछ लागअ मसीहा ईशू दी विश्वास करी हांढदअ-फिरदअ।
“भाईओ, मुखा आसा थोघ कि थारै सैणैं पाअ नज़ाणै दी ईशू मारी किल्हैकि तिन्नां का निं थोघै त कि सह आसा मसीहा। पर ज़ुंण गल्ला परमेशरै आपणैं सोभी गूरा बाती पैहलै ई हेरी ती खोज़ी कि मसीहा भुगतणअ दुख अर सह पाणअ मारी, ईंयां गल्ला हुई पूरी।
“तैही बोला हुंह आपणैं पापो प्राश्त करा, संघा फिरा परमेशरा बाखा, ताकि थारै पाप माफ होए। ज़ै तम्हैं इहअ करे, एक बगत एछणअ इहअ बी कि तम्हां का जाणअ थोघ लागी कि परमेशर आसा तम्हां संघै। परमेशरा छ़ाडणअ एकी धैल़ै मसीहा ईशू पृथूई लै बापस ज़ुंण तेऊ तम्हां लै पैहलै ई आसा छ़ांटअ द।
“अह आसा ज़रूरी कि ईशू स्वर्गै तेभै तैणीं रहे ज़ेभै तैणीं कि सह सोभी गल्ला ठीक निं मुक्के करी, ज़ेते बारै परमेशरै आझ़ा का पैहलै संसार शुरू हणैं ओर्ही आपणैं पबित्र गूरा बाती कई बारी आसा खोज़ी दी।
“ज़िहअ परमेशरे गूर मोसा बोलअ, ‘परमेशर बिधाता काढणअ थारै भाई-बंधा मांझ़ा का तम्हां लै मुंह ज़िहअ एक गूर, ज़िहअ सह गूर तम्हां का खोज़े, तम्हैं करै तिहअ ई।’1
“पर तिंयां सोभ ज़ुंण तेऊ परमेशरे गूरे नांईं शुणें तिंयां करनै तिन्नां मणछा मांझ़ा का खतम।2
“परमेशरो गूर शमूएल अर तेऊ बाद निखल़ै दै सोभी परमेशरे गूरै आसा पैहलै ई हेरी दी ईंयां गल्ला खोज़ी कि एऊ ज़मानैं किज़ै हणअ। तम्हैं आसा परमेशरे गूरे खिंबा का अर परमेशरे करारे साझ़ू ज़ुंण परमेशरै थारै दादा-बाबा संघा किई। ज़धू परमेशरै आबरामा का बोलअ, ‘तेरी लुआदा करै भेटणीं आजू पृथूईए सोभी खिंबा लै बर्गत।’3
“परमेशरै छ़ाडअ आपणअ दास ईशू मरनै का बाद ज़िऊंदै हई सोभी का आजी तम्हां सेटा लै। ताकि तम्हां हरेक बूराई का दूर हई प्रभू का बर्गत भेटे।”
Source notes (3)
- Cross-reference बधा. 18:15-18
- Cross-reference लेब. 23:29; बधा. 18:19
- Cross-reference मूल. 12:3; 18:18; 22:18; 26:4
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.