Eastern Tamang Language Bible
ठिम 25
चुदे म्हि न्हीला गुङ्री छेबा बङ्बा तजी भिसम थे न्हीदा निसाफ लबा ग्लारी भोर्गो। ओच्छे निसाफ लबा म्हिगदेसे चा तिगै गल्ती आरेबा म्हिदा ख्लासी पिन्गै, ओच्छे गल्ती मुबा म्हिदा चा सजाय पिन्गै। गल्ती मुबा म्हिदा तोबाला सजाय पिन्तोःबा हिन्सम निसाफ लबा म्हिगदेसे थे गल्ती मुबा म्हिदा ख्लुप लसी कोर्रासे तोपुङ्गो। थेदा गादे कोर्रा तोबा भिबा ताम चा थेसे लबा गल्ती अन्छार तला। तर थे म्हिदा बोगल न्हीरेम भन्दा ल्हानारेम कोर्रासे आतोउ। कोर्रासे थे भन्दा ल्हानारेम तोजी भिसम जम्मान म्हिगदेला ओन्छाङ्री थेला बेइज्जत तला।
दाइँ लबा घ्लाबला सुङ्री बोर आक्वान्गो।
ज्योज्यो सिमा आलेसे लतोःबा गे
दिम गिकलान ज्योज्यो आले न्हङ्री ज्योज्यो चा झा आतमन सिजी भिसम थे ज्योज्योला म्रिङदा अर्गु वंशला म्हिदेन छ्याम ब्याह लसी आपिन्गो। सिबा म्हिला आलेसेन थे म्रिङ्म्हेमेदा ब्याह लगै। सिबा म्हिला आलेसे चाङला लागिरी लतोःबा गे चा चुनोन हिन्ना। थे न्हीग्याम न्हबा थेबा झा चा सिबा ज्योज्योला झा दोला। चुह्रङ् लसी सिबा ज्योज्योला वंशला मिन इस्राएलीगदेला गुङ्री सदन चिला।
तर सिबा म्हिला आलेसे ह्राङला चाङदेन छ्याम ब्याह लबारी आम्हाइनी भिसम सहरला मूल म्रापरी गन्बागदे मुबा ग्लारी निसी चाङसे चुह्रङ् भिसी पाङ्गै, “ङाला ह्रेम्बोला आलेसे ज्योज्यो सिमाहेन्से आलेसे लतोःबा व्यवहार आलनी। ओच्छे इस्राएलीगदेला गुङ्री थेसे ह्राङला ज्योज्योला वंशला मिन थान्बारी आङ्यन्नी।”1 जमाहेन्से गन्बागदेसे थे सिबा म्हिला आलेदा ङ्योइसी ताम लगै, तसैनोन थेसे “ङाइ चुदा ब्याह लनोन आल” भिसी ह्राङला डिपी लबाला लबान लजी भिसम, थेदा चाङसे थेलान काङग्याम चप्पल गिक स्युसी गन्बागदेलान ओन्छाङ्री थेला लीरी थो स्वागै। ओच्छे “जुन म्हिसे ज्योज्योला वंशला मिन थान्बारी आम्हाइ थेदा चुह्रङ्नोन लला” भिसी पाङ्गै। जमाहेन्से इस्राएलरी थे म्हिला वंशदा “चप्पल ब्यन्बा म्हिला वंश” भिसी पाङ्ला।
अर्गु ठिमगदे
ह्रेम्फेबे न्ही छेबान लबा धुइरी गिकला म्रिङ चा ह्राङला ह्रेम्बोदा ह्रो लबारी खसी अर्गु ह्रेम्फेबेला आतोःबा ग्लारी चुङ्सी न्हेप्जी भिसम, एनीगदेसे थे म्रिङ्म्हेमेला या थासी पिन्गो, थेदा दया लनोन आलउ।
एनीगदेसे क्योइबाला लागिरी ढिक्बादेन आढिक्बा थरी न्हीला ढकगदे आथान्गो।2 ओच्छे एनीगदेसे ह्राङला दिमरीएनोन दप्बाला लागिरी जजादेन घ्रेन थरी न्हीला फामदेन माना आथान्गो। तर एनीगदेसे ज्यना लसी क्योइबारीदेन दप्बाला लागिरी ठीक ढक, फामदेन माना थान्गो। चुह्रङ् लजी भिसम परमप्रभु एनीगदेला परमेश्वरसे एनीगदेदा पिन्बारी छ्याइबा य्हुल्सारी एनीगदेला छे ह्रेङ्ला। ठगब लबादेन बेइमान गे लबा म्हिदा परमप्रभु एनीगदेला परमेश्वरसे हेला लमुला।
अमालेकीगदेदा साइगो भिसी कुल्बा
एनीगदे मिश्र य्हुल्साग्याम थोन्सी खबान लबा धुइरी एनीगदेदा अमालेकीगदेसे तिग लबा मुबा थे ताम ढन्गो।3 थे धुइरी एनीगदे ब्लप्सी भ्रनोन आखम्बा धुइरी थेनीगदेसे भ्रबारी आखम्ना लिच्छा तबागदे जम्मादान स्याप्सी साइबा मुबा। थेनीगदे जजाकी सुत्तै परमेश्वरदेन छ्याम आलोङ्नी। च्यागो, एनीगदेसे चु ताम खाइमै आम्लेःगो। परमप्रभु एनीगदेला परमेश्वरसे एनीगदेदा पिन्बारी छ्याइबा य्हुल्सारी शत्रुगदेदेन छ्याम लडाइ लआतोःना ढुक्क तसी चिम्याङ्माहेन्से एनीगदेसे जम्बुलिङग्याम अमालेकीगदेला मिननोन म्हाना लउ।
Source notes (3)
- Cross-reference रूथ ४:७-८
- Cross-reference लेवी १९:३५-३६
- Cross-reference थोन्बा १७:८-१४; १ शमू १५:२-९
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.