ठिम
Deuteronomy
Introduction from this edition
ठिमला किताब
चु किताबला बारेरी पाङ्तोःमा
ल्हानान दिङ्धोना तोङ्तोङ्बा ग्लाग्याम भ्रमा भ्रमा इस्राएलीगदे मोआब य्हुल्सारी दोजी। ओच्छे थेनोन ग्लारी चिसी कनान य्हुल्सादा ह्राङला यारी किन्बारी तयार लबा मुबा। थेह्रङ् लसी मोआब य्हुल्सारी चिबा धुइरी मोशासे इस्राएलीगदेदा ल्हानान ताम लोप्बा मुबा। चुह्रङ् लसी मोशासे लोप्बा तामगदे ज्यना लसी भ्रिसी थान्बा किताबनोन ठिमला किताब हिन्ना।
चु किताबरी भ्रिबा तिगै मूल तामगदे चुह्रङ्बा मुला।
१) बोगल न्ही दिङ् न्हङ्री तबा कोइ कोइ मूल तामगदेदा मोशासे चु किताबरी ढन्ना लबा मुला। ओच्छे खाह्रङ् लसी परमेश्वरसे तोङ्तोङ्बा ग्लाग्याम थेनीगदेदा ज्यना लसी थोसी भबा मुबा। थे तामदा ढन्सी परमेश्वरदा मान लबान परमेश्वरसे कुल्बा अन्छार भ्रउ भिसी मोशासे म्हिगदेदा लोप्बा मुला।
२) परमेश्वरसे कुल्बा गोर च्युइ तामगदे दोःसी मोशासे म्हिगदेदा लोप्बा मुला। ओच्छे परमप्रभुथोरी जे विश्वास लउ भिसी परमप्रभुसे कुल्बा शुरूला तामदाएनोन मोशासे दोःसी लोप्बा मुला। ओच्छे चु किताबरी मोशासे अर्गु थरीथरीला ठिमगदेला बारेरीनोन दोःसी लोप्बा मुला। ओच्छे थेनोन ठिम अन्छार कनान य्हुल्सारी इस्राएलीगदे चितोःमुबा।
३) परमेश्वरसे थेनीगदेदेन छ्याम तिग्दा कबुल लबा हिन्ना भिबा तामएनोन मोशासे म्हिगदेदा ढन्ना लजी। ओच्छे परमेश्वरसे लबा कबुल अन्छार थेनीगदेदा दोःसी परमेश्वरला छ्यारी ह्राङसे ह्राङदान अर्पण लपुङ्जी।
४ ओच्छे परमेश्वर चा विश्वास लखम्बा परमेश्वर हिन्ना भिसी परमेश्वरला जयजयकार लबान व्हाइ गोसी मोशासे इस्राएलीगदेला जम्मान वंशगदेदा मोलम पिन्जी। जमाहेन्से यर्दन स्योङ्ला स्यारपट्टिला मोआब य्हुल्सारी मोशा सिजी। मोशा सिमाहेन्से परमेश्वरसे मोशाला साटोरी यहोशूदा जम्मान इस्राएलीगदेला मूल म्हि स्होजी।
चु किताबरी भ्रिबा जम्मान तामगदेदा तुन्ना लसी पाङ्तोःमा परमेश्वरसे ह्राङसे धम्बा य्हुल्ला म्हिगदेदा जोगब लसी मोलम पिन्बा मुला। ह्राङसे धम्बा य्हुल्ला म्हिगदेदा परमप्रभुसे माया लबा मुला। परमेश्वरसे धम्बा म्हिगदेसे चा सदन चु ताम ढन्तोःला। जमाहेन्से थेनीगदेसे जुकजुकधोनाला जुनीदेन मोलम सदन याङ्ला। चु किताबला मूल ताम चा ६:४-६ पदरी भ्रिबा मुला। थेरी चुह्रङ् भिसी भ्रिबा मुला। “इस्राएलीगदे, चु ताम ङ्यन्गो, परमप्रभु य्हाङला परमेश्वर गिक जे परमप्रभु हिन्ना। एनीगदेसे ह्राङला परमप्रभु परमेश्वरदा ह्राङला जम्मान सेमहेन्से, जम्मान प्राणसे, जम्मान शक्तिसे माया लउ (४-५ पद)।” चुनोन तामदा येशू ख्रीष्टसे परमप्रभुसे कुल्बा जम्मान भन्दा घ्रेन ताम हिन्ना भिसी सुङ्बा मुला।
मूल तामगदे
मोशासे लोप्बा शुरूला ताम
मोशासे लोप्बा अर्गु ताम
क) परमेश्वरसे कुल्बा गोर च्युइ ताम
ख) ठिमदेन होशियार तना लबा तामगदे
कनान य्हुल्सारी वाङ्गो भिसी कुल्बा
दोःसी छार कबुल लबा
मोशासे पाङ्बा थुम्ला ताम
मोशा सिबा
ठिमला किताब
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.