Kulvi Outer Seraji Bible
नहेमया 12
प्रोहत अर लेबीए बही
ज़ुंण प्रोहत अर लेबी शालतीएले शोहरू जरूबाबेल अर माहा प्रोहत जेशूआ संघै गलामी का फिरी एरुशलेम नगरी पुजै तिंयां थिऐ ईंयां:
प्रोहत:
सरयाह, जेरमयाह, एज्रा,
अमर्या, मलूक, हतूश,
शकनया, रहूम, मरमोत,
ईदू, गिनतोई, अबियाह,
मिजामीन, मदाया, बिलगा,
शमयाह, जोरीब, जदाया,
सल्लू, अमोक, हिलकिया, जदाया।
जेशूआ माहा प्रोहते ज़मानै थिऐ ईंयां ई आपणैं भाई-बंधा प्रैंदै सैणैं।
लेबी:
बिधाता लै घैरी अर गाज़ै-बाज़ै आल़ै लेबी तै जेशूआ, बिनूई, कदमीएल, शेरेबयाह, यहूदा अर मतानियाह।
इना संघै पिछ़ू घैरी हआ तै बकबुकिया, ऊनी अर तिन्नें साथी-संघी।
माहा प्रोहत जेशूए आद-लुआद
जेशूआ त जोकीमो बाब, जोकीम त एलियाशिबो बाब, एलियाशिबो शोहरू थिअ जहोयादा, जहोयादा त जोनातानो बाब, जोनातान त जदूदो बाब।
प्रोहते टोलीए सैणैं
ज़ेऊ ज़मानै जोकीम माहा प्रोहत थिअ, प्रोहते टोली मांझ़ै तै ईंयां प्रोहते टोलीए सैणैं:
प्रोहत
टोली
मरायाह
सरयाह
हनन्याह
जेरमयाह
मशूलाम
एज्रा
जहोहनान
अमर्या
जोनातान
मलूक
युसुफ
शेबानयाह
अदना
हारीम
हेलकी
मरयोत
जकर्या
ईदू
मशूलाम
गिनतोन
ज़िक्री
अबियाह
पाखलअ मणछ
मिन्यामीन
पलती
मोआदीया
शम्मू
बिलगा
जोनातान
शमयाह
मतनाई
जोरीब
ऊज्जी
जदाया
कलाई
सल्लू
एबेर
अमोक
हशाबिया
हिलकिया
नतनेल
जदाया
प्रोहत अर लेबीए बही
ज़ेऊ ज़मानै एलियाशिब, जहोयादा, जोहनान, अर जदूद माहा प्रोहत थिऐ अर फारस देशै थिअ दारा माहा राज़अ, तेऊ ज़मानै तै लेबी अर प्रोहते टोलीए सैणें नाअं बही-पोथी दी लिखी डाहै दै।
एलियाशिबे पोचै जोहनान माहा प्रोहते मरनै बाद निं तेखअ लेबी टोलीए सैणें कोहिए नाअं सरकारी बही-पोथी दी लिखै।
बिधाते भबने च़ाकरी करने ज़िम्मैंबारी
ज़िहअ परमेशरे दास राज़ै दाबेदै हुकम त किअ द, तेऊ साबै बांडै हशाबिया, शेरेबयाह, कदमीएले शोहरू जेशूआ अर तिन्नें भाई-बंध दूई छ़ुंढा दी कि तिंयां आर-पार स्मोहरै खल़्हुई परमेशरो शूकर अर स्तोती करे।
मतानियाह, बकबुकिया, ओबेदिया, मशूलाम, तलमोन अर अकूबे ज़िम्मैंबारी थिई भबने प्रऊल़ी सेटा भढारे पहरै करने ज़िम्मैंबारी।
ईंयां लोग रहा तै जेशूए शोहरू अर जोसादके पोचै जोकीम माहा प्रोहते ज़मानै ज़धू हुंह नहेमया यहूदा मुल्खो राज़पाल अर एज्रा मोसा गूरे बधानो शास्त्री अर प्रोहत थिअ।
नहेमया किई नगरी फेर गहल़े दुआलीए प्रतिष्ठा
ज़ांऊं एरुशलेम नगरी फेर गहल़े दुआलीए प्रतिष्ठा हुई, यहूदा मुल्खै ज़िधी बी लेबी बस्सै दै थिऐ, तिंयां शादै सोभ एरुशलेम नगरी लै कि तिंयां छ़छ़ाल़ा, बींन अर होरी बाज़ै संघै गिहा बोल्दी परमेशरो शूकर अर ज़ै-ज़ैकार करे। लेबी टोली मांझ़ै ज़ुंण घैरी एरुशलेम ओरी-पोरी गराऊंऐं तै बस्सै दै, नतपाह, बेथ-गिलगाल, गिबा अर अज़मबेथ नगरी ओरी-पोरी गराऊंऐं तै बस्सै दै, तिंयां आऐ सोभ एरुशलेम नगरी लै। प्रोहत अर लेबी हुऐ सोभ पैहलै आप्पू बिधी-बधाने साबै शुचै तेखअ किऐ तिन्नैं होर लोग, प्रऊल़ी अर गहल़े दुआल शुची।
तेखअ किऐ मंऐं यहूदा मुल्खे सोभ सैणैं नगरीए गहल़े दुआली प्रैंदै कठा संघा बणाऐं तिन्नैं दूई दल संघा बझ़ैल़ी तिन्नां का गिहा बोल्दी, परमेशरो शूकर अर ज़ै-ज़ैकार करदी नगरी फेर फेरी दैणैं।
एक दल लागअ गहल़े दुआली प्रैंदी शणैऊंआं प्रऊल़ी बाखा लै हांढदअ, तिन्नां पिछ़ू-पिछ़ू डेऊऐ होशाया अर यहूदा मुल्खे सैणैं मांझ़ै आधै। तिन्नां पिछ़ू डेऊऐ अजर्याह, एज्रा, मशूलाम, यहूदा, बिन्यामीन, शमयाह अर जेरमयाह प्रोहत नर्शिंगै बाज़दी-बाज़दी। तिन्नां बाद शमयाहो पोचअ जोनातानो शोहरू जकर्या। तेऊए दाद-बाब तै असाप टोली का मतानियाह, मिका अर जक्कूर। तेऊ पिछ़ू डेऊए तेऊए ई टोलीए होर लोग: शमयाह, अजरेल, मिललाई, गिललाई, माई, नतनेल, यहूदा अर हनानी। तिन्नां का थिऐ परमेशरे दास राज़ै दाबेदै बणाऐं दै तिंयां साज़-बाज़ ज़ुंण सह बाज़णा लै दैआ त। इना आजू-आजू त एज्रा शास्त्री लागअ द हांढदअ। ईंयां डेऊऐ कुहै प्रऊल़ी का गहल़े दुआली प्रैंदी हांढी राज़ै दाबेदे मैहला लै डेऊणे सुआणा तैणीं, संघा फिरै राज़ै दाबेदे मैहलै बाती पोर्ही नगरी पुर्बा बाखा फणैरे प्रऊल़ी सेटा लै।
दुजअ दल ज़ुंण गाज़ै-बाज़ै संघै गिहा बोल्दी परमेशरो शूकर अर ज़ै-ज़ैकार करदी गहल़े दुआली प्रैंदै त हांढदअ लागअ द, हुंह त यहूदा मुल्खे बाकी आधै सैणैं संघै तिन्नां पिछ़ू-पिछ़ू हांढदअ लागअ द। हाम्हैं डेऊऐ गहल़े दुआली प्रैंदी बाती भठीए च़िमनी बिरलै गहल़ा तैणीं, तिधा का एप्रैम प्रऊल़ी प्रैंदी पोर्ही, पराणीं प्रऊल़, म्हाछ़ली प्रऊल़, हनानेल अर हमेआ नाओंए पुंडरी बाती भेड़ प्रऊल़ी तैणीं, खिरी किई हाम्हैं पहरीए प्रऊल़ी सेटा फेरी पूरी।
तिधी खल़्हुऐ हाम्हैं बिधाते भबना सम्हनै अर दुजअ दल बी पुजअ तिधी, संघा तै लागै दै बिधातो शूकर करदै।
एता का लाऊआ सैणैं मांझ़ै ज़ुंण आधै लोग मुंह संघै थिऐ, तिन्नां संघै तै ईंयां प्रोहत नर्शिंगै बाज़णैं आल़ै: एलीकीम, मासेया, मिन्यामीन, मिका, एलोनाई, जकर्या अर हनन्याह। तिन्नां पिछ़ू तै मासेया, शमयाह, एलीआजर, ऊज्जी, जहोहनान, मलकिजा, एलाम अर एजेर। घैरीओ सैणअ त जजर्या अर तिंयां थिऐ ज़ोरै-ज़ोरै गिहा बोल्दै लागै दै।
तधू किऐ खास्सै बल़ीदान अर सोभ लोग तै नाच़दै-गांदै लागै दै किल्हैकि परमेशरै तै तिंयां खास्सै खुश शोटै दै करी। बेटल़ी-माठै बी थिऐ सोभ तेऊ थैरा लै आऐ दै, तिन्नें खुशीओ हाल्लअ त एरुशलेम नगरी का दूर-दूर तैणीं शुण्हदअ लागअ द।
बिधाते भबने च़ाकरी
तैहा ई धैल़ी सभाल़ी थोल़ै सैणैं का तिन्नां भढारे ज़िम्मैंबारी कि बिधाते भबनै आई दी भैंट हाल़्है डाहे। होर ती इने ज़िम्मैंबारी कि ईंयां हर साल-फसला का पैहलअ भाग, फसलो दसुअ हेस्सअ अर डागै-चैणैं ज़ुंण बिधाता लै भैंट किऐ। ईंयां ई सैणैं करा तै नगरी-नगरी साल-फसलो सह भाग बी कठा ज़ेते बारै मोसा गूरे बधाना दी आसा लिखअ द कि एता दैऐ लेबी लै ज़रूर। सोभ यहूदी मणछ तै प्रोहत अर लेबीए कामां का खुश, किल्हैकि तिन्नैं किअ गहल़े दुआलीए प्रतिष्ठा लै सोभ लोग बिधी-बधान पूरअ करी शुचै। बिधाते भबने गाज़ै-बाज़ै आल़ै अर पहरी किअ आपणअ काम ज़िहअ हुअ लोल़ी त तिहअ ई ज़िहअ राज़ै दाबेद अर तेऊए शोहरू सुलैमानै सूल त बणाअं द। राज़ै दाबेद अर असाप घैरीए ज़मानै करा तै गाज़ै-बाज़ै आल़ै बिधाते शूकर अर ज़ै-ज़ैकार करने गिहा बिधाते भबनै बोली। जरूबाबेल अर नहेमये ज़मानै बी दैआ तै इज़राईली मणछ घैरी अर प्रऊल़ीए पहरी लै धैल़ तिन्नों भाग दैई। बिधाता लै पबित्र किई दी च़िज़ा दैआ तै लोग लेबी लै अर तिंयां दैआ तै तेता सोभी प्रोहता लै तिन्नों भाग बांडी ज़ुंण हारणे आद-लुआद थिऐ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.