Iyyoobikaa Maxaafa

Iyyoobikaa Maxaafa

E'yichchoo

Iyyoobiki Maxaaf giddo afendaaxi jirte jabaxxi rakkona ba'ne gelteeke mitte arji manjixxa jirte leellishshaaxxeni. Kunni manji oosetanna karra duuchcha gopha calla kaddebaangi lumoxxe madani ganeme abara uuda'neeni; Okkoo'ni xingotixxe bifanni shiqeeke sase haaso'ini Iyyoobinna Iyyoobiki jaaluwwi konne geyyeeke abara'ni insa'ne'ni laqendee qico haassona'neeni; udumii'ninna Mageni Iyyoobi'a leellaani.

Iyyoobiki jaaluwwinna Iyyoobi'ni gelteexxe rakko'a shiqinsha'neeki yaadi insa'ne baranteexe aadanni yookaani addenniteni; tennexxee insa'ne «Mageni eloke manji'a eloxxa yaane assaa wodda, fuggichcha manjo kinni xixaani; konne qicinni Iyyoobi'ni tinni rakko duuchcha gelteeki Iyyoobi hujeexe cubbo'aateni» hinaammani; yaane kinni Iyyoobi hara eloke manjo kadeemmaxxe tinni iitta hexxeexi jabaxi xixa geltaake manjommabaani; matanga hiibbote kaddeexxi yaane iso fakkaataake eloke manjo'ni iitta geltaaxi rakko geyateni; haranna Iyyoobi addeti daaqanna gophoole, Mageni toggitte murte isixxa uwwati rakkotenaa'ni fulchche birexe eloxe hedhobaa hiissaashsha kadhate'ni goofebaani.

Mageni Iyyoobike qortumuwwi duuchchi'a mitte mittengee hiissichcho uwwa gophoolenna, adde isixxika jabeenna mambe'a hiyyati magenuntetixxa hunna isixxanna beekkuma mambe'a hinaaxe gencenni kula'neeni; okkonechchinni udumi'a Iyyoobi Mageni lumokena beekake kadeexa kokati isi edo mufetina hunnati haaso'eexa faaci'ati aade aageeni.

Muuxatibaanna gencete kaddebaaxe borreessanni Iyyoobi birexxe eloxxe hedhoba higeexa kuldaaxxenna matanga karratenaa'ni birexxenaa'ni saxxexa karra alfeexa kuldaani; Iyyoobiki jaaluwwi Iyyoobi'ni gelteexxi rakko mayeete kaddeexa aaggebaangi haasonneexxee Mageni jaba qicinni insa'ne xixe'eni; baratendeexe aadanni haaso'ati irra Mageni lumoke Mageno kadeexxa aaggeeki Iyyoobi'aan callammani.

Konne Maxaafi Giddo Hexxeexxa Yaanuwwa

Iyyoobi karra, mini hadonna fayyunte gopheexxa

Iyyoobi ilemeexxa barra yowwe

Taakkaxxa mari'e

Langaxxa mari'e

Sakkaxxa mari'e

Muuxatika haaso'a

Iyyoobi balleessa afebaaxxa koke haaso'e

Eelihute hinaake manjika haaso'a

Siretika Mageniinka haaso'a

Langaka Mageniinka haaso'anna Iyyoobika hiissichcho

Mageni illeema Iyyoobi fayyunteti, karratinna mini hadinni eebbise