Kulvi Outer Seraji Bible
रोमी 7
बैह किई दी ज़िन्दगीए बारै
भाईओ, तम्हां का कै थोघ निं आथी कि हुंह बोला इना बधाने ज़ाणकारा लै इहअ कि ज़ेभै तैणीं मणछ ज़िऊंदअ रहा, तेभै तैणीं करा बधान तेऊ प्रैंदै राज़?
ज़हा बेटल़ीओ बैह हआ हुअ द, सह हआ बधाने साबै आपणैं लाल़े ज़िऊंदी ज़िता तेऊ संघै गांठुई दी, पर ज़ै तेसो लाल़अ मरी गअ, सह हआ आपणैं लाल़े बधाना का आज़ाद। तैही ज़ै सह आपणैं लाल़े ज़िऊंदी ज़िता कहा होरी मर्धा संघै बैह करा, सह बेटल़ी करा कंज़रैई, पर ज़ै तेसो लाल़अ मरी गअ, सह हआ तेऊ बधाना का आज़ाद, अर ज़ै सह कहा होरी मर्धा संघै भिई शादी करे, सह निं कंज़री हणीं।
तिहअ ई, ए मेरै भाई-बैहणीओ, अह आसा सह असली गल्ल: तम्हैं गऐ ऐबै बधाना लै मरी ज़ेभै तम्हैं मसीहा संघै मूंऐं। तम्हैं आसा तेऊ संघै साझ़ू ज़ुंण मरी करै ज़िऊंदअ हुअ। एतो नतिज़अ आसा इहअ कि हाम्हैं सका परमेशरा लै भलै कामें फसल पैईदा करी। ज़धू हाम्हैं आपणीं बूरी सोठे साबै काम करा तै अर ज़धू हाम्हैं बधान मना तै, हाम्हैं च़ाहा तै होर बी खास्सअ पाप करनअ। हाम्हैं किई सह बूराई ज़ेता करै हाम्हैं परमेशरा का सदा लै दूर हुऐ तै।
पर ऐबै किऐ परमेशरै हाम्हैं मोसा गूरे बधाना का एऊ साबै आज़ाद कि हाम्हैं गऐ तेता लै मरी अर शास्त्र निं आजू हाम्हां लै बोल्दअ कि हाम्हां किज़ै करनअ। परमेशरै किअ हाम्हां लै अह एते तैणीं कि आजू लै हाम्हैं तेऊ साबै तेऊए च़ाकरी करे ज़ेऊ साबै पबित्र आत्मां हाम्हां का खोज़ा, नां कि पराणैं बधाने साबै।
बधान अर पाप
हाम्हैं किज़ै सका बोली? कि बधान पाप आसा? इहअ निं आथी, अह त बधान ई ज़ेता करै मुखा थोघ लागअ कि पाप किज़ै आसा, मुखा लागअ बधाना ई करै थोघ कि मांण करनअ आसा पाप किल्हैकि तेथ आसा लिखअ द, “मांण निं करी।”1
पर पापै पज़ेरअ मोक्कअ भाल़ी हुकमा संघै मुंह दी सोभी रंगो मांण, किल्हैकि बधाना बाझ़ी आसा पाप मुल्दअ।
ज़ेभै तैणीं मुखा इहअ थोघ नांईं त आथी कि परमेशरो बधान किज़ै च़ाहा, हुंह करा त पाप अर मुंह निं ऐहा गल्ले फिकर हंदी ती कि हुंह किज़ै करा। ज़ांऊं मुखा इहअ थोघ लागअ कि परमेशरै दैनअ हाम्हां लै आपणअ बधान, तेखअ समझ़अ हुंह ऐहा गल्ला कि हुंह करा त पाप। तेखअ ज़ाण्हुंअ मुखा कि हुंह त परमेशरा का दूर। ज़हा बधाना करै मुंह सदा रहणैं आल़ी ज़िन्दगीए आशा ती, तेते ई हुकमा करै आई मुल्है मौत।2
ज़ेभै हुंह पाप करनअ च़ाहा त, हुंह समझ़ा त इहअ कि मुंह भेटणीं सदा रहणैं आल़ी ज़िन्दगी ज़ै हुंह बधाने सोभी गल्ला मंदअ। पर मेरी अह सोठ ती गलत। हुंह समझ़ा त इहअ कि हुंह सका पाप करनअ अर बधान दुहै एकी बारी करी। असली दी त लाअ द हुंह सदा लै आप्पू का दूर करी किल्हैकि हुंह निं बधाने कोही गल्ला पूरी करी सकअ।3
इहअ करै लागा हाम्हां का थोघ कि परमेशरै ज़ुंण बधान मोसा गूरा का दैनअ त सह आसा पबित्र। ज़ुंण बी परमेशरै हाम्हां लै हुकम दैनै तिंयां बी आसा पबित्र, भलै अर नर्दोश।
कै हाम्हैं इहअ बोली सका कि ज़ुंण बधान परमेशरै मोसा लै दैनअ, ज़ुंण हाम्हां लै बधिया त, सह कै हाम्हां परमेशरा का दूर निंयां? असली दी निं इहअ हई सकदअ। बधान ज़ुंण बधिया त तेता करै डेऊअ हुंह पापा नेल़। मुखा त तेते नतिज़ेओ थोघ कि हुंह त परमेशरा का खास्सअ दूर। ऐहा गल्लो बी लागअ मुखा थोघ कि परमेशरै हाम्हां लै कै हुकम आसा दैनअ द, मुखा इहअ बी लागअ थोघ कि ज़ुंण किछ़ बी हुंह करा पैहलै करा त, सह थिअ असली दी पाप।
बधान निं मणछा पापा का बच़ाऊई सकदअ
किल्हैकि हाम्हां का आसा थोघ कि बधान आसा आत्मिक, पर हुंह आसा देहीए साबै ज़िन्दगी काटणै आल़अ अर पापो गलाम।
ज़ुंण हुंह करा तेतो निं मुखा थोघ हंदअ किल्हैकि ज़ुंण हुंह च़ाहा तेता निं करदअ, पर ज़ेता का मुंह च़िल़्ह लागा हुंह करा तेऊ ई कामां। तै ज़ै हुंह तेता ई करा ज़ुंण कदुष्ट काम हुंह नांईं करनअ च़ाहंदअ, तै मना हुंह ऐहा गल्ला कि बधान आसा भली। तै एही दशा दी निं तिन्नां कदुष्ट कामां करनै आल़अ हुंह आथी पर तेता करनै आल़अ आसा पाप ज़ुंण मुंह दी आसा बस्सअ द।
किल्हैकि मुखा आसा थोघ कि मेरै बूरै सभाबा दी निं कोई बी राम्बल़ी च़ीज़ बस्सदी, हुंह भलै काम करनै, च़ाहा पर मेरै भलै निं हंदै।4
किल्हैकि ज़हा भलै कामां हुंह करनअ च़ाहा तेता निं करदअ पर ज़हा बूराईए हुंह करनअ नांईं च़ाहंदअ तेता करा हुंह। पर ज़ै हुंह तेता ई करा ज़िहअ करनअ हुंह नांईं च़ाहंदअ, तै निं तेता करनै आल़अ हुंह रहअ पर तेता करनै आल़अ आसा पाप ज़ुंण मुंह दी आसा बस्सअ द।
मंऐं शिखल़ी आपणीं ज़िन्दगी का अह गल्ल कि ज़ेभै बी हुंह भलअ करनअ च़ाहा मेरै भलै हआ तेभै बूरअ ई।
किल्हैकि दिला का, रहा हुंह परमेशरे बधाना करै खुश, पर मुंह भितरी आसा एक होर शगती ज़ुंण मेरी अक्ल डाही जुध करा। अह शगती बणाआं मुंह पापे गलाम ज़ुंण मुंह भितरी आसा।
हुंह किहअ नभागअ मणछ आसा! हुंह ऐहा देही का कहा करनअ आज़ाद ज़ेथ पाप अर मौतो राज़ आसा? हुंह करा परमेशरो शूकर कि प्रभू ईशू मसीहा करै हुऐ हाम्हैं आज़ाद। इहअ करै कि आपणीं अक्ली करै ता च़ाहा हुंह परमेशरे बधाना मनणअ पर देही का आसा हुंह पापे बधानो गलाम।
Source notes (4)
- Cross-reference रोम. 3:20
- Cross-reference लेब. 18:5
- Cross-reference रोम. 7:8
- Cross-reference मूल. 6:5
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.