Eastern Tamang Language Bible
ठिम 17
एनीगदेसे परमप्रभु एनीगदेला परमेश्वरला लागिरी तिगै दाग मुबा बहरदेन ग्यु बलि आफुल्गो। तिग्दा भिसम थे चा परमप्रभुला लागिरी नाइबा खबा स्हे हिन्ना।
अर्गु लागदेला पूजा आलउ
परमप्रभु एनीगदेला परमेश्वरसे एनीगदेदा पिन्बा खजिबै सहररी चिबा खालै ह्रेम्फेबेदेन म्रिङ्म्हेमेसे अर्गु लागदेदा, लनी, धिनीदेन सार सुक्रगदेदा पूजा लसी परमप्रभु एनीगदेला परमेश्वरसे एनीगदेदेन छ्याम लबा कबुल म्लेःसी, परमप्रभुला ओन्छाङ्री नाइबा गे लबा ताम एनीगदेसे था याङ्जी भिसम1 एनीगदेसे थेला बारेरी ज्यना लसी घोउ। चुदे इस्राएलरी थेह्रङ्बा नाइबा खबा गे लबा ताम सत्य हिन्ना भिसम, थेह्रङ्बा नाइबा खबा गे लबा म्हिदा चा सहरला मूल म्रापग्याम मङ्ग्यार भोर्सी युङ्बासे छेक्सी साइगो। तसैनोन थे म्हिला बारेरी म्हेन्दो न्हीसे अथवा सोमसे साक्षी पिन्माहेन्से जे साइगो। साक्षी गिकला जे ताम ङ्यन्सी थेदा आसाइगो।2 थेह्रङ्बा म्हिदा जम्मान भन्दा ङाच्छा साक्षीगदेसेन युङ्बासे छेक्गै। जमाहेन्से जे थेदा अर्गु म्हिगदेसे युङ्बासे छेक्गै, चुह्रङ् लसी एनीगदेसे ह्राङला गुङ्ग्याम नाइबा तामदा नाश लउ।
मुद्दा च्यासी निसाफ लबा
तोबा छेक्बा, म्हि साइबादेन अर्गु खजिबै खाल्ला मुद्दा एनीगदेला सहरला निसाफ लबा म्हिदा निसाफ लबारी गाह्रो तजी भिसम, एनीगदे परमप्रभु एनीगदेला परमेश्वरसे ह्राङला जयजयकार लबारी धम्बा ग्लारी निउ। ओच्छे थेरी लेवी वशंला पूजाहारीदेन थे धुइला निसाफ लबा म्हि मुबा ग्लारी निसी मुद्दा युगो। ओच्छे थेनीगदेसे थे मुद्दा निसाफ लसी पिन्गै। परमप्रभुसे धम्बा ग्लारी थेनीगदेसे निसाफ लसी पिन्माहेन्से एनीगदेसे चा थेनीगदेसे पाङ्बा अन्छार गे लउ। थेनीगदेसे लोप्बा ठिमदेन थेनीगदेसे लबा निसाफ अन्छार थेनीगदेसे एनीगदेदा कुल्बा ताम गिकएनोन आख्लान गे लउ। जुन म्हिसे घमण्ड लसी परमप्रभु एनीगदेला परमेश्वरला गे लबा लेवी वंशला म्हिदेन निसाफ लबा म्हिला तामदा वास्ता आल, थेह्रङ्बा म्हिदा एनीगदेसे साइगो, चुह्रङ् लसी एनीगदेसे नाइबा तामदा इस्राएलग्याम नाश लउ। जमाहेन्से थे ताम थेःसी जम्मान म्हि लोङ्ला ओच्छे दोःसी थेह्रङ्बा गे लबारी खालैसेन आँट आल।
य्हुल्साला बारेरी कुल्बा तामगदे
एनीगदेदा परमप्रभु एनीगदेला परमेश्वरसे पिन्बा य्हुल्सारी दोसी थे य्हुल्सारी चिबारी छ्याइमाहेन्से एनीगदेसे “य्हाङला क्यारक्युर मुबा जम्मान य्हुल्ला म्हिगदेसे ह्रङ्नोन लसी य्हाङसेनोन य्हाङथोरी शासन लबा ग्ले गिक धम्गे” भिसी पाङ्जी भिसम,3 परमप्रभु एनीगदेला परमेश्वरसे जुन म्हिदा धम्ला थेदान ग्ले हिन्ना भिसी पक्का लउ। ग्ले दोबा म्हि चा एनीगदेलान ज्योज्यो आले न्हङ्ला गिक ततोःला, एनीगदेसे खजिबै विदेशीदा ह्राङला ग्ले आस्होउ। ग्लेसे ह्राङला सिपाहीगदेला लागिरी तागदे ल्हानान आथान्गै, ओच्छे ता ग्लुबारी मिश्र य्हुल्सारी म्हि आपुइगै। तिग्दा भिसम थेरी दोःसी आनिउ भिसी परमप्रभुसे थेनीगदेदा सुङ्बा मुला।4 ग्लेसे ल्हानान म्रिङ्म्हेमेदेन छ्याम ब्याह लबारी आत। तिग्दा भिसम थेनीगदेसे थेदा परमेश्वरग्याम थारेङ् तना लला, ओच्छे थेसे ह्राङला लागिरी ल्हानान म्हार म्हुइएनोन पोप आलगै।5 ग्ले दोमाहेन्से थे लेवी वंशला पूजाहारीदेन छ्याम मुबा ठिमला नकल गिक स्होसी ह्राङदेन छ्याम थान्गै। थे ठिमला किताबरी मुबा जम्मान तामगदे अन्छार होशियार तसी भ्रबाला लागिरी थेसे थे किताब ह्राङदेन छ्याम थान्गै, ओच्छे सोदेधोना थेसे ठिमला किताब पढब लसी परमप्रभु ह्राङला परमेश्वरदा मान लबारी लोप्गै। थे ठिमला किताबसे थेदा अर्गु इस्राएलीगदे भन्दा ह्राङ ज्यबा मुला भिसी खेन्आपुङ्, ओच्छे परमप्रभुसे कुल्बा अन्छार भ्रबारी लोप्ला। जमाहेन्से थेसे ल्हानान दिङ्धोना शासन लला, ओच्छे थेला सन्तानसे पुस्ता पुस्ताधोना इस्राएलथोरी शासन लला।
Source notes (5)
- Cross-reference थोन्बा २२:२०
- Cross-reference झ्याबा ३५:३०; ठिम १९:१५
- Cross-reference १ शमू ८:५
- Cross-reference १ ग्ले १०:२८; २ काइ १:१६; ९:२८
- Cross-reference १ ग्ले १०:१४-२२,२७; ११:१-८; २ काइ १:१५; ९:२७
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.