रोमी 11

इज़राईला लै परमेशरे झींण

1तैही पुछ़ा हुंह इहअ कि परमेशरै कै आपणीं परज़ा छ़ाडी आसा हेरी दी? इहअ निं कधि हई सकदअ! हुंबी, इज़राईली आसा, आबरामे लुआद अर बिन्यामीने गोत्रा का।

2परमेशरै निं आपणीं परज़ा त्यागी, ज़ुंण तेऊ पैहलै ई आसा छ़ांटै दै, तम्हां का आसा थोघ कि पबित्र शास्त्रा दी एलियाह गूरे कथ्या दी किज़ै बोला कि सह करा इज़राईलीए खलाफ परमेशरा का एही अरज़,1

3“हे प्रभू, तिन्‍नैं पाऐ तेरै गूर मारी अर तेरी बेदी पाई ढोल़ी अर हुंह बच़अ ऐबै एक्‍कै ज़िऊंदअ ज़ुंण ताह दी विश्वास करा अर ऐबै आसा तिंयां मेरै पिछ़ै पल़ै दै कि मुंह मारी पाए!”2

4पर परमेशरै बोलअ एलियाह लै, “मंऐं आसा आप्पू लै सात हज़ार मर्ध डाहै दै, ज़ुंणी तेऊ बाल देअआ सेटा माथअ निं टेक्‍कअ।”3

5अह आसा आझ़ बी इहअ ई, परमेशरे जशा करै आसा इज़राईली मणछा मांझ़ै धख ज़िहै इहै मणछ ज़ुंण परमेशरै आपणैं असली लोग हणां लै छ़ांटै दै। 6ज़ै परमेशरै तिंयां आपणैं जशा करै आसा छ़ांटै दै, तै निं तिन्‍नैं बधाने साबै तेता लै किछ़ै किअ। ज़ै अह कर्म करी हुअ तै निं जश आजू असली जश रहअ।

7एतो नतिज़अ हुअ ऐबै इहअ कि इज़राईली मणछै किई परमेशरा संघै धर्मीं हणें कोशिश, तिंयां निं सफल हुऐ पर ज़ुंण परमेशरै छ़ांटै; तिंयां बणाऐं परमेशरै धर्मीं, पर होर हुऐ काठै तिन्‍नैं निं परमेशरे गल्‍ला शूणीं-मनी। 8ज़िहअ पबित्र शास्त्रा दी ईशायाह बोला, “परमेशरै आसा तिंयां आझ़की धैल़ी घणीं निंजा दी पाऐ दै अर एही आछी दैनी कि तिंयां नांईं भाल़े अर इहै कान दैनै कि नांईं शुणें।”4 95

राज़अ दाबेद बोला इहअ,

“तिन्‍नें रोटी लोल़ी ती तिन्‍नां ई लै फाही हुई,

तिन्‍नें धामा करै लोल़ी तै तिंयां सोभै बरैबाद हुऐ।

ताकि तिन्‍नां तेते राम्बल़ी सज़ा भेटे।

10तिंयां लोल़ी ए आछिए कांणै हुऐ!

अर तिंयां लोल़ी तै मुंह सदा कुंगल़ै रहै फिरी।”

11हुंह पुछ़ा ऐबै इहअ कि इज़राईली मणछा कै एही ठोहल़ लागी कि तिंयां हुऐ सदा लै खतम? इहअ निं कधि हई सकदअ! पर तिन्‍नें विश्वास नांईं करनै पिछ़ू भेटअ होरी ज़ाती लै उद्धार ताकि इज़राईली मणछा ज़ल़ण होए।6

12ज़ै इज़राईलीए विश्वास नांईं करनै पिछ़ू होरी ज़ातीए लोगा लै भलाई हुई, ज़ेभै इज़राईली मणछ परमेशरा बाखा लै बापस फिरे, तेभै हणीं संसारै होरी ज़ातीए लोगे होर बी खास्सी भलाई।

होरी ज़ातीओ उद्धार: कलमा लाणैं ज़िहअ

13हुंह बोला तम्हां होरी ज़ाती लै इना गल्‍ला कि, ज़ै हुंह होरी ज़ाती लै शधाणूं आसा, तै करा हुंह आपणीं च़ाकरीए बड़ैई। 14ताकि केऊ साबै हुंह आपणैं टबरा यहूदी का ज़ल़ण कराऊई करै तिन्‍नां मांझ़ै कई बच़ाऊई सकूं।

15परमेशरै आसा हेरे इज़राईली मणछ छ़ाडी किल्हैकि तिन्‍नैं निं परमेशरा दी विश्वास किअ। एता करै हुअ संसारे होरी लोगो परमेशरा संघै मेल़-ज़ोल़। तै सोठा तैहा गल्‍ला बी कि तेभै कै हणअ ज़ेभै तिंयां विश्वास करे। अह हणअ तिन्‍नां लै मरी करै ज़िऊंदै हणैं बराबर! 16ज़ै परमेशरा लै भैंट दैनी दी पैहली रोटी पबित्र हुई तै आसा पूरअ मुछ़अ द पिठअ बी पबित्र, अर ज़ै ज़लैल़ै पबित्र थिऐ आसा तिंयां शाण्हीं बी पबित्र।

17इज़राईली मणछ आसा जैतूने बूटे शाण्हटी ज़िहै अर दाद-बाब आबराम, इसहाक अर याकब आसा तेऊ बूटे ज़लैल़ै ज़िहै। होरी ज़ातीए लोग आसा बणें जैतूने बूटा ज़िहै। ज़ै एक शाण्हटी चोल़ी करै तूह बणें जैतून तेथ कलम किअ, तेखअ भेटा ताह बी तेता ई का रस। 18शाण्हटी दी घमंड निं करी अर ज़ै तूह घमंड करे बी, तै डाहै आद कि तूह निं ज़लैल़ै सभाल़दअ पर ज़लैल़ै सभाल़ा ताह।

19तेखअ बोल़णअ ताह इहअ, “तिंयां शाण्हटी चोल़ी तै कि हुंह तेथ कलम होए।” 20तिंयां ता विश्वास नांईं करने पिछ़ू चोल़ी पर तूह रहा विश्वासा करै बणी, इहअ करै घमंडी निं हई। 21किल्हैकि परमेशरै ज़ै असली शाण्हटी निं छ़ाडी, सह सका ताह बी काटी।

22ऐहा गल्‍ला दी दै धैन कि परमेशर आसा झणैल़ू बी अर काठअ बी, ज़ुंणी तेऊए गल्‍ला नांईं मनी तिन्‍नां लै आसा सह काठअ पर ताल्है आसा सह झणैल़ू ज़ै तेऊ तिहअ करे ज़िहअ सह बोला। ज़ै तूह तेथ दी बणी नां रहे तै पाणअ तूह बी तेता का काटी। 23तिंयां बी ज़ै विश्वास करे तै करनै तिंयां भिई तेथै कलम किल्हैकि परमेशर सका भिई कलम लाई। 24ज़ुंण पैहलै ई का बणें जैतूनो बूट आसा, ज़ै तूह तेता का काटी राम्बल़ै बूटा दी कलम किअ तै ज़ुंण तिंयां असली शाण्हटी तेऊ ई राम्बल़ै बूटे आसा तिंयां बी जाणीं तेथ भिई कलम हई।

परमेशर आसा सोभी लै झणैल़ू

25भाईओ, किधी इहअ निं हआ कि तम्हैं आप्पू बडै समझ़कार बणें! तैही निं हुंह इहअ च़ाहंदअ कि तम्हैं एऊ भेदा का नज़ाण रहे कि ज़ेभै तैणीं होरी ज़ातीए मसीहा दी विश्वास नां करी मुक्‍के तेभै तैणीं रहणअ इज़राईलो एक छ़ुंड इहअ ई काठअ बणी।

26एऊ साबै करनअ परमेशरा सारै इज़राईली मणछो उद्धार। ज़िहअ पबित्र शास्त्रा दी आसा लिखअ द,7

“छ़ुटकारै दैणैं आल़अ एछणअ एरुशलेम नगरी का

अर तेऊ करनै इज़राईलीए पाप दूर।

27“ज़िहअ परमेशर बोला कि 8

तिन्‍नां संघै हणीं मेरी अह ई करार कि

मुंह करनै तिन्‍नें पाप दूर।”

28इज़राईली मणछ निं खुशीए समादा दी विश्वास करनअ च़ाहंदै इहअ करै आसा तिंयां परमेशरे दुशमण, अर तेता करै हुअ थारअ फाईदअ। परमेशर करा तिन्‍नां लै झ़ूरी किल्हैकि तेऊ आसा तिंयां आप्पू लै छ़ांटै दै। एता लै आसा तेऊ तिन्‍नें दादा-बाबा का करार किई दी। 29परमेशर ज़ुंण आपणैं लोगा लै सोठा, तेता का निं सह पिछ़ू हटदअ, ज़हा लै तेऊ बर्गत हेरी दैई अर ज़ुंण तेऊ आप्पू लै छ़ांटी हेरै।

30पैहलै निं तम्हैं होरी ज़ातीए मणछै परमेशरे हुकम मनै, पर ऐबै आसा परमेशर तम्हां लै खास्सअ झणैल़ू किल्हैकि इज़राईली निं ज़िहअ तेऊ बोलअ तिहअ किअ। 31तेही ई निं तिन्‍नैं यहूदी बी एभै हुकम मनअ कि तम्हां होरी ज़ातीए मणछा लै ज़ुंण झींण हआ एता करै तिन्‍नां लै बी झींण होए। 32परमेशरै दैनअ सोभी लोगा तिन्‍नें दिला-मन्‍नें साबै कज़ेही करनै, ताकि सह आपणीं झींण सोभी लोगा लै प्रगट करे।

परमेशरे च़ाकरी

33परमेशरे जशो धन, अक्ल अर ज्ञैन भाल़ा केही महान आसा! तेऊए बात अर तेऊओ नसाफ समझ़णअ भाल़ा हाम्हां लै किहै कठण आसा!

34प्रभूए अक्ल अर सोठ निं कोहै समझ़ी सकदअ अर तेऊ लै निं कोहै सलाह दैई सकअ!9

35या तेऊ लै पैहलै किज़ै कुंणी दैनअ! ज़ेतो बदल़अ तेऊ लै दैणअ लागे?10

36किल्हैकि सह आसा सोभी गल्‍लो मूल़, सोभै गल्‍ला आसा तेऊए शगती करै टेक्‍की दी अर ईंयां सोभै गल्‍ला आसा तेऊ ई लै। तेऊओ प्रतप्प लोल़ी जुगै-जुगै हंदअ रहअ। एवमस्तू