Kulvi Outer Seraji Bible
नहेमया 9
सोभी मांगी आपणैं-आपणैं पापा लै माफी
च़ौबी शऊजै हुऐ इज़राईली कठा संघा रहै भुखै कि तिन्नैं च़ेती आपणैं पाप करनै पिछ़ू माल़ी। तिंयां थिऐ सोभी परदेसी का ज़ुदै गऐ दै हई। तिन्नैं बान्हैं घेरी खिंथल़ै अर मुंडै पाअ शोग प्रगट करना लै धूल़अ-माट्टअ। तिन्नैं मनी अह गल्ल कि तिन्नैं अर तिन्नें दादै-बाबै किअ पाप। आपणीं-आपणीं ज़ैगा खल़्हुई रहा तै तिंयां धैल़ी एकी पहरै तैणीं परमेशर बिधाते बधाने कताबा का पहल़दै लागी अर दुजै पहरै करा तै तिंयां आपणैं पाप मनी पछ़ताअ करी, संघा करा तै धरनीं उटै पल़ी माथअ टेक्की अर परमेशरे स्तोती करी।
जेशूआ, बैनी, कदमीएल, शेबानयाह, बुन्नी, शेरेबयाह, बैनी अर कनानी तै लेबीए खास च़ौकी प्रैंदै खल़्हुऐ दै। तिंयां थिऐ तिधा का ज़ोरै-ज़ोरै तिन्नें परमेशर बिधाता सेटा अरज़ करदै लागै दै।
तेखअ बोलअ लेबी मांझ़ै जेशूआ, कदमीएल, बैनी, हशाबनेह, शेरेबयाह, होदिया, शेबानयाह अर पथाह इहअ,
“सोभ उझ़िआ खल़ै संघा करा ज़ोरै-ज़ोरै
आपणैं परमेशर बिधाते ज़ै-ज़ैकार,
ज़ुंण जुगै-जुगै ज़िऊंदअ आसा!
तेऊए महान नाओंए करा ज़ै-ज़ैकार,
तेऊए ज़ेतरी बी स्तोती करे, सह आसा थोल़ी।”
पाप माफी लै प्राथणां
तेखअ किई सोभी इज़राईली परज़ा एही प्राथणां:
“हे बिधाता, तूह ई आसा एक्कै बिधाता,
तंऐं ई बणाअं सारअ भ्रमंड अर सरगे सोभै तारै।
तंऐं ई बणाईं सारी धरती, समुंदर अर तेते सोभै गल्ला,
सोभी लै ज़िन्दगी दैणैं आल़अ आसा तूह ई।
स्वर्ग दूत करा तेरी ज़ै-ज़ैकार।
हे बिधाता, तूह ई आसा परमेशर,
तंऐं छ़ांटअ अब्राम संघा काढअ बाबेल देशे ऊर नगरी का,
अर तंऐं ई डाहअ तेऊ नाअं आबराम।
तंऐं भाल़अ कि सह थिअ शुचअ-पाक्कअ,
अर तंऐं किई तेऊ संघै करार।
तंऐं दैनी तेऊ लै ज़बान कि ताह दैणअ तेऊ लै
कनानी, हित्ती, अमोरी,
परिजी, जबेशी, गिर्गाशी ज़ातीए लोगो देश
ज़ेथ तेऊए आद-लुआद बस्से।
तंऐं किई आपणीं ज़बान पूरी किल्हैकि तूह आसा आप्पू ई शुचअ-पाक्कअ।
तंऐं भाल़अ कि म्हारै दादा-बाबा थिई मिसर देशै खास्सी खरी पल़ी दी,
तंऐं शूणीं तिन्नें अरज़ संघा टपाऊऐ लाल समुंदरा पार।
तंऐं रहैऊऐ मिसर देशे माहा राज़ै, तेऊए कार-करिंदै
अर होरी मिसरी लोगा का नुआहरै च़मत्कार,
किल्हैकि तिन्नैं आणी ती तेरी परज़ा हंती-हंती मारी।
तधकी आसा तेरी एही मशूरी हुई दी कि सह आसा आझ़ बी तेही ई।
तंऐं किअ समुंदर दूई बाखा लै,
संघा बणाईं मांझ़ा-मांझ़ी शुक्की बात,
संघा टपाऊई तेरी परज़ा पार।
ज़ुंण दुशमण तिन्नें पिछ़ै करनै आल़ै थिऐ,
तिंयां डबेऊऐ तंऐं डुघै समुंदरा दी टोल्हा ज़िहै।
धैल़ी नढैऊऐ तंऐं तिंयां बादल़े थाम्हा करै,
बैल़ी किअ तिन्नां लै आगीए थाम्हा करै प्रैश्शअ।
तूह होथअ स्वर्गा का उंधै सीनाई धारा,
तंऐं किई तिन्नां संघै गल्ला संघा दैनअ शुचअ बधान, धर्म बिधी
अर राम्बल़ी शिक्षा।
तंऐं डाहअ तिन्नां का बोली कि बशैघे धैल़ी मनै पबित्र,
तंऐं दैनअ आपणैं दास मोसा बाती तिन्नां लै बधान।
ज़ेभै तिंयां भुखै थिऐ, तंऐं दैनअ तिन्नां लै स्वर्गा का खाण अर
चिशा लै दैनअ शुक्की टोल्हा का झुटणा लै पाणीं।
ज़हा ज़ैगा दैणें तंऐं तिन्नां लै ज़बान ती दैनी दी,
तंऐं बणाऐं तिंयां तेते मालक।
पर म्हारै दादै-बाबै किअ घमंड अर तिंयां रहै काठै बणी,
तिन्नैं निं तेरै हुकम मनै।
तिन्नैं निं ज़िहअ तूह च़ाहा त तिहअ किअ,
ज़ुंण बी च़मत्कार तंऐं किऐ तै, तिंयां बिस्सरुऐ तेता पठी।
तिन्नां आअ एतरअ घमंड कि तिन्नैं बणाअं आपणअ एक प्रधान
कि सह तिन्नां मिसर देशे गलामी दी बापस निंए!
पर तूह परमेशर छ़ाडा माफी, तूह दैआ जश अर तूह करा झ़ूरी,
तूह निं झ़ट च़ारै रोश्श करदअ अर तूह आसा खास्सअ झणैल़ू,
तैही निं तंऐं तिंयां शोटी डाहै।
तिन्नैं बणाईं बाछ़ूए शक्ला ज़ेही मुहुर्ती संघा बोलअ इहअ,
‘म्हारअ परमेशर आसा अह ज़ुंणी हाम्हैं मिसर देशे गलामी का आणै छ़ड़ैऊई!’
ए बिधाता! तिन्नैं भाल़ तूह किहअ नकदरअ किअ त!
पर तंऐं निं तज़ी बी तिंयां उज़र रेगीस्तानै शोटी डाहै,
तेरी झींण आसा महान।
तंऐं नां तिन्नां का धैल़ी छ़ैल्ली करनै आल़अ बादल़ दूर किअ,
अर नां राची प्रैश्शै करनै आल़अ आगीओ थाम्ह दूर किअ।
आपणीं भलाई करै समझ़ाऊऐ तंऐं तिंयां कि तिन्नां किज़ै लागा करनअ,
तंऐं रज़ैऊऐ तिंयां खाण दैई अर झुटणा लै दैनअ तिन्नां लै पाणीं।
च़ाल़्ही साला तैणीं रहअ तूह
उज़र रेगीस्तानै तिन्नें हर ज़रुरती पूरी करदअ लागी,
तेतरी साला नां तिन्नें झिकल़ै धेल़्हुऐ,
नां तिन्नें खूरै छ़ाल़ू पल़ै।
तंऐं ज़ताऊऐ तिंयां बडै-बडै राज़ अर देशा का,
तंऐं बसाऊऐ तिंयां तिन्नां देशै हर ज़ैगा।
तिन्नैं ज़िती हेशबोन नगरी ज़िधी राज़अ सिहोन राज़ करा त,
बाशान देश ज़िधी राज़अ ओग राज़ करा त।
तंऐं दैनी तिन्नां लै सरगे तारै ज़ेही खास्सी आद-लुआद,
संघा दैनअ तिन्नां तेऊ देशा गिम्मणै ज़ेते बारै तंऐं
तिन्नें दादा-बाबा संघै करार किई ती।
तिन्नैं गिम्मी कनान देशे ज़ैगा,
तंऐं किई तिन्नां लै तिधी बस्सै दै कनानी का ज़ितणा लै मज़त,
कि तिंयां कनानी लोगा अर तिन्नें राज़ै संघै
ज़िहअ तिन्नों दिल बोले तिहअ करे।
तेरी परज़ा ज़िती गहल़ा आल़ी पाक्की नगरी,
तिंयां बणाऐं तंऐं रज़दी-पज़दी ज़िम्मीं, धन-माया करै भरी घअर,
पाणींए कुहै आल़ी नगरी,
जैतूने, फल़ा दैणैं आल़ै बूट अर दाखे बागे मालक।
तिंयां रज्ज़ै खाई-खाई ज़िहअ तिन्नों दिल बोलअ तिहअ, संघा हुऐ हिड-हिडै।
तिन्नैं भोगअ तिन्नां सोभी गल्लो सुख ज़ुंण भली गल्ला तंऐं तिन्नां लै दैनी।
पर तेरी परज़ा किअ ताल्है विश्वास घात अर द्रोह,
तिन्नैं छ़ाडी तेरै बधाने साबै ज़िन्दगी ज़िऊंणीं।
ज़ुंण आपणैं गूर तंऐं तिन्नां लै चतैनगी दैंदै छ़ाडै,
तिन्नैं पाऐ तिंयां बी मारी ज़ुण तिन्नां लै इहअ बोला तै कि परमेशरा बाखा लै फिरा बापस।
तिंयां रहै हर बगत तेरी बेइज़ती करदै लागी।
तैही दैनअ तंऐं तिन्नां तिन्नें दुशमणे बशै पल़णै।
तेखअ ज़ांऊं तिन्नां खरी पल़ी,
तै लागै तिंयां ताह सेटा लेर-पकार पाई मज़त मांगदै,
तंऐं शूणीं तेखअ तिन्नें अरज़ स्वर्गै।
तिन्नां लै हुई तेरी एही महान झींण कि तंऐं छ़ाडै तिन्नां लै सैणैं
ज़ुंणी तिंयां तिन्नें दुशमणा का बच़ाऊऐ।
ज़ांऊं तिन्नां लै चैन हुअ, तेखअ किअ तिन्नैं भिई पाप,
तेखअ दैनअ तंऐं तिन्नां भिई तिन्नें दुशमणे गलाम हणैं।
तज़ी बी ज़ांऊं तिंयां भिई ताह बाखा फिरी मज़त मांगदै लागै,
तूह रहअ हर बगत स्वर्गा का तिन्नें अरज़ शुणदअ लागी,
तेरी महान झींण हुई तिन्नां लै एही कि तंऐं काढै तिंयां बच़ाऊई।
तूह करा त तिन्नां लै चतैनगी दैई कि तिंयां तेरै बधाने साबै ज़िन्दगी ज़िऊए,
पर तिंयां हुऐ तै इहै घमंडी कि तिन्नैं छ़ाडअ तेरअ सह बधान मनणअ,
ज़ेता करै मणछ ज़िऊंदअ रहा।
तिंयां थिऐ इहै काठै अर कदुष्ट कि तिन्नैं निं तेरअ बधान मनअ ई।
तूह रहअ खास्सी साला तैणीं तिन्नां लै चतैनगी दैंदअ लागी,
तंऐं पाई आपणैं गूरे मन्नैं एही कि तिन्नां लै चतैनगी दैए,
पर तिंयां तेरी परज़ा तै टौणैं हुऐ दै,
तैही दैनअ तंऐं तिन्नां होरी देशे गलाम हणैं।
तज़ी बी रहअ तूह तिन्नां लै खास्सअ झणैल़ू बणी अर
तंऐं निं तिंयां शोटी डाहै अर नां पठी बरैबाद किऐ।
तूह आसा जश दैणैं आल़अ अर झणैल़ू परमेशर।
हे परमेशर, म्हारै परमेशर, तूह भाल़ किहअ महान आसा!
ताखा लागा डरनअ! ताखा भाल़ केही खास्सी शगती आसा!
तूह करा आपणीं ज़बान अर करार पूरी।
तेऊ ज़मानै ओर्ही ज़धू अश्शूर देशे राज़ै हाम्हैं हंतै,
आझ़ तैणीं भाल़ हाम्हैं केही खरी काटी!
म्हारै राज़ै, कार-करिंदै, सैणैं, प्रोहत, गूर,
म्हारै दाद-बाब अर म्हारै सोभी लोगै काटी खास्सी खरी।
आद कर कि हाम्हैं केही बूरी खरी काटी!
ज़ुंण बी हाम्हां लै हुई-बिति, सह किअ तंऐं हाम्हां लै राम्बल़अ,
हाम्हैं रहै पाप करदै लागी पर तूह रहअ हाम्हां लै शुचअ-पाक्कअ!
म्हारै दाद-बाब, म्हारै राज़ै अर प्रोहतै निं
तेरअ बधान मनअ आथी!
तिन्नैं निं तेरै हुकम अर तेरी चतैनगी मनी आथी।
सह दैनी तंऐं बर्गत अर तै किअ तिन्नैं तेऊ देशै राज़
ज़ुंण लाम्मअ-बिरलअ रज़दी-पज़दी ज़िम्मीं आल़अ देश तंऐं तिन्नां लै दैनअ।
पर तिंयां निं पाप करनै का पिछ़ू हटै अर नां तेरी च़ाकरी किई!
ऐबै आसा हाम्हैं तैहा ई ज़ैगा गलाम ज़ुंण ज़ैगा तंऐं हाम्हां लै दैनी ती अर
तैहा रज़दी-पज़दी ज़ैगा ज़ेता का हाम्हैं साल-फसल खाआ तै।
ऐहा ज़िम्मींए पज़ैआ डेओआ तिन्नां राज़ै लै
ज़ुंण म्हारै पाप करनै पिछ़ू हाम्हां प्रैंदै राज़ करदै आसा लागै दै।
तिंयां करा हाम्हां अर म्हारै डागै-चैणैं संघै ज़िहअ तिन्नों दिल बोला तिहअ,
ऐबै आसा हाम्हां लै बेघै खास्सी खरी हुई दी!”
सारी परज़ा किई करार अर तेथ दसकत
इना सोभी गल्ला हणैं पिछ़ू करा हाम्हैं इज़राईली परज़ा लिखी करै करार अर म्हारै सैणैं, लेबी अर प्रोहत करे तेथ दसकत।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.