Eastern Tamang Language Bible
ठिम 6
मोशासे कुल्बा ताम
परमप्रभु एनीगदेला परमेश्वरसे एनीगदेदा लोप्गो भिसी ङादा पिन्बा थेसे कुल्बा तामदेन ठिम चुनोन हिन्ना। यर्दन स्योङ् क्याम्सङ् निसी एनीगदेसे ह्राङला यारी किन्बारी छ्याइबा य्हुल्सारी एनीगदे परमेश्वरसे कुल्बा चुनोन तामदेन ठिम अन्छार भ्रउ। सोदेधोना एनीगदेदेन एनीगदेला झा झामे ओच्छे छाया छुयासे परमप्रभु एनीगदेला परमेश्वरदा मान लउ। ओच्छे एनीगदेदेन एनीगदेला झा झामे ओच्छे छाया छुयागदे सदन परमप्रभुसे कुल्बा जम्मान तामदेन ठिम अन्छार भ्रउ। जमाहेन्से थे य्हुल्सारी एनीगदेला छे ह्रेङ्ला। इस्राएलला म्हिगदे, एनीगदे सदन चु ठिम अन्छार भ्रउ। जमाहेन्से परमप्रभु एनीगदेला आखेम्हेमेला परमेश्वरसे एनीगदेदेन छ्याम कबुल लबा ह्रङ्नोन ङ्हेदेन सिङ्सुरला खुदु ब्योङ्बा य्हुल्सारी एनीगदेदा जम्मान तामरी ज्यबा तला ओच्छे एनीगदे शक्तिशाली य्हुल्ला म्हि दोला।
इस्राएलीगदे, ङ्यन्गो, परमप्रभु गिक जे य्हाङला परमेश्वर हिन्ना। एनीगदेसे परमप्रभु ह्राङला परमेश्वरदा जम्मान सेमसे, जम्मान प्राणसे, जम्मान शक्तिसे माया लउ। तिनी ङाइ एनीगदेदा पाङ्बा परमेश्वरसे कुल्बा चु तामगदे एनीगदेसे सदन ह्राङला सेम न्हङ्री थान्गो।1 ओच्छे एनीगदेसे सदन ह्राङला झा झामेगदेदा ज्यना लसी लोप्गो। एनीगदे दिमरी चिबा धुइरीनोन, ग्यामरी भ्रबा धुइरीनोन, स्योन तसी चिबा धुइरीनोन, रेःबा धुइरीनोन परमेश्वरसे कुल्बा चु तामला बारेरी सदन ताम लउ। एनीगदेसे सदन ढन्बाला लागिरी परमेश्वरसे कुल्बा थे तामगदे ह्राङला यादेन ङ्होरी खीगो। ओच्छे एनीगदेसे ह्राङला दिमला म्रापला जम्मान चौकोसदेन मूल म्रापरी भ्रिसी थान्गो।
कुल्बा ताम अन्छार आभ्रबा म्हिगदेदा होशियार तना लबा
एनीगदेला आखेम्हेमे अब्राहाम, इसहाकदेन याकूबदा परमप्रभु एनीगदेला परमेश्वरसे पिन्ना भिसी कबुल लबा अन्छार एनीगदेसे स्होनोन आस्होबा घ्रेन घ्रेनदेन धन सम्पत्तिसे प्लिङ्बा य्हुल्सा परमप्रभुसे एनीगदेदा पिन्ना।2 थेरी ज्यबा ज्यबा स्हेगदेसे प्लिङ्बा दिमगदे तला। ओच्छे एनीगदेसे ख्वनोन आख्वबा इनारगदेदेन सुनोन आसुबा अङ्गुरला दोङगदे ओच्छे जैतूनना दोङगदे तला। थेरी एनीगदेला लागिरी जम्मान स्हे तोःदेधोना मुबासेलमा मिश्र य्हुल्साग्याम एनीगदेदा जोगब लसी तेःसी भबा परमप्रभुदा आम्लेःबाला लागिरी एनीगदे सदन होशियार तसी चिउ। थे य्हुल्सारी एनीगदे घ्याबादेन घ्याबास्या दोसी चिबा मुबा।
परमप्रभु एनीगदेला परमेश्वरदा जे एनीगदेसे मान लउ, ओच्छे थेला जे मिन किन्सी गे लला भिसी कबुल लउ। ओच्छे एनीगदेला क्यारक्युर मुबा अर्गु य्हुल्ला म्हिगदेसे तेन्बा ला लुदा एनीगदेसे आतेन्गो। चुदे एनीगदेसे अर्गु लागदेदा तेन्जी भिसम एनीगदेला गुङ्री धन्छ्याबा परमप्रभु परमेश्वरला बोमो एनीगदेथोरी मे ह्रङ् लसी ल्हुला, ओच्छे एनीगदेदा जम्बुलिङग्यामनोन म्हाना लला। तिग्दा भिसम परमप्रभु एनीगदेला परमेश्वर डाह लबा परमेश्वर हिन्ना। एनीगदेसे मस्साह भिबा ग्लारी ह्रङ्नोन लसी परमप्रभु एनीगदेला परमेश्वरला सेम आच्यागो।3 ओच्छे परमप्रभु एनीगदेला परमेश्वरसे कुल्बा तामगदेदेन ठिमगदे अन्छार सदन होशियार तसी भ्रउ। परमप्रभुला ओन्छाङ्री जुन जुन ताम ठीकदेन ज्यबा मुला थे जे लउ। जमाहेन्से एनीगदेदा जम्मान तामरी ज्यबा तला। ओच्छे परमप्रभुसे पिन्ना भिसी एनीगदेला आखेम्हेमेदेन छ्याम कबुल लबा थे ज्यबा य्हुल्सा ह्राङला यारी किन्सी एनीगदेसे थेरी शासन लउ। ओच्छे परमप्रभुसे सुङ्बा ह्रङ्नोन लसी एनीगदेसे ह्राङला शत्रुगदेदा थेग्याम ताप्गो।
लिच्छा लिच्छा एनीगदेला झा झामेगदेसे “परमप्रभु य्हाङला परमेश्वरसे तिग्दा चु जम्मान ठिमगदे अन्छार भ्रउ भिसी य्हाङदा कुल्बा?” भिसी एनीगदेदा ङ्योइला। जमाहेन्से एनीगदेसे थेनीगदेदा चुह्रङ् भिसी पाङ्गो, “ङनी मिश्र य्हुल्सारी फारो ग्लेला घ्याबादेन घ्याबास्या मुबा। थेनोन धुइरी परमप्रभुसे ह्राङला शक्तिशाली छ्यासे ङन्दा मिश्र य्हुल्साग्याम तेःसी भबा मुबा। परमप्रभुसे थे धुइरी ङन्ना ओन्छाङ्रीन मिश्र य्हुल्साला म्हिगदेदेन फारो ग्ले ओच्छे थेला जम्मान सिपाहीगदेथोरी उदेकला गेदेन लोङ्बा खबा गे लबा मुबा। य्हाङला आखेम्हेमेगदेदा पिन्ना भिसी कबुल लबा य्हुल्सारी भबाला लागिरीन परमप्रभुसे ङन्दा थे य्हुल्साग्याम तेःसी भबा मुबा। जमाहेन्से चु जम्मान ठिम अन्छार भ्रउ, ओच्छे थेदा मान लउ भिसी परमप्रभु य्हाङला परमेश्वरसे य्हाङदा कुल्बा हिन्ना। सदन य्हाङसे थेसे सुङ्बा अन्छार लजी भिसम य्हाङदा सदन ज्यबा तला। ओच्छे सोदेधोना परमप्रभुसे य्हाङदा जोगब लसी थान्ना। परमप्रभुसे कुल्बा अन्छार य्हाङ सदन थेला ओन्छाङ्री चु जम्मान ठिम अन्छार होशियार तसी भ्रजी भिसम य्हाङ सदन परमेश्वरदा सेम निबा म्हि दोला।”
Source notes (3)
- Cross-reference ठिम ११:१८-२०
- Cross-reference ठुङ् १२:७; २६:३; २८:१३
- Cross-reference थोन्बा १७:१-७
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.