Kulvi Outer Seraji Bible
रोमी 16
राज्ज़ी-खुशी दैणीं
म्हारी विश्वासी बैहण फीबा ज़ुंण किंखिया नगरीए टोली दी दास आसा हुंह करा तम्हां का तेसे तैणीं अरज़ कि, तेसो करा तिहअ सुआगत ज़िहअ परमेशरे लोगा करनअ लागा। तैहा मनै तेही ई ज़िहै परमेशरे पबित्र मणछा मना अर तेसे मज़त बी करै ज़ेही तैहा गरज़ होए तेही। किल्हैकि तैहा बी आसा खास्सै मणछे मज़त किई दी अर मेरी बी आसा मज़त किई दी।
बैहण प्रिस्किला अर तेसे लाल़ै अकबिला, ज़ुंण ईशू मसीहे कामां लै मेरै साझ़ू आसा तिन्नां लै बी दैऐ मेरी राज्ज़ी-खुशी। तिन्नैं पाऐ तै मुंह बच़ाऊंणे तैणीं आपणैं प्राण बी खातरै दी। सिधअ हुंह निं पर होरी ज़ातीए सारी विश्वासीए टोली बी करा तिन्नों शूकर।
तैहा विश्वासीए टोली लै बी राज्ज़ी-खुशी ज़ुंण तिन्नें घअरै कठा हआ।
मेरै पैरै इपैनितुसा लै, सह थिअ एशिया मुल्खै पैहलअ मणछ ज़ुंणी मसीहा दी विश्वास किअ, तेऊ लै बी राज्ज़ी-खुशी।
मरिअमा लै बी राज्ज़ी-खुशी ज़ुंणी तम्हां लै बडी मैन्थ किई।
भाई आन्दरूनिकूस अर बैहण जूनियास ज़ुंण मेरै यहूदी टबर आसा, अर तिंयां मुंह संघै कैद बी हुऐ तै, अर शधाणूं दी आसा तिन्नों नाअं, अर मशूर शधाणूं ज़ुंणी मुखा पैहलै मसीहा दी विश्वास किअ, तिन्नां लै बी राज्ज़ी-खुशी।
अम्पलियातुसा लै ज़ुंण प्रभू दी विश्वासा करनै आल़ै मांझ़ै मेरअ सोभी का पैरअ आसा, तेऊ लै बी राज्ज़ी-खुशी।
उरबानुसा लै ज़ुंण मसीहा दी म्हारअ साथी आसा, अर मेरै पैरै सताख्या लै बी राज्ज़ी-खुशी।
अपूलोसा लै बी राज्ज़ी-खुशी ज़ुंणी मसीहा दी अह गल्ल रहैऊई कि सह किहअ खरअ मणछ आसा। अरिसतोबोलसे सारै टबरा लै बी राज्ज़ी-खुशी।
मेरै यहूदी टबर हेरोदियोना लै बी राज्ज़ी-खुशी।
नारकिसे सोभी टबरा लै ज़ुंण प्रभूए विश्वासी आसा, तिन्नां लै बी राज्ज़ी-खुशी।
तरफेना अर तरफेसा बैहणी लै ज़ुंण प्रभूए कामां दी बडी मैन्थ करा तिन्नां लै बी राज्ज़ी-खुशी।
पैरी बैहण पिरसिस लै, ज़ुंणी प्रभू दी खास्सी मैन्थ किई, तिन्नां लै बी राज्ज़ी-खुशी।
रुपस ज़ुंण प्रभू आसा छ़ांटअ द, अर तेऊए ईज ज़ुंण मुल्है बी मेरी ईजा ज़ेही आसा, तिन्नां दुही लै बी आसा मुंह बाखा राज्ज़ी-खुशी।
अंसूकिरतुस अर फिलगोन अर हिरमेस अर पत्रुवास अर हिर्मास अर तेऊ संघै सोभी विश्वासी भाई लै राज्ज़ी-खुशी।
फिलुगुस अर जूलिया अर नेरीउस अर तेऊए बैहण, अर उलुम्पास अर तेऊ संघै सोभी पबित्र लोगा लै राज्ज़ी-खुशी।
आप्पू मांझ़ै दैआ पबित्र मल़्हैची दैई राज्ज़ी-खुशी।
तम्हां सोभी लै मसीहे सारी टोली बाखा राज्ज़ी-खुशी।
खिरी चतैनगी दैणीं
ऐबै भाईओ, मेरी आसा तम्हां लै एही अरज़ कि ऐहा गल्लो डाहै धैन ज़ुंण लोग तम्हां मांझ़ै फूट पाआ अर ज़ुंण लोग तम्हां परमेशरे अदर करनै का रोक्के इना इहै लोगा का रहै दूर। ईंयां इहै लोग निं म्हारै प्रभू मसीहे आथी, तिंयां करा आपणीं देहीए च़ाहा पूरी करना लै च़ाकरी, तिंयां करा च़ोपल़ लाई गल्ला अर इहअ करै पाआ तिंयां भोल़ै लोगा कबाता।
थारै बारै आसा सोभी का थोघ कि तम्हैं मना प्रभूए हर गल्ला, तैही करा हुंह थारै बारै नंद, पर हुंह च़ाहा कि तम्हैं भलाई लै समझ़कार, अर बूराई लै रहा भोल़ै बणी। शांतीए परमेशरा जैंटणअ राख्स थारै खूरा हेठै छ़ेक्कै ई।
हुंह करा परमेशरा का अरज़ कि म्हारै प्रभू ईशूए झींण लोल़ी सदा तम्हां सोभी लै हुई।1
मेरै साथी तिमोथीओ अर मेरै यहूदी टबरो लुकियुस अर जासोन अर सोसिपत्रुसा बाखा तम्हां लै राज्ज़ी-खुशी।
मुंह संघै इधी ऐहा च़िठी लिखणैं आल़ै तिरतुसा बाखा बी तम्हां सोभी लै प्रभू दी राज्ज़ी-खुशी।
गयुस बी दैआ तम्हां लै राज्ज़ी-खुशी। हुंह आसा इधी एऊए घअरै ज़िधी सोभै विश्वासी टोली हआ कठा। इरास्तुस ज़ुंण नगरीओ भढारी आसा अर भाई कबारतुसा बाखा बी तम्हां सोभी लै राज्ज़ी-खुशी। हुंह करा एही प्राथणां कि म्हारै प्रभू ईशूए झींण लोल़ी तम्हां लै जुगै-जुगै हंदी रही।
परमेशरे स्तोती
ऐबै लोल़ी सारअ प्रतप्प तेऊ परमेशरो हुअ ज़ुंण तम्हां मज़बूत सका करी, ज़िहअ मेरअ खुशीओ समाद बोला। मसीहा ईशूए एऊ समादा करै हुई होरी ज़ातीए लोगा का अह गल्ल प्रगट कि परमेशर तिन्नां लै किज़ै च़ाहा, ज़ुंण गल्ल जुगा-जुगा ओर्ही गुप्त ती डाही दी। ज़िहअ परमेशरे गूरै पबित्र शास्त्रा दी पैहलै ई थिअ बोलअ द अर ज़िहअ परमेशरै आसा बोलअ द, ऐबै हुअ अह खुशीओ समाद होरी ज़ातीए सोभी लोगा लै प्रगट ताकि तिंयां बी विश्वास करे अर तेऊए हुकम मने।
मसीहा ईशू करै लोल़ी जुगै-जुगै तेऊ समझ़कार परमेशरे प्रतप्प हुअ। एवमस्तू।
Source notes (1)
- Cross-reference मूल. 3:15
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.