Eastern Tamang Language Bible
ठिम 27
युङ्बाला पाटिरी भ्रिबा ठिम
मोशादेन इस्राएलला गन्बागदेसे म्हिगदेदा चुह्रङ् भिसी पाङ्जी, “तिनी ङाइ कुल्बा जम्मान ताम अन्छार एनीगदे भ्रउ। यर्दन स्योङ् चेसी एनीगदे परमप्रभु एनीगदेला परमेश्वरसे पिन्बारी छ्याइबा य्हुल्सारी वाङ्माहेन्से एनीगदेसे थेरी घ्रेन घ्रेन युङ्बा ठाडो लसी क्यासी तार साप्रासे च्युर्गो।1 एनीगदेला आखेम्हेमेला परमप्रभु परमेश्वरसे कबुल लबा अन्छार एनीगदे परमप्रभु ह्राङला परमेश्वरसे पिन्बा ङ्हेदेन सिङ्सुरला खुदु भ्योङ्बा य्हुल्सारी वाङ्माहेन्से चु जम्मान ठिमदेन एनीगदेदा कुल्बा तामगदे थे युङ्बारी भ्रिउ। यर्दन स्योङ् चेसी एनीगदे क्याम्सङ् दोमाकुनु तिनी ङाइ एनीगदेदा पाङ्बा ह्रङ्नोन लसी एबाल गङ्री थे युङ्बागदे ठाडो लसी क्यासी तार साप्रासे च्युर्गो। एनीगदेसे थेनोन ग्लारी परमप्रभु ह्राङला परमेश्वरला लागिरी बलि फुल्बारी युङ्बासे बलि फुल्बा ग्ला स्होउ। थे बलि फुल्बा ग्ला स्होमा एनीगदेसे फाइला खजिबै सामान चलब आलउ।2 एनीगदेसे परमप्रभु ह्राङला परमेश्वरला लागिरी बलि फुल्बा ग्ला स्होमा भुला युङ्बाग्याम स्होउ। ओच्छे एनीगदेसे थेरी परमप्रभु ह्राङला परमेश्वरला लागिरी मेरी ख्राङ्सी फुल्बा बलि फुल्गो। एनीगदेसे थेरी ढिक्ना लबा बलि फुल्सी थेरीन चउ, ओच्छे एनीगदे परमप्रभु ह्राङला परमेश्वरला ङाच्छापट्टि ताङ्गो। ओच्छे एनीगदेसे ठाडो लसी क्यासी तार साप्रासे च्युर्बा थे युङ्बागदेरी चु ठिमगदे ज्यना लसी भ्रिउ।”
जमाहेन्से लेवी वंशला पूजाहारीगदेदेन मोशासे इस्राएलीगदे जम्मानदान चुह्रङ् भिसी पाङ्जी, “इस्राएलीगदे ङाला ताम ज्यना लसी ङ्यन्गो। एनीगदे तिनी परमप्रभु ह्राङला परमेश्वरला म्हि दोबा मुला। थेतबासेलमा तिनी ङाइ एनीगदेदा कुल्बा अन्छार परमप्रभु एनीगदेला परमेश्वरसे कुल्बा तामदेन ठिम अन्छार एनीगदे भ्रउ।”
कुल्बा ताम अन्छार आभ्रबा म्हिगदेसे याङ्बा सराप
थेनोन धिनकुनु मोशासे म्हिगदेदा चुह्रङ् भिसी कुल्जी, “एनीगदेसे यर्दन स्योङ् चेमाहेन्से शिमियोन, लेवी, यहूदा, इस्साखार, योसेफदेन बेन्यामीन वंशला म्हिगदे चा म्हिगदेदा मोलम पिन्बाला लागिरी गीरीज्जीम गङ्री राप्गो।3 ओच्छे रूबेन, गाद, आशेर, जबूलून, दानदेन नप्ताली वंशला म्हिगदे चा सराप पिन्बाला लागिरी एबाल गङ्री राप्गो। जमाहेन्से लेवीगदेसे चा घ्रेन काइ तेःसी चुह्रङ् भिसी पाङ्गै।
“जुन म्हिसे युङ्बादेन सिङ ठ्वाइसी ओच्छे मेरी ङ्युना लसी मूर्ति स्होसी लासी लासी पूजा लला, थे म्हिसे परमेश्वरग्याम सराप याङ्गै। तिग्दा भिसम थे गे चा परमप्रभुला लागिरी नाइबा खबा ताम हिन्ना।”4
जमाहेन्से जम्मान म्हिसे “आमेन5” भिसी पाङ्गै।
“ह्राङला आबा आमाला बेइज्जत लबा म्हिसे परमेश्वरग्याम सराप याङ्गै।”6
जमाहेन्से जम्मान म्हिसे “आमेन” भिसी पाङ्गै।
“ह्राङला खिम्जेमला भु व्हाराला साँधरी थान्बा युङ्बा ल्हेबा म्हिसे परमेश्वरग्याम सराप याङ्गै।”7
जमाहेन्से जम्मान म्हिसे “आमेन” भिसी पाङ्गै।
“मी आम्राङ्बा म्हिदा क्यालोपट्टि ग्याम उन्बा म्हिसे परमेश्वरग्याम सराप याङ्गै।”8
जमाहेन्से जम्मान म्हिसे “आमेन” भिसी पाङ्गै।
“परदेशी, टुहुरा-टुहुरीदेन ह्रेम्बो सिबा म्रिङ्म्हेमेसे याङ्तोःबा हक आपिन्बा म्हिसे परमेश्वरग्याम सराप याङ्गै।9”
जमाहेन्से जम्मान म्हिसे “आमेन” भिसी पाङ्गै।
“ह्राङला आबाला च्याङ्बास्यादेन छ्याम ब्रेल्बा म्हिसे परमेश्वरग्याम सराप याङ्गै। तिग्दा भिसम थेसे ह्राङलान आबाला बेइज्जत लबा मुला।”10
जमाहेन्से जम्मान म्हिसे “आमेन” भिसी पाङ्गै।
“जन्तुदेन छ्याम ब्रेल्बा म्हिसे परमेश्वरग्याम सराप याङ्गै।”11
जमाहेन्से जम्मान म्हिसे “आमेन” भिसी पाङ्गै।
“ह्राङलान आङा ओच्छे झड्केलो आङादेन छ्याम ब्रेल्बा म्हिसे परमेश्वरग्याम सराप याङ्गै।”12
जमाहेन्से जम्मान म्हिसे “आमेन” भिसी पाङ्गै।
“ह्राङला स्युमीदेन छ्याम ब्रेल्बा म्हिसे परमेश्वरग्याम सराप याङ्गै।”13
जमाहेन्से जम्मान म्हिसे “आमेन” भिसी पाङ्गै।
“खालैसेन था आयाङ्ना लसी ह्राङलान खिम्जेमदा साइबा म्हिसे परमेश्वरग्याम सराप याङ्गै।”
जमाहेन्से जम्मान म्हिसे “आमेन” भिसी पाङ्गै।
“तिगै गल्ती आरेबा म्हिदा साइबाला लागिरी घूस किन्बा म्हिसे परमेश्वरग्याम सराप याङ्गै।”
जमाहेन्से जम्मान म्हिसे “आमेन” भिसी पाङ्गै।
“परमेश्वरला चु जम्मान ठिम अन्छार आभ्रबा म्हिसे परमेश्वरग्याम सराप याङ्गै।”
जमाहेन्से जम्मान म्हिसे “आमेन” भिसी पाङ्गै।
Source notes (13)
- Cross-reference यहो ८:३०-३२
- Cross-reference थोन्बा २०:२५
- Cross-reference ठिम ११:२९; यहो ८:३३-३५
- Cross-reference थोन्बा २०:४; ३४:१७; लेवी १९:४; २६:१; ठिम ४:१५-१८; ५:८
- Footnote आमेन भिबा चा चुह्रङ्बान तगै भिबा हिन्ना।
- Cross-reference थोन्बा २०:१२; ठिम ५:१६
- Cross-reference ठिम १९:१४
- Cross-reference लेवी १९:४
- Cross-reference थोन्बा २२:२१; २३:९; लेवी १९:३३-३४; ठिम २४:१७-१८
- Cross-reference लेवी १८:८; २०:११; ठिम २२:३०
- Cross-reference थोन्बा २२:१९; लेवी १८:२३; २०:१५
- Cross-reference लेवी १८:९; २०:१७
- Cross-reference लेवी १८:१७; २०:१४
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.