रोमी

रोमी

रोम देशे विश्वासी टोली लै च़िठी

भेत

लिखणैं आल़अ: पल़सी

पहल़णैं आल़ै: रोम देशे रहणैं आल़ै विश्वासी

सन: 56

रोम रहणैं आल़ै विश्वासीए नाओंए लिखी दी पल़सी शधाणूंए ऐहा च़िठीओ मकसद त इहअ कि रोम देशे विश्वासीए टोली सेटा डेऊणा लै बात निखल़े, ज़ुंण गल्‍ल पल़सी पैहलै ई ती डाही दी सोठी। तेऊए सोठ ती एही कि थोल़ै धैल़ै करनअ त तेऊ तिधे मसीहे विश्वासी संघै रही काम, तेखअ डेऊणअ त तेऊ तिन्‍नें मज़त करनै करै स्पेन देशा लै। पल़सी लिखी अह च़िठी मसीही विश्वासे आपणैं ज्ञैन अर मसीही विश्वासीए ज़िन्दगी अर बभारा दी मलाबट समझ़णें तैणीं। ऐहा कताबा दी भेटा हाम्हां पल़सीए समादो एक-एक करी बाढै पूरअ हाल।

रोम देशे टोलीए लोगो अदर करी अर तिन्‍नां लै आपणीं प्राथणां करने बारै खोज़णैं का बाद खोज़ा पल़सी ऐहा च़िठीए मूल़ मतलबे बारै “एऊ खुशीए समादा करै बणाआं परमेशर हाम्हां आप्पू संघै धर्मीं; अह हआ शुरू का खिरी तैणीं विश्वासा करै।”

पल़सी समझ़ाऊआ आजू खास गल्‍ला बाढै। पूरी मणछ ज़ाती, यहूदी अर होरी ज़ाती आसा दुही परमेशरा संघै मेल़-ज़ोल़ करने ज़रुरत। किल्हैकि सोभ आसा एक बराबर पापे गलाम। ईशू मसीहा दी विश्वासा करै ई हआ परमेशरा संघै मेल़-ज़ोल़। तेखअ खोज़ा पल़सी मसीहा संघै नऊंईं ज़िन्दगीए बारै ज़ुंण परमेशरा संघै एऊ नऊंऐं रिश्तै करै भेटा। विश्वासीओ हआ परमेशरा संघै मेल़-ज़ोल़ अर परमेशरो आत्मां दैआ तेऊ लै पाप अर मौते गलामी का आज़ादी। 5-8 दी करा पल़सी विश्वासीए ज़िन्दगी दी परमेशरे बधानो मकसद अर परमेशरे आत्में शगती प्रैंदै बच़ार। तेखअ जुझिया शधाणूं एऊ सुआला दी कि पूरी मणछ ज़ाती लै परमेशरे सोठ यहूदी अर होरी ज़ाती दी ठीक-ठाक किहअ करै बेशा। तेऊओ निखल़ा एतो अह नचोल़ कि यहूदी मणछो ईशू नांईं मनणअ बी आसा परमेशरे तेऊ इंतज़ामो एक भाग ज़ुंण पूरी मणछ ज़ाती ईशू मसीहा दी परमेशरे झींणा भितरी आणना लै बणाईं, अर तेऊओ विश्वास आसा इहअ बी कि यहूदी निं सदा च़ाल्‍लै इहै रही कि तिंयां ईशू नांईं मने। खिरी लिखा पल़सी इहअ कि मसीही ज़िन्दगी केही लागा ज़िऊंणीं, खासकर दुजै संघै झ़ूरी डाहंदी। सह लआ इना च़िज़ा परमेशरे च़ाकरी, राज़, अर एकी दुजे बारै मसीही विश्वासीए ज़िम्मैंबारी अर सोर-समझ़े सुआले रुपै। खिरी करा पल़सी ऐहा च़िठी आपणैं समादा दैई परमेशरे स्तोती करी खतम।

पल़सी फरेऊआ ऐहा च़िठी दी आपणैं पहल़णैं आल़ै आद, “सोभी आसा पाप किअ द अर परमेशरे प्रतप्पा का आसा सोभै दूर।” पर हाम्हैं किहअ करै बणाऐं इहै कि परमेशर हाम्हां मने? अह ई आसा सह खास सुआल ज़ेतो पल़सी ऐहा च़िठी दी ज़बाब दैआ। सह करा ऐहा गल्‍ला खोज़दी शुरूआत कि हाम्हैं सोभै किहअ करै निं तेही ज़िन्दगी ज़िऊई सकै ज़ेही परमेशर च़ाहा त। यहूदी निं परमेशरो बधान तिहअ मनअ ज़िहअ लोल़ी त! अर तिन्‍नां का लाऊआ होरी ज़ातीए लोग निं परमेशरे बारै सोठदै बी आथी, ज़ै कि परमेशर रहअ तिन्‍नां लै कई साबै बोल्दअ बी लागी।

“हाम्हैं परमेशरै धर्मीं किहअ करै बणाऐं; एते बारै आसा मोसा गूरे बधाना दी अर होरी गूरे कताबा दी खास्सी साला पैहलै परमेशरै करार किई दी। हाम्हैं किअ ईशू मसीहा दी विश्वास अर एता करै बणाऐं हाम्हैं परमेशरै आप्पू संघै धर्मीं। अह गल्‍ल आसा विश्वास करनै आल़ै सोभी लै शुची किल्हैकि सोभै लोग आसा एक बराबर। किल्हैकि सोभी आसा पाप किअ द अर परमेशरे प्रतप्पा का आसा सोभै दूर। परमेशरै किई हाम्हां लै एही झींण कि म्हारै पाप करनैओ लिखअ-जोखअ पाअ मटाऊई। हाम्हैं निं एता लै किछ़ै किम्मत दैनी। मसीहा ईशू किअ अह काम हाम्हां लै छ़ुटकारै दैई पूरअ।”

(3:21-24)

कताबे बांड

भेत अर मूल़ च़ीज़ 1:1-17

मणछा लै उद्धारे ज़रुरत 1:18—3:20

उद्धारा पाणा लै परमेशरे बात 3:21—4:25

मसीहा दी नऊंईं ज़िन्दगी 5:1—8:39

इज़राईला लै परमेशरे मरज़ी 9:1—11:36

मसीही च़ाल-च़लण 12:1—15:13

नचोल़ अर आप्पू बाखा अदर 15:14—16:27