Gedeo Bible
Iyyoobikaa Maxaafa 28
«Ee birretika sibljo qonte fulichchinaxxi bakkanna
worqe qulleessinaaxxe bakka hexxe.
Sibiljo buttina qonte anfaani,
medabi hinanaki sibiljinna kinjo bassinee'na afemaan.
Manji dukkana giddo ifa xasseexxi buttini giddi'a sa'e e'yiyyoti;
butti'a bayyate e'yiyyoti
dimmi hiteexxe dukkanna giddo sa'iyyoti
dukkanna dimmi giddo konnee siblo hanisaan.
Manji hedhammaba'ni ba'yyantee
lekka mijiinxi haxxee egendeebaaba gennaan
ookkonna genne yo'oxxa bale qontaan
wodarote'n rarrana'n manjokenaa'n qofi fullee hunjaan.
Butta indaaxxa midha lachchiissaan
ise giddi kinni giirati baqqe'e windiriqqi hitaan.
Senpere hiyyemaaki fixxeeki kinji isexxe kinuwwa giddo afemaan
Worqetinna isenge buttin giddo afendaan.
Konne kinjuwwibaa me'aaka ora risi ege'nebaan
joletixxi illenna uuddebaan.
Elobaak biniichuwwi ettennee bakka haadhe ege'nebaan
Neeniqi midde ookko'ni sa'ee ege'nebaan.
Manji anga ifixxen jabaka kinjo qotee fulchaan;
koobuwwatanna booso isexenaa'n fottossaan
Rassa giddo sa'aaxxa xuullo giissedhaan
fixxeeka kinjuwwanna alfaan.
Galaaniinxa muummuwwa kofan;
butinni giddo sho'ondeemmaxxa karranna afaan.
«Iite barota beekkumi habaa'n afema?
Ege'naa hexxaabita habate?
Beekkumi butta tenne'ni afemabaan;
hira isikanna dhugaati konneten hiyyee ege'naaki hedhebaan.
Beekkumi Abbaayyatixxe dhi'mo'ni afemabaan;
abbaayyati giddonna hedhebaan.
Beekkuma ca'itte worqenn hirrabaan;
hiri isikinna birretike sibiljinninna mikemabaan.
Beekkumi Ofiiri bogixxe worqennaa'ni
Mereegidi, Senper hiyyemaake fixeeke kinjuwwi caala fiixeeken.
Worqetinna yo'oshsha ca'itte daa'wite isinni qixxoottabaan
ca'itte worqenni giissemeek seessuwwinn jijjiiremabaan.
Zaagolinna Almaaze hinaaki fiixeeki kinjuwwiri isinni welt herregemmabaan.
Beekkumiink hiri Luule hinaake kinjuwwi iimi darrenni
Tophphaaz hinaaki Tophiyinke fiixxeeki kinjinna isenn qixxo'abaan
hara yo'oshsha ca'a hiteexxe worqenninna hiremabaan.
«Yoonata beekumi habaa'ni dagaachcho?
Ege'nata haba afenda?
Lubbo afeechchi duuchchixxe ille'n sho'ondeexxen
iima me'itaaxxi ci'uwwa midde hasse'e affebaan
Ba'netinna reyo,
‹odo isexxa calla lanqenne› hinaan.
Beekkumiinbaa me'inaa oranna
haba hedhaaxxa eg'naak
Mageno callani.
Isi buttatixxe gabala duuchcha afaan;
iimati butti'a hedheechcho duuchcha uudaan.
Diidallotee hunna uwwee wodda,
Abbaayyatika wode'e mike wodda,
Xeenakeenna banqotee seera
danbala'akeena ora uggee wodda,
Mageni beekkuma uude bire ulfeesse
qorqore bire eloken hiyye mure.
Ookkone wodda manjo
‹beekkumake hiyyo dada duuchchika Duuchchi Woddika Gootta sodaatateni,
ege'natinna fuggoxxenaa'n bayyatateni› isoo hiyye.»1
Source notes (1)
- Cross-reference Far. 111:10; Isa. 1:7; 9:10.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.