Skip to content
BibleKenya

Gedeo Bible

Iyyoobikaa Maxaafa 29

Iyyoobixxa Muuxamiinxa Moronsha

Iyyoobi higgeenna lebe haaso'ee qici

Ta'ixxa anixxa hedho mittengele

edo Mageni anee heqqaamma woddixxishsha kadda'neele

silaan hittata eeyyanna'a!

Eettenne yanna dukkana giddo me'aanna wodda

Mageni ifa ifika ani'a xassaa'naa

ifa isik giddo me'aannani

Jaalo anike kade'e Magen mine anka heqqanaa

xoo'mamummati galaanna woddinge kadunnadu!

Duchchiinxa dande'aak Mageni ani birii'ni qoya gopheemmaxxee

oose anixxi duuchchiinxi ani bira hexxemman.

Lekka anixxa adoti anshedhanno qico'n heddo lalo elmedhaannan;

careti boga'n hedheeka Ejersuwwa anka midde

miincaa wodda gurre gonphaaxxe zayite alfaannan

Qachchiinxe hulaba me'a'ni

songote'n ofo'laanna wodda,

Kaa'umi anee uudaa wodda edii'ni ke'amman

geedhetinna anee ulfeessatee ofoldeemmabaani qophphi hitee kexxa'nemman.

Haaso'ake'n hexxemmaxxi ardiinxi geedhenna

anee affaa wodda afo'o abixxite'e sammi hita'emman.

Hayyoole bogiinxinna ani hedhennexxe bakka'ni haasootta'nemmabaan;

afo'i loqoxee'naa hitaaxxi baxxaamman.

Haaso'aa'naa laqqeki duuchchi anee jajeen

huje anixxa uudeek duuchchi anee galateeffate

Tinninna hiyyeeyyetixxa raare laqe'e gargaaranaxxeenna

hado affebaaxxa oosenna wodaannaxeeten.

Lumoxxe rakko giddo hedheemmaka gargaarenaxxee anee eebbise;

aro'i reyemmaxxa melaale gargaarenaxxee gamada'nee ililisa'nemman.

Ani qullumma seemmatishsha oddo'wwenne;

dhugaatixxa murtenna ejiinsha hana lephphenne; ruufatishshanna umoke'n mirqedhenne.

Ani balla'ake illetemman

naafakee lekkatemman.

Hiyyeeyyetee annakemman

ege'nebo'noke manni'aanna baassa'ennekemman.

Hunnaameessiinxa hirre enqa'nee,

hunnati adhdheemmachcho angii'ni ibisaannan.

«Aninna godobik, ‹Wogga anxi abbaayyatike maanchishsha bira saxxe;

mine anike'n elo qicin reyannon,

Ani duuchchi wodda wode'e alfa'n,

shafa haanjedhammake haqichchishshatemman.

Duuchchi wodda ulfeessinaa'naa hedhaannan,

hunna anixxinna barra barrande'n haaroxxe gabeemman.›

«Manni ani hiyyannoxxa caqasatee sammi hiyya'nemman,

gorsa ankanna ca'li hiyye'e laqa'nemman.

Haaso'i anik insa'nee goddisaammaxxee

ani haaso'enneelchchi uduma lebe haaso'amaki manji hedhebaan.

Hujalli mayetika xeena heqqedhammashsha

haaso'a anika laqatee afo'o haanni hinee heqqinaan.

Goora anka insa'ne'a farri assanno wodda gammande

mushuddi hiyyenne wodda albi insa'neeki ife.

Me'inaaka ora kula'n insa'nee galcha'ennan

ifika sannachcha akeekaammake moyanjishsha akeeka'ennan;

yaandaa woddanna dayyeessaneshatemman.»

Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.