Kulvi Outer Seraji Bible
नहेमया 4
यहूदीए दुशमणै किअ खास्सअ बरोध
ज़ांऊं सनबलातै शूणअ कि यहूदी लागै एरुशलेम गहल़े दुआली भिई च़िणदै, तेऊ आई तिन्नां लै खास्सी रोश्शै संघा लागअ तिन्नां लै गाल़ी दैंदअ। तेऊ बोलअ आपणैं साथी अर सामरी सैना लै, “ईंयां यहूदी किज़ै च़ाहा करनअ ज़ोर ता आथी निं इना का? ईंयां नगरी फेर गहल़ भिई च़ाहा च़िणनअ? इनै आसा लाअ द ज़िहअ आझ़ ई काम खतम करी उडै रिठ काटी! इना कै बडै-बडै माट्टे रूल़ा जैंदरा का दझ़ै दै पात्थर झाल़ी भिई स्केरनै?”
तेऊ सेटा त अमोन नगरीओ तोबियाह खल़्हुअ द, तिधा आजू बोलअ तेऊ, “गहल़े दुआल बी च़िणीं तिन्नैं बेघै पाक्की हेरे! तेथ प्रैंदै ज़ै शैल़ बी हांढे, दुआल पुजणीं ढूल़ी गोधै!”
पर मंऐं नहेमया किई परमेशरा सेटा एही अरज़, “हे परमेशर, तूह भाल़ ईंयां म्हारै किहै सुहांगा आसा लागै दै! ज़िहअ ईंयां हाम्हां लै सोठा, तिहअ लोल़ी इना ई लै हुअ! ईंयां लोल़ी तै कुंणी पराऐ देशा लै कैद करी निंयैं। हे परमेशर इनै ज़ुंण बूरअ किअ, तेता डाहै आद, नां इने पाप बिस्सरी आथी किल्हैकि इनै किई गहल़े दुआली च़िणने आल़ेए बेइज़ती।”
तेखअ रहै हाम्हैं गहल़े दुआली च़िणदै लागी अर तेतरी छ़ेक्की हाम्हैं आधै तैणीं उछ़टी च़िणीं किल्हैकि सोभी कामां आल़ै किअ धैल़-राच खास्सी मैन्थ करी काम।
ज़ांऊं सनबलात, तोबियाह, अरब देशे लोगा, अमोनी, अशदोदी का थोघ लागअ कि एरुशलेम नगरी फेर गहल़े दुआल आणी सदेरी छ़ेक्की अर ढूल़ै दै झ़ोथै अर कुछ़ू हेरै उझै भिई च़िणीं, तिन्नां निस्सी अह गल्ल खप्पी। तिन्नैं किअ आप्पू मांझ़ै एक्कअ कि तिन्नां सोभी छ़ेल़णअ एरुशलेम नगरी संघै जुध ताकि कामां दी बिघन पल़े! पर हाम्हैं किई परमेशरा सेटा अरज़ संघा डाहै तिन्नें ऐहा डरै धैल़-राच तिन्नां भाल़ै पहरी बशैल़ी।
यहूदी रहा तै तिन्नां धैल़ै एही गिहा बोल्दै लागी,
“बुल़्ही-बुल़्ही निं ऐबै ज़ोर-ज़ाहण ई रहै,
अज़ी आसा माट्टे कई रूल़ बागै शोटणा लै!
हाम्हां किहअ करै छ़ेक्कणी अह दुआल च़िणीं?”
म्हारै दुशमणै सोठअ इहअ, “ज़ेभै तैणीं यहूदी का थोघ लागणअ कि किज़ै हुअ, तेभा लै पाणै हाम्हां तिंयां नभैऊशै डेऊई तिंयां मारी संघा करनअ अह काम बंद।” तेखअ ज़ुंण यहूदी तिन्नां दुशमणा ओरी-पोरी तै बस्सै दै, तिंयां आऐ कई बारै हाम्हां सेटा लै अर तिन्नैं दैनी हाम्हां लै चतैनगी, “दुशमण एछणैं फेर-फिरदै हाम्हां मारदै! धैन डाहै!” तेखअ डाहै मंऐं अस्त्र-शस्त्रा आल़ै मणछ, तलबार, बर्छ़ी, कतीर-कबाण पाई गहल़े दुआली पिछ़ू तिन्नें आपणीं-आपणीं टोलीए साबै ताका दी बशैल़ी।
मंऐं भाल़ै कि लोग आसा हैल़्हुऐ दै, तेखअ बोलअ मंऐं तिन्नां, तिन्नें सैणैं अर होरी कार-करिंदै लै, “तम्हैं निं दुशमणा का डरदै लागी, ऐहा गल्ला डाहै आद म्हारअ मालक बिधाता आसा महान अर तेऊ का लागा सोभी डरनअ। तम्हैं करै आपणैं भाई-बंध, शोहरू-माठै, बेटल़ी अर आपणैं घअरे तैणीं।” म्हारै दुशमणा का गअ थोघ लागी कि हाम्हां का गअ तिन्नें एक्कै करने बारै थोघ लागी अर तिन्नां का बी गअ ऐबै ज़ाण्हुंई कि तिन्नें सोठी दी बिक्री निं बिधाता सफल हणैं दैनअ। तेखअ लागै हाम्हैं सोभै गहल़े दुआली भिई च़िणदै।
तधा बाद करा तै आधै लोग काम अर आधै रहा तै बर्छ़ै, तलबार, कबाण, ढाल़ लई पहरी बेशी। म्हारै सोभी यहूदी सैणैं बी दैनअ लोगो पूरअ साथ ज़ुंण गहल़े दुआली भिई च़िणदै तै लागै दै। ज़ुंण काठा-पात्थरा ढोंदै तै लागै दै, तिंयां करा तै एकी हाथै काम अर दुजै हाथै हआ त किज़ै नां किज़ै शस्त्र ढाकअ द! ज़ुंण च़णाई करदै हआ तै तिन्नैं हआ ती आपणीं कुछी तलबार डाही दी बान्हीं। नर्शिंगै बाज़णैं आल़अ हआ त कबल्लअ मुंह सेटा रहअ द। मंऐं खोज़अ सैणैं, कार-करिंदै अर लोगा लै, “म्हारअ काम आसा खास्सअ लाम्मअ अर हाम्हैं आसा गहल़े दुआली दी एकी-दुजै का दूर-दूर कामां लागै दै, ज़िधा का नर्शिंगअ शुण्हिंए, तिधी हऐ सोभ कठा, हाम्हां बाखा जुध करनै आल़अ आसा म्हारअ परमेशर आप्पै।” इहअ करै रहा तै हाम्हैं धैल़ दोत्तकै तारै का उडकै तारै तैणीं आधै मणछ कामां लागी अर आधै रहा तै बर्छ़ी पाई पहरै दी बेशी।
तेखअ बोलअ मंऐं कामां आल़ै अर तिन्नां प्रैंदै सैणैं लै कि तिंयां करै बैल़ी एरुशलेम नगरी रही ताकि तिंयां बैल़ी म्हारी फाज़त लै पहरअ करे अर धैल़ी काम करे। हुंह निं बैल़ी सुत्तदा आपणैं झिकल़ै बी खोल्हदअ त, नां मेरै साथी, नां शोहरू, नां कामां आल़ै झिकल़ै खोल्ही सुत्तदै आथी तै अर नां मेरै पहरी। पाणींए कुहै सेटा बी डेओआ तै हाम्हैं अस्त्र-शस्त्र संघा निंईं।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.