Kulvi Outer Seraji Bible
रोमी 5
परमेशरा संघै मेल़-ज़ोल़
ज़ै हाम्हैं परमेशरै हाम्हैं विश्वासा करै धर्मीं आप्पू संघै धर्मीं आसा बणाऐं दै, तै आसा म्हारअ परमेशरा संघै मेल़-ज़ोल़ तेता करै हुअ द ज़ुंण म्हारै प्रभू ईशू मसीहा हाम्हां लै किअ। किल्हैकि मसीहा ज़ुंण काम हाम्हां लै किअ सह आसा इहअ कि तेऊ खोल्हअ हाम्हां लै तिधा डेऊणा लै एक दुआर ज़िधी परमेशरा हाम्हां लै झींण करा, तेता लै हणअ हाम्हां खुश किल्हैकि हाम्हैं करा बडै भरोस्सै दी आशा कि परमेशरा करनी खुल्है दिलै हाम्हां संघै आपणीं महान गल्ला साझ़ू।
सिधअ इहअ ई निं, हाम्हां लागा बूरै बगता दी बी परमेशरे प्रतप्पो इहअ सोठी करै घमंड करनअ कि बूरै बगता संघै सबर, अर सबर करी बूरै बगता दी खरै निखल़णैं करै हआ आशा पैईदा, अर आशा डाहणें निं शरम हंदी, किल्हैकि ज़ुंण पबित्र आत्मां परमेशरै हाम्हां लै आसा दैनअ द, तेता संघै आसा परमेशरै हाम्हां लै म्हारै मन्नैं आपणीं झ़ूरी बी भरी दी।
ज़ेभै हाम्हां का ज़ोर-ज़ाहण नांईं तै आथी अर दुबल़ै तै, ठीक तैहा ई बेला मूंअ ईशू मसीहा हाम्हां पापी लै। कोई धर्मीं मणछा लै, मरा हेरुं, केतरी कठण गल्ल आसा, पर हई सका कि कोई मणछ भलै मणछा लै ज़ान दैणें कोशिश करे बी।
पर परमेशर करा हाम्हां संघै एतरी झ़ूरी कि ज़ेभै हाम्हैं पापी तै, ईशू मसीहा दैनी म्हारी तैणीं आपणीं ज़ान। ऐबै बणाऐं हाम्हैं धर्मीं इहअ करै कि मसीहा ईशू मूंअ म्हारी तैणीं अर तेऊ बहाऊअ आपणअ पबित्र लोहू म्हारै पापे तैणीं। तेऊ ई ईशू बच़ाऊंणै हाम्हैं परमेशरे रोश्शा का।
किल्हैकि हाम्हैं तै परमेशरे दुशमण अर तेऊओ पूत मूंअ म्हारी तैणीं, तैही हुअ म्हारअ परमेशरा संघै मेल़-ज़ोल़, अर अह गल्ल बी आसा पाक्की कि तेऊए ज़िऊंदै हणैं करै भेटणअ हाम्हां उद्धार। एतरअ ई निं पर ऐबै गअ म्हारअ प्रभू ईशू मसीहा करै मेल़-ज़ोल़ हई तैही आसा हाम्हैं परमेशरा दी खुश।
आदमी करै मौत-मसीहा करै ज़िन्दगी
सोभै मणछ आसा पापी किल्हैकि आदमी ज़ुंण मणछ परमेशरै सोभी का आजी बणाअं तेऊ किअ पाप अर तेता करै आई तेऊ लै मौत। इहअ करै आई तधा ओर्ही संसारे सोभी मणछा लै मौत अर तिंयां सोभ मूंऐं।1
बधान एछणैं तैणीं संसारै पाप, हआ त पर ज़िधी बधान निं हंदअ त तिधी हआ त पाप पर तेता निं पाप मंदै तै।
आदमी ओर्ही मोसा गूरे बधाना तैणीं किअ सोभी पाप अर तिंयां मूंऐं सोभै इधी तैणीं कि ज़ुंणी आदमी ज़िहअ पाप बी नांईं बी किअ तिंयां बी मूंऐं। आदमीए पाप करनैओ असर हुअ सोभी मणछा लै, तिहअ ई ज़िहअ मसीहा किअ ज़ुंण बादा का आअ तेतो असर बी हणअ सोभी मणछा लै।
पर ज़ुंण दान परमेशरै दैनअ सह निं आदमी ज़िहअ आथी। किल्हैकि आदमी ज़ुंण सोभी का पैहलअ मणछ त, तेऊ किअ पाप अर तेता करै आई सोभी मणछा लै मौत। पर दुजअ आदमी ईशू मसीहा ज़ुंण बादा का आअ सह मूंअ हाम्हां सोभिए तैणीं, अह हुई हाम्हां लै परमेशरे झींण कि तेऊ बणाऐं हाम्हैं धर्मीं ज़ै कि हाम्हैं नांईं तै एता जोगी आथी।
ज़ुंण दान परमेशरै हाम्हां लै दैनअ सह निं आदमीए पाप करनै ज़िहअ आथी, किल्हैकि आदमीए एक पाप करनै पिछ़ू आई सज़ा। पर एही ता किऐ हाम्हैं खास्सै पाप पर परमेशरै दैनअ हाम्हां लै दान ताकि सह हाम्हां आप्पू संघै धर्मीं बणांए। एकी मणछ आदमीए पाप करनै पिछ़ू आई सोभी मणछा लै मौत। पर ऐबै दैनअ परमेशरै हाम्हां सोभी लै महान दान अर तेऊ बणाऐं हाम्हैं आप्पू संघै धर्मीं। अह गल्ल बी आसा पाक्की हाम्हां करनअ मसीहा संघै स्वर्गै राज़। अह हणअ तेता करै ज़ुंण एकी मणछै मसीहा ईशू हाम्हां लै किअ।
ज़िहअ आदमे एक पाप करनै पिछ़ू सोभी मणछा पल़ी सज़ा भुगतणी, तिहअ ई रहअ ईशू मसीहा परमेशरे हर गल्ला मनी आपणीं मौत हणैं तैणीं धर्मीं। परमेशरै बणाऐं तेऊ करै सोभै आप्पू संघै धर्मीं ताकि सह तिन्नां लै सदा रहणैं आल़ी ज़िन्दगी दैए। ज़िहअ एकी मणछै हुकम नांईं मनअ, अर तेऊ पिछ़ू हुऐ सारै लोग पापी, तिहै ई हणैं एकी मणछे ई हुकम मनणै पिछ़ू धर्मीं।
मोसा गूरो बधान दैनअ एते तैणीं कि लोगा का थोघ लागे कि तिंयां किहै पापी आसा पर ज़िहै लोग होर बी खास्सै पाप रहै करदै लागी, परमेशरो जश बी हुअ तेता का खास्सअ। ज़िहअ सोभी मणछै पाप किअ अर तिंयां सोभ मूंऐं, तिहै ई बणाणैं परमेशरा मसीहे जशा करै तिंयां धर्मीं अर तिन्नां भेटणीं सदा रहणैं आल़ी ज़िन्दगी।
Source notes (1)
- Cross-reference 1 करि. 15:21-22
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.