Eastern Tamang Language Bible
ठिम 20
लडाइ लबा बारेला ठिम
एनीगदे ह्राङला शत्रुगदेन छ्याम लडाइ लबारी निमा एनीगदेसे ह्राङदेन छ्याम भन्दा शत्रुगदेदेन छ्याम ता, रथदेन ल्हानान सिपाहीगदे म्राङ्सी एनीगदे आलोङ्गो। तिग्दा भिसम एनीगदेदा मिश्र य्हुल्साग्याम तेःसी भबा परमप्रभु एनीगदेला परमेश्वर एनीगदेदेन छ्यामनोन तला। लडाइ लबारी निबा भन्दा ङाच्छा पूजाहारीसे सिपाहीगदेदा चुह्रङ् भिसी पाङ्तोःला, “इस्राएलीगदे ङ्यन्गो, तिनी एनीगदे ह्राङला शत्रुगदेदेन छ्याम लडाइ लबारी निबान मुला। एनीगदेला सेम धरमर आलउ, आलोङ्गो, आँट लउ। थेनीगदेला ङाच्छापट्टि एनीगदे लोङ्नोन आलोङ्गो। तिग्दा भिसम एनीगदेला शत्रुगदेदेन छ्याम परमप्रभु एनीगदेला परमेश्वरसेन लडाइ लला। ओच्छे एनीगदेदा ढाना लला।”
जमाहेन्से सिपाहीगदेला मूल म्हिगदेसे सिपाहीगदेदा चुह्रङ् भिसी पाङ्गै, “चुदे खालै म्हिसे दिम स्होसी परमेश्वरला छ्यारी अर्पण लबा आरे भिसम थे म्हि ह्राङला दिमरी दोःसी निगै। चुदे थे लडाइरीन सिजी भिसम अर्गुन म्हिसे थेला दिम अर्पण लला। चुरी अङ्गुर खेती लसी अङ्गुर थुआम्याङ्बा खालै म्हि मुसम थे म्हि ह्राङला दिमरी दोःसी निगै। थे लडाइरी सिजी भिसम, थेसे खेती लबा अङ्गुर अर्गुसे चला। ब्याह लबाला लागिरी खालै म्हिसे भर्खर जे म्रिङ्कोला ह्रीबा मुला, तर थेसे ब्याह लबारी चा बाँकी मुसम थे म्हि ह्राङला दिमरी दोःसी निगै। थे लडाइरी सिजी भिसम अर्गुसेन थे म्रिङ्कोलादा ब्याह लला।”
ओच्छे सिपाहीगदेला मूल म्हिगदेसे सिपाहीगदेदा चुह्रङ् भिसीएनोन पाङ्गै, “चुरी लोङ्सी फितफित धर्बा खालै म्हि मुसम थे म्हि ह्राङला दिमरी दोःसी निगै। तिग्दा भिसम थेसे लमा थेला अर्गु ह्रोगदेला सेम सिला।” सिपाहीगदेला मूल म्हिगदेसे सिपाहीगदेदा चुह्रङ् पाङ्सी जिन्माहेन्से सिपाहीगदेला समूह समूहला लागिरी कप्तानगदे धम्गै।
एनीगदे लडाइ लबाला लागिरी खजिबै सहरला ङाम्री दोमाहेन्से ङाच्छा एनीगदेसे थे सहरला म्हिगदेदा ङन्से आखम्बा तजी य्हाङ ढिक्गे भिसी पाङ्बा मौका पिन्गो। चुदे थेनीगदेसे ह्राङसे ह्राङदान एनीगदेला यारी जिम्मा पिन्सी सहरला मूल म्रापगदे ठ्वाङ्सी पिन्जी भिसम, थे सहररी मुबा जम्मान म्हिगदेदा एनीगदेला घ्याबादेन घ्याबास्या स्होउ। ओच्छे थेनीगदेसे एनीगदेला गे लनोन तोःला। तर थे सहरला म्हिगदेसे ह्राङसे ह्राङदान एनीगदेला यारी जिम्मा आपिन्ना लडाइनोन लबा सेम लजी भिसम, एनीगदेसे थे सहरला क्युर्नोनग्याम सिपाहीगदे पुइसी सहरदा गुङ्री झाङ्गो। परमप्रभु एनीगदेला परमेश्वरसे एनीगदेला यारी थे सहर पिन्सी जिन्माहेन्से एनीगदेसे थे सहरला जम्मान ह्रेम्फेबेगदेदा तरवारसे ताम्सी साइगो। तर थे सहरला म्रिङ्म्हेमेगदे, कोलागदे, म्हेमुइगदेदेन थेरी मुबा अर्गु जम्मान स्हेगदे एनीगदेसे ह्राङला लागिरी किन्खम्ला, एनीगदेसे शत्रुगदेला जम्मान स्हेगदे चलब लखम्ला। तिग्दा भिसम परमप्रभुसेन एनीगदेदा थे जम्मान स्हे पिन्बा हिन्ना। एनीगदेसे ह्राङला य्हुल्साग्याम थारेङ् मुबा सहरगदेदा जे चुह्रङ् लउ। तर ह्राङला ङाम्रीन मुबा म्हिगदेला सहरगदेदा चा चुह्रङ् आलउ।
तर परमप्रभु एनीगदेला परमेश्वरसे एनीगदेदा पिन्बारी छ्याइबा य्हुल्सा एनीगदेसे ह्राङला यारी किन्माहेन्से चा एनीगदेसे थे सहरला जम्मादान साइगो। परमप्रभु एनीगदेला परमेश्वरसे एनीगदेदा कुल्बा अन्छार हित्ती, एमोरी, कनानी, परिज्जी, हिव्वीदेन यबूसीगदेदा पूरन नाश लउ। थेनीगदेदा नाश आलनी भिसम थेनीगदेसे ह्राङला लागदेला पूजा लबा ह्रङ्बा जम्मान खाल्ला नाइबा ताम एनीगदेदा लोप्ला, ओच्छे एनीगदेसे परमप्रभु एनीगदेला परमेश्वरला बिरोध लसी पाप लला।
एनीगदेसे खजिबै सहरदा ह्राङला यारी किन्बा सेम लसी थे सहरदा ल्हानान धिनीधोना गुङ्री झाङ्सी थान्तोःसैनोन थेरी मुबा रो रोबा दोङगदे आथागो, थे दोङरी रोबा रोगदे चउ। तर दोङगदे चा नाश आलउ। तिग्दा भिसम दोङगदे चा एनीगदेला शत्रु आहिन। तर रो रोबा दोङ आहिन्बा चिम भिसी था याङ्माहेन्से जे एनीगदेसे थे दोङगदे थागो। एनीगदेसे थे सहर ह्राङला यारी आकिन्देधोना थे दोङगदे थासी लडाइ लबारी नोबा नोबा ग्लागदे स्होखम्ला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.