Eastern Tamang Language Bible
ठिम 23
इस्राएली य्हुलग्याम तेःतोःबा म्हि
खालै ह्रेम्बोकोलाला च्याम स्योर्बा स्हे न्हेप्जी भिसैनोन, थाजी भिसैनोन, थेह्रङ्बा म्हि चा परमप्रभुला म्हिगदेला गुङ्री चिआम्याङ्।
अर्गुदेन छ्याम ब्रेल्सी न्हबा कोलागदे चा परमप्रभुला म्हिगदेला गुङ्री चिआम्याङ्। थेह्रङ् लसी न्हबा म्हिला पुस्ता च्युइधोनाला सन्तानगदे खालैनोन परमप्रभुला म्हिगदेला गुङ्री चिआम्याङ्।
अम्मोनी य्हुल्ला म्हिगदेदेन मोआबी य्हुल्ला म्हिगदे परमप्रभुला म्हिगदेला गुङ्री चिआम्याङ्। थेनीगदेला पुस्ता च्युइधोनाला खजिबै सन्तान परमप्रभुला म्हिगदेला गुङ्री चिआम्याङ्।1 तिग्दा भिसम एनीगदे मिश्र य्हुल्साग्याम थोन्सी खबा धुइरी थेनीगदेसे एनीगदेदा चबा थुङ्बा आपिन्नी। ओच्छे थेनीगदेसे अराम-नाहारैम भिबा ग्लाला पतोर सहररी चिबा बओरला झा बालामदा टाङ्गा पिन्सी एनीगदेदा केःबाला लागिरी ङ्योइबा मुबा।2 तसैनोन परमप्रभु एनीगदेला परमेश्वरसे बालामला ताम आङ्यन्नी, बरू थेसे केःबा तामदा परमप्रभुसे मोलम दोना लजी। तिग्दा भिसम परमप्रभुसे एनीगदेदा माया लमुला। 3 सोदेधोना एनीगदेसे अम्मोनीदेन मोआबीगदेदा ह्रो आलउ। ओच्छे थेनीगदेदेन छ्याम ढिक्सी चिबा गेएनोन आलउ।
एनीगदेसे एदोमीगदे न्हङ्ला खालैदान हेला आलउ, तिग्दा भिसम थेनीगदे चा एनीगदेला ज्योज्यो आले हिन्ना। ओच्छे एनीगदेसे मिश्रीगदे न्हङ्ला खालैदान हेला आलउ। तिग्दा भिसम खजिबै धुइरी एनीगदे थेनीगदेला य्हुल्सारी परदेशी दोसी चिबा मुबा। पुस्ता सोम तमाहेन्से थेनीगदेला सन्तानगदे परमप्रभुला म्हिगदेला गुङ्री चिम्याङ्ला।
सिपाहीगदे चिबा पालगदे शुद्ध लबा ठिम
एनीगदे ह्राङला शत्रुगदेदेन छ्याम लडाइ लबारी निबा धुइरी ह्राङ ह्राङला पालरी चिमा अशुद्ध तना लबा जम्मान तामग्याम जोगब तसी चिउ। म्हुनङ् म्हेर्बा धुइरी स्वप्न-दोष तसी खजिबै सिपाही अशुद्ध तजी भिसम थे सिपाही पालगदे फ्रेङ्सी चिबा ग्लाग्याम मङ्ग्यार निसी चिगै। थे सिपाही धिनी घल्माहेन्से नुहाब लसी पालगदे फ्रेङ्सी चिबा ग्लारी खबारी खम्ला।
पालगदे फ्रेङ्सी चिबा ग्लाला मङ्ग्यारपट्टि एनीगदेसे क्लि च्याम स्योर्बा ग्ला तोगब लउ। एनीगदेसे ह्राङ ह्राङला हतियारगदेदेन छ्यामनोन व्हाङ् ख्वबा स्हेएनोन थान्गो। ओच्छे ल्कि स्योर्बा धुइरी व्हाङ् ख्वसी ल्हुउ। तिग्दा भिसम परमप्रभु एनीगदेला परमेश्वर एनीगदेदा जोगब लबारीदेन शत्रुगदेथोरी एनीगदेदा ढाना लबाला लागिरी एनीगदेसे पालगदे फ्रेङ्सी चिबा ग्लागदेरी परमप्रभु एनीगदेदेन छ्यामनोन धन्छ्याबा मुला। थेतबासेलमा एनीगदेसे पालगदे फ्रेङ्सी चिबा ग्ला चोखो थान्गो। तिग्दा भिसम परमप्रभुसे एनीगदेला गुङ्री खजिबै खाल्ला फोहोर स्हेगदे म्राङ्आतोःगै। चुदे म्राङ्जी भिसम परमप्रभुसे एनीगदेदा ख्लासी फेप्ला।
थरीथरीला ठिमगदे
खालै म्हिला घ्याबा ह्राङला ज्यान जोगब लबाला लागिरी मालिकला दिमग्याम य्हार्सी एनीगदे मुबा ग्लारी खजी भिसम थेदा मालिकला यारी जिम्मा आपिन्गो। थेदा सेम निबा एनीगदेला सहरला खजिबै ग्लारी एनीगदेसे थेदा चिबारी ग्ला पिन्गो। ओच्छे एनीगदेसे थेदा आज्यबा व्यवहार आलउ।
ह्रेम्फेबे तसै म्रिङ्म्हेमे तसै खजिबै इस्राएलीगदे न्हङ्ला खालैनोन मन्दिररी चिबा वेश्या आदोगो।4 ओच्छे भाकल पूरा लबाला लागिरी वेश्या गे लसी स्होबा टाङ्गा परमप्रभु एनीगदेला परमेश्वरला दिमरी आभउ। तिग्दा भिसम परमप्रभु एनीगदेला परमेश्वरसे थेह्रङ् लसी स्होबा टाङ्गादेन वेश्या न्हीदान हेला लमुला।
एनीगदेसे ह्राङलान इस्राएली ज्योज्यो आलेगदेदा टाङ्गा, चबा स्हे ओच्छे जुन स्हे पिन्सैनोन थेनीगदेग्याम ब्याज आकिन्गो।5 एनीगदेसे अर्गु य्हुल्ला म्हिगदेग्याम चा ब्याज किन्खम्ला। तर ह्राङलान इस्राएली ज्योज्यो आलेगदेग्याम चा ब्याज आकिन्गो। तिग्दा भिसम एनीगदेसे शासन लबारी छ्याइबा य्हुल्सारी एनीगदेसे लबा जम्मान गेरी एनीगदेदा परमप्रभु एनीगदेला परमेश्वरसे मोलम पिन्गै।
एनीगदेसे परमप्रभु एनीगदेला परमेश्वरदेन छ्याम लबा खजिबै भाकल पूरा लबाला लागिरी घाइना आलउ। तिग्दा भिसम एनीगदेसे ह्राङसे लबा भाकल योनान पूरा लगै भिबा परमप्रभुला सेम मुला। चुदे भाकल पूरा आलनी भिसम एनीगदेदा पाप लगब तला।6 परमप्रभुदेन छ्याम भाकल आलबा चा पाप आहिन। तर एनीगदेसे लबा भाकल चा पूरा लनोन तोःला। तिग्दा भिसम थे भाकल चा एनीगदेसे सेमहेन्सेन ताङ्सी परमप्रभु एनीगदेला परमेश्वरदेन छ्याम लबा भाकल हिन्ना।
चुदे ए खालै म्हिला अङ्गुर व्हाराग्याम तबान निजी भिसम थे धुइरी एसे चइ म्हन्दे अङ्गुर थुसी चखम्ला। तर एसे थुसी थेग्याम आभोर्गो। चुदे ए खालै म्हिला भु व्हाराग्याम तबान निमा थेरी मुबा अन्न यासे थुखम्ला, तर हङ्सुसे चा आखन्गो।
Source notes (6)
- Cross-reference नहे १३:१-२
- Cross-reference झ्याबा २२:१-६
- Cross-reference झ्याबा २३:७-२४:९
- Cross-reference लेवी १९:२९
- Cross-reference थोन्बा २२:२५; लेवी २५:३६-३७; ठिम १५:७-११
- Cross-reference झ्याबा ३०:१-१६
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.