नहेमया

नहेमया

नहेमया गूरे कताब

भेत

लिखणैं आल़अ: नहेमया

सन: 457 का 400 ईसा आजी

पहल़णैं आल़ै: इज़राईली

एज्रे कताबा दी खिरी बिति दी गल्‍ले बारा साला बाद शूणीं एरुशलेम नगरीए सह बूरी खबर एकी नहेमया नाओंए यहूदी कि नगरी फेरो गहल़ आसा अज़ी बी फेरा का ढूल़अ द अर दहई दी प्रऊल़ी बी निं अज़ी बदल़ी आथी ती।

नहेमया रहा त फारस देशै शुआ नगरी अर सह करा त राज़ै अर्तक्षत्रा संघै रही तेऊए च़ाकरी। नहेमया किई बिधाता सेटा एही अरज़ कि राज़ै अर्तक्षत्रै लोल़ी त तेऊ एरुशलेम नगरी लै डेऊणैं दैनअ ताकि सह नगरी भिई च़िणीं सके। बिधाता बी दैनअ तिहअ ई हणैं अर माहा राज़ै अर्तक्षत्रै दैनअ तेऊ एरुशलेम नगरी लै बापस फिरनैं, होर ता होर तेऊ दैनअ नगरी भिई सदेरना लै माल बी।

ज़ांऊं नहेमया एरुशलेम पुजअ, तेऊ किअ नगरीए मराम्मतीओ काम शुरू, ओरी पोरी मुल्खै फारसी राज़े कार-करिंदै लागै यहूदीए सुहांगा करदै अर तिन्‍नैं लाअ यहूदी लै इहअ दोश कि इहअ करनअ आसा फारसी माहा राज़ैओ द्रोह करनअ! ईंयां दुशमण च़ाल्‍लै तै एरुशलेम नगरी संघै जुधा करदै बी एछी कि नहेमया मारी पाए। खिरी छ़ेक्‍कअ तिन्‍नैं नगरीओ गहल़ च़िणीं अर तेते प्रऊल़ी छ़ेक्‍की नऊंईं लाई संघा मुक्‍कै तिंयां तेते बिधाता लै प्रतिष्ठा करी। अह त ऐहा गल्‍लो नछ़ैण कि बिधाता दैनी तिन्‍नां लै बर्गत।

पर नहेमया हेरअ ज़ाणीं कि बिधाता का कबल्‍ली बर्गत भेटणीं तैही ज़ै तिंयां सदा तेऊए साबै ज़िन्दगी ज़िऊए। तैही आसा नहेमया बिधाता सेटा अरज़ करी इहअ बोलअ द:

“हे परमेशर बिधाता, तूह आसा स्वर्गै! तूह आसा महान अर हाम्हां लागा तेरी ई डरा हेठै रहणअ। तूह आसा शुचअ-पाक्‍कअ अर तंऐं किई आपणीं करार तिन्‍नां लै पूरी ज़ुंण ताल्है झ़ूरा अर ज़ुंण ज़िहअ तंऐं बोलअ तिहअ ई हुकम मना।”

(1:5)

कताबे बांड

नहेमया आअ एरुशलेम नगरी लै फिरी 1:1—2:20

एरुशलेम नगरी फेर गहल़ छ़ेक्‍कअ च़िणीं 3:1—7:73

बिधातो बधान पहल़अ अर तेखअ किई नऊंईं करार 8:1—10:39

नहेमया आजू लै ज़ुंण होर काम किऐ 11:1—13:31