Kulvi Outer Seraji Bible
रोमी 13
स्वर्ग राज़े बारै ज़िम्मैंबारी
हरेक मणछ रहै सरकारी अफसरे डरा हेठै, किल्हैकि राज़ करनै आल़ै मांझ़ै निं इहअ कोह आथी ज़ुंण परमेशरा बाखा का नांईं आथी। तिन्नां लै ज़ुंण राज़ करनैओ हक आसा परमेशरै ई दैनअ द।1
इहअ करै ज़ुंण बी मणछ राज़ करनै आल़ै अफसरा लै द्रोह करा, सह करा परमेशरे बधाना लै द्रोह, अर बधाने द्रोह करनै आल़ै भेटणीं सज़ा।
ज़ै कुंण भलै काम करे, तेऊ निं अफसरा का डरने ज़रुरत आथी, पर ज़ै कुंण कदुष्ट काम करे तेऊ लागा डरनअ। ज़ै तूह इहअ च़ाहा कि ताह निं अफसरे डअर लोल़ी रही, तै कर भलअ अर तिहअ करै करनअ तिन्नां बी तेरअ अदर।
किल्हैकि सह आसा तेरी भलाई करना लै परमेशरो दास। पर ज़ै तूह बूराई करे, तै हुअ ताह डरनअ किल्हैकि तेऊ का आसा ताल्है सज़ा दैणैंओ हक, सह आसा परमेशरे दास तेऊ खास मकसद पूरै करना लै कि ज़ुंण कदुष्ट काम करे तिन्नां लै सज़ा दैए। तम्हैं निं डरा हेठै सिधै एते तैणीं रही कि सज़ा का बच़े पर थारी सोर-समझ़ बी शुची रहे।
तैही लागा कारअ बी दैणअ, किल्हैकि तिंयां अफसर आसा परमेशरे दास अर तेऊ कामां पूरै करदै लागै दै ज़ुंण तिन्नां करनअ लागा। इहअ करै करनअ हरेकी मणछो हक दैई, ज़हा कारअ लोल़ी, तेऊ लै दैआ कारअ, ज़ै कहा च़ंदअ लोल़ी तेऊ लै दैआ च़ंदअ। ज़सरी डरा हेठै लागा रहणअ तेते रहणअ डरा हेठै, ज़सरअ अदर लागा करनअ तेऊओ करा अदर।
एकी दुजे बारै ज़िम्मैंबारी
आप्पू मांझ़ै निं झ़ूरी छ़ाडी होरी किछ़ी च़िज़े ऋणी हई, किल्हैकि ज़ुंण दुजै लै झ़ूरी करा सह करा परमेशरे बधाने हर गल्ला पूरी। मोसा गूरे बधाना दी आसा इहै कई हुकम, “कंज़रैई निं करी, हत्या निं करी, च़ोरी निं करी, मांण निं करी।” इना छ़ाडी ज़ै बधाना दी कोई होर बी हुकम आसा होए, तिन्नां सोभिओ नचोल़ भेटा ऐहा गल्ला दी, “तूह करै आप्पू फेर रहणैं आल़ै होरी साथी-संघी लै तेही झ़ूरी ज़िहअ तूह आप्पू लै झ़ूरा।”2
झ़ूरी निं आप्पू फेर रहणैं आल़ै कोहिओ बूरअ करदी, ज़ै हाम्हैं सोभी लै झ़ूरी करा, तै करा हाम्हैं परमेशरे बधाना पूरअ।
प्रभू फिरी एछणें धैल़ी गई नेल़ एछी
एऊ बगता बछ़ैणीं डाहा हर बगत एकी-दुजै संघै झ़ूरी, एते तैणीं कि ऐबै गई तम्हां का निंजा का उझ़णै घल़ी पुजी। किल्हैकि ज़हा घल़ी हाम्हैं विश्वास किअ त तेते साबै आसा ऐबै म्हारअ उद्धार नेल़। राच गई ऐबै खास्सी बिति, राच आसा भैणै आल़ी। इहअ करै ऐबै न्हैरे कामां छ़ाडी बान्हां ऐबै प्रैश्शे अस्त्र-शस्त्र।
हाम्हां लागा आपणअ च़ाल-च़लण ऐबै इहअ शुचअ करनअ ज़िहअ एक मणछ प्रैश्शै दी हांढा नां कि न्हैरै दी हांढणै आल़ै मणछा ज़िहअ, सुहांग-मखौल, शूर-शराब, कंज़रैई, दुजै भाल़ी ज़ल़ण करनी, निक्कै काम अर लल़ाई-झ़गल़ै करनै। पर हाम्हैं लोल़ी प्रभू ईशू मसीहा ज़ेही ज़िन्दगी ज़िऊई। तिन्नां पराणीं बूरी गल्ला पूरी करने कोशिश निं करा ज़ेता थारी देहीओ बूरअ सभाब च़ाहा।
Source notes (2)
- Cross-reference तित. 3:1
- Cross-reference लुआ. 20:13-16; लेब. 19:18
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.