Kulvi Outer Seraji Bible
रोमी 6
पापा का छ़ुटी भेटा मसीहा दी ज़िन्दगी
तै हाम्हां किज़ै बोल़णअ? कै हाम्हां कबल्लै रहणअ पाप करदै लागी कि परमेशर हाम्हां लै होर बी खास्सअ जश दैए? इहअ निं कधि करनअ, ज़ै हाम्हैं पापा लै मरी गऐ, आजू किल्है काटणी हाम्हां कबल्लै पाप करदै रही ज़िन्दगी? तम्हां का कै थोघ निं आथी ज़ेभै हाम्हैं डुबकी दैई मसीहा ईशू संघै साझ़ू हुऐ हाम्हैं हुऐ तेऊ संघै तेऊए मौता दी साझ़ू। ज़ेभै हाम्हैं डुबकी लई, तेभै मूंऐं हाम्हैं अर मसीहा संघै डाहै दाबी। तेखअ ज़िहअ मसीहा बाब परमेशरे प्रतप्पा करै मरी करै ज़िऊंदअ हुअ, तेही ज़िऊंणीं ऐबै हाम्हां नऊंईं ज़िन्दगी।
ज़ै हाम्हैं बी डुबकी दैई ईशूए मौता दी साझ़ू आसा, हाम्हैं हणैं तेऊए ज़िऊई उझ़णै बाद बी तेऊ संघै साझ़ू। किल्हैकि हाम्हां का आसा थोघ कि म्हारअ पराणअ सभाब छ़ड़ाऊअ मसीहा ईशू संघै क्रूसा दी ताकि अह पापे देही खतम होए, अर हाम्हैं आजू लै पापे गलाम नां रहे बणी। ज़ुंण मणछ मरी गअ सह निं तेखअ पाप करने शगतीओ गलाम रहंदअ। ऐबै ज़ै हाम्हैं मसीहा संघै मूंऐं, तै आसा म्हारअ विश्वास इहअ कि हाम्हैं हणैं मसीहा संघै ज़िऊंदै बी। किल्हैकि हाम्हां का आसा थोघ कि मसीहा निं मरी करै ज़िऊंदअ हई भिई मरनअ, तेऊ प्रैंदै निं भिई मौत राज़ करी सकदी। किल्हैकि मसीहा ज़ुंण मरी गअ सह मूंअ पापा लै एकी ई बारी, पर ऐबै ज़ुंण ज़िऊंदअ आसा, सह आसा परमेशरो अदर करना लै ज़िऊंदअ। इहअ ई समझ़ा तम्हैं बी आप्पू लै पाप करने शगती लै मूंऐं दै, पर परमेशरो अदर करना लै समझ़ा मसीहा ईशू दी ज़िऊंदै।
इहअ निं हआ कि पाप करने च़ाहा थारी ज़िन्दगी दी राज़ करे। ज़िहअ थारी देही च़ाहा करनअ तिहअ निं करी। नां आपणीं देहीए आंगा कदुष्ट कामें अस्त्र-शस्त्र बणाईं पापा लै सभाल़ा, पर आप्पू दैआ आपणीं ज़िन्दगी परमेशरा लै धर्में अस्त्र-शस्त्र बणाईं। इहअ समझ़ा कि तम्हैं आसा मूंऐं दै मांझ़ा का ज़िऊंदै हुऐ दै। तै निं तम्हां प्रैंदै पाप राज़ करी सकदअ, किल्हैकि ज़िहअ बधान बोला करना लै तेऊ साबै निं तम्हैं ज़िन्दगी ज़िऊंदै, पर तम्हैं ज़िऊआ तेऊ जशे साबै ज़िन्दगी ज़ुंण परमेशरै तम्हां का रहैऊ।
पापे गलामी का छ़ुटी धर्में दास
तै किज़ै हुअ? बधाने बशै निं हाम्हैं आथी हाम्हैं आसा परमेशरे जशा दी, तै कै हाम्हैं पाप करी सका? नां, हाम्हैं निं पाप करी ई सकदै। तम्हां का आसा थोघ कि तम्हैं कसरी गलामी दी डेओआ, तेखअ हआ सह मणछ थारअ मालक अर तम्हां लागा तिहअ ई करनअ ज़िहअ सह बोले। तम्हैं सका पापे गलाम हई ज़ुंण मौत आणा या सका तम्हैं परमेशरे साबै हर गल्ला मनी ज़ुंण धर्मीं ज़िन्दगी दैआ। पैहलै किअ तम्हैं तिहअ पाप ज़िहअ थारै दिलै बोलअ, तम्हैं थिऐ पापे गलाम। पर तेखअ लागै तम्हैं धैन-मन्न लाई मसीहे हर गल्ला मंदै। हुंह करा एता लै परमेशरो शूकर। ऐबै निं तम्हां दी पाप आथी ऐबै हुऐ तम्हैं पाप करने शगती का आज़ाद हई धर्मीं परमेशरे दास।
हुंह लिखा तम्हां लै एऊ साबै ज़ुंण आम लोग समझ़ी सका। पैहलै तै तम्हैं आपणैं मन्नें गलाम अर तम्हैं किई सोभै छ़ोतली अर हर कदुष्ट काम। पर ऐबै करा तिहै काम ज़िहअ परमेशर करा ताकि सह तम्हां पबित्र करी आप्पू लै ज़ुदै करी सके।
ज़ेभै तम्हैं पापे गलाम थिऐ, तेभै निं तम्हैं धर्में काम करनअ च़ाहंदै तै। तम्हैं किऐ हर कदुष्ट काम, अर ऐबै हआ तम्हैं तेता करै शर्मिंदै। तम्हां तेता करै किज़ै फाईदअ हुअ? तिंयां गल्ला आणा सिधी मौत। पर ऐबै निं तम्हां आजू पाप करनअ। ऐबै निं तम्हैं पैहलै ज़िहै पापे गलाम आथी। पर ऐबै हुऐ तम्हैं परमेशरे दास। तेऊ किऐ तम्हैं आप्पू लै ज़ुदै अर तेऊ दैणीं तम्हां लै आप्पू संघै सदा रहणैं आल़ी ज़िन्दगी। किल्हैकि पाप करनैओ नतिज़अ आसा मौत, पर ज़ुंण दान हाम्हां लै परमेशर दैआ सह आसा सदा रहणैं आल़ी ज़िन्दगी ज़ुंण म्हारै प्रभू मसीहा ईशू करै भेटा।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.