Kulvi Outer Seraji Bible
नहेमया 11
टोलीए सैणैं ज़ुंण एरुशलेम नगरी बस्सै
इज़राईली टोलीए सैणैं बस्सै एरुशलेम नगरी, बाकी लोगै पाई परच़ी कि दसा मांझ़ै एकी टोला लागणअ पबित्र नगरी एरुशलेम बस्सणअ अर बाकी नौ टोल सका यहूदा मुल्खै होरी नगरी अर गराऊंऐं बस्सी। ज़ुंण आप्पै आपणीं खुशी दी एरुशलेम नगरी बस्सअ तेऊओ किअ तिन्नैं सुआगत। इज़राईली मांझ़ै कई लोग, प्रोहत, लेबी, बिधाते भबनै च़ाकरी करनै आल़ै, राज़ै सुलैमाने च़ाकरी करनै आल़ेए आद-लुआद डेऊऐ आपणीं-आपणीं नगरी अर गराऊंऐं संघा बस्सै आपणीं जदी ज़ैगा।
यहूदा मुल्खे सैणैं ज़ुंण एरुशलेम नगरी बस्सै तिंयां थिऐ ईंयां:
यहूदा गोत्रा मांझ़ै:
जकर्यो पोचअ उज़ियाहो शोहरू अताया। तेऊए दाद-बाब थिऐ अमर्या, शपताह अर महलेल ज़ुंण यहूदे शोहरू फिरिसे आद-लुआद थिऐ।
कोलहोजो पोचअ बारूको शोहरू मासेया। तेऊए दाद-बाब थिऐ, हजाया, अदाया, जोरीब अर जकर्या, ईंयां तै यहूदे शोहरू शेलाहे आद-लुआद।
फिरिसे आद-लुआद ज़ुंण एरुशलेम बस्सै तिंयां थिऐ पठी च़ार शौ ठाहठ शूरबीर जोधै मणछ।
बिन्यामीन गोत्रा मांझ़ै:
जोएदो पोचअ मशूलामो शोहरू सल्लू। तेऊए दाद-बाब थिऐ पदायाह, कोलाया, मासेया, इतीएल अर जेशायाह।
सल्लूए खास टबरा मांझ़ै गबाई, सालाई।
बिन्यामीन गोत्रा मांझ़ै बस्सै ईंयां पठी नौ शौ ठाई ज़ण्हैं। नगरीओ प्रधान थिअ ज़िक्रीओ शोहरू जोएल अर उप-प्रधान हसोनो शोहरू यहूदा।
प्रोहता मांझ़ै:
जोरीबो शोहरू जदाया अर जाकीन।
मशूलामो पोचअ सरयाहो शोहरू हिलकिया। तेऊए दाद-बाब तै सदोक, मरयोत अर आहीतूब ज़ुंण माहा प्रोहत थिअ। ऐहा टोलीए करा तै पठी आठ शौ बाई ज़ण्हैं बिधाते भबनै च़ाकरी।
पेलालीओ पोचअ जेरोहामो शोहरू अदाया। तेऊए दाद-बाब थिऐ अमासी, जकर्या, पशहूर अर मलकिजा। ऐहा टोलीए थिऐ पठी दूई शौ बयाल़ी सैणैं।
अहाजो पोचअ अजरेलो शोहरू अमशाई। तेऊए दाद-बाब थिऐ मशीलमोत अर इमेर। ऐहा टोलीए थिऐ पठी एक शौ ठाई ज़ण्हैं ज़ुंण जोधै थिऐ अर इनो प्रधान थिअ हगदोलीमो शोहरू जबदीएल।
लेबी मांझ़ै:
अज्रीकामो पोचअ हशूबो शोहरू शमयाह। तेऊए दाद-बाब थिऐ हशाबिया अर बूनी।
शबताई अर जोजबाद ज़हा का बिधाते भबना बाघलै कामें ज़िम्मैंबारी थिई।
असापे आद-लुआदा मांझ़ै त मिको शोहरू जबदीओ पोचअ मतानियाह। सह थिअ गाज़ै-बाज़ै आल़ैओ प्रधान।
मतानियाह संघै त दुजअ बकबुकिया।
होर त जदूतूने आद-लुआदा मांझ़ै शम्मूओ शोहरू गालालो पोचअ अबदा।
लेबी मांझ़ै तै ईंयां पठी दूई शौ चरैस्सी ज़ण्हैं ज़ुंण पबित्र नगरी एरुशलेम बस्सै।
बिधाते भबने पहरी:
अकूब, तलमोन अर तिन्नें भाई-बंधा संघी पठी एक शौ भतर ज़ण्हैं।
इना का लाऊआ बाकी इज़राईली, प्रोहत अर लेबी बस्सै यहूदा मुल्खै होरी-होरी नगरी आपणीं जदी ज़ैगा। ज़ुंण बिधाते भबनै च़ाकरी करनै आल़ै तै, तिंयां बस्सै एरुशलेम तैहा ज़ैगा ज़िधा लै ओपेल बोला। तिन्नां प्रैंदै सैणैं थिऐ सीहा अर गेस्पा।
ज़ुंण लेबी प्रैंदै सैणैं एरुशलेम तै बस्सै दै, तिंयां थिऐ बैनीओ शोहरू हशाबियो शोहरू ऊज्जी। तेऊए दाद-बाब थिऐ मतानियाह अर मिका। तिंयां थिऐ असाप टोली का ज़हा लै बिधाते भबनै गाज़ै-बाज़े ज़िम्मैंबारी थिई सभाल़ी दी। तिन्नां लै थिअ राज़ैओ बधान कि असाप टोली आल़ेए हर धैल़ै केऊ साबै अर गाज़ै-बाज़े च़ाकरी केही-केही लागणीं करनी।
सोभी इज़राईली प्रैंदै सैणअ थिअ यहूदा गोत्रा का जेराह टोलीओ मेशेजबेलो शोहरू पथाह। सह रहा त फारसी राज़ै सेटा राज़ दरबारै।
ज़ुंण लोग होरी नगरी अर गराऊंऐं बस्सै
खास्सै मणछ बस्सै तिन्नें आपणीं नगरी आपणीं ज़ैगा-ज़िम्मीं नेल़। ज़ुंण यहूदा गोत्रा का थिऐ, तिंयां बस्सै किर्यात-अराबा, दबोन अर जकबसेल नगरी अर तिन्नां नगरी नेल़ गराऊंऐं। तेता का लाऊआ बस्सै तिंयां जेशूआ, मोलदा, बेथ-पलेत, हसर्शूआल़ अर बेर्शेबा नगरी अर तिन्नां नगरी फेर गराऊंऐं, सकाल़ग अर मकोना नगरी अर तिन्नां फेर गराऊंऐं, एनरीमोन, सोरा, अर्मूत, जानोह, अदुलाम नगरी तिन्नां फेर गराऊंऐं, लकीश नगरी अर तिन्नें खेचै, अज़ेका नगरी अर तेता फेर गराऊंऐं, दखण बेर्शेबा उझै उतरा बाखा हिनोम खागा तैणीं।
बिन्यामीन गोत्रे लोग बस्सै गिबा, मिकमाश, आया, बेतेल अर तिन्नां नगरी फेर गराऊंऐं, अनातोत, नोब, अननन्याह, हाजोर, रामाह, गतैम, हादीद, सबोईम, नबलात, लूद, ओनो अर छदाणें खागै। यहूदा का बस्सै लेबी मांझ़ै कोऐ बिन्यामीन गोत्रे मुल्खै बी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.