Kulvi Outer Seraji Bible
नहेमया 5
यहूदी जैंदरी गरीब मणछा लै मार
थोल़ै धैल़ै बाद लागै यहूदी मांझ़ै खास्सै मर्ध अर बेटल़ी आपणैं साथी यहूदी भाई-बंधे खरी खोज़दै। कोई खोज़ी एही खरी, “हाम्हैं आसा खास्सै टबर, तेते साबै लोल़ी हाम्हां खास्सी ज़िणस भेटी कि हाम्हैं सोभै ज़िऊई सके।”
कोई बोलअ इहअ, “नकाल़ा पिछ़ू पल़ै हाम्हां आपणैं दाखे बाग अर घअर रैहण डाहणैं कि हाम्हैं होर नाज़ लई सके!”
कोई लागै इहअ बोल्दै, “राज़ै लै कारै भरनै पिछ़ू पल़अ हाम्हां आपणीं ज़ैगा अर दाखे बाग रैहण डाही ढब्बअ ऋण काढणअ! हाम्हैं बी आसा तिहै ई यहूदी ज़िहै तिंयां होर आसा! हाम्हां बी आसा आपणैं शोहरू-माठै पैरै ज़िहै तिन्नां आसा! पर हाम्हां पल़ै आपणैं शोहरू गलामी लै बेच़णैं! अर म्हारी कई शोहरी हेरी ज़ोरा-ज़ोरी गलामी लै निंईं! ऐबै निं हाम्हां का किछ़ै बच़अ किल्हैकि म्हारी ज़ैगा-ज़िम्मीं अर दाखे बाग हेरै पठी हाम्हां का छ़ड़ैऊई!”
ज़ांऊं मंऐं तिन्नें खरी शूणीं, मुंह आई बेघै खास्सी रोश्शै। मंऐं सोठअ तेभी कि ऐबै हुअ किज़ै करनअ। मंऐं दैनी यहूदी सेठ अर कार-करिंदे घोट राल़ी, “तम्हैं मारा आपणैं ई भाई-बंधा बैज़ मांगी!”
तेखअ किअ मंऐं ऐहा गल्ला पिछ़ू बडअ झाल़अ अर तैहा सभा दी बोलअ मंऐं, “म्हारी ज़ेतरी समरता थिई, हाम्हैं आणै हथू म्हारै यहूदी भाई-बंध होरी देशे गलामी का मोल दैई कुआसी। ऐबै लाऐ दै तम्हैं आपणैं ई भाई-बंध ज़ोरा ज़ोरी आपणैं गलाम बणाईं!” तिंयां सोभ हुऐ च़ुप्प अर तिन्नां निस्सी हुल़णीं नां घुआल़णीं एछी।
तेखअ बोलअ मंऐं इहअ, “ज़ुंण अह काम तम्हैं किअ, अह आसा गलत! हाम्हां लागा एही ज़िन्दगी ज़िऊंणीं ज़ेता करै परमेशरो अदर हआ, ताकि म्हारै दुशमण पराई ज़ातीए लोगा का हाम्हां दी खोट निं शुझिए!” तेखअ बोलअ आजू मंऐं इहअ, “हुंह बी दैआ लोगा लै ढब्बै अर नाज़ो ऋण अर मेरै भाई-बंध अर मुंह संघै काम करनै आल़ै बी करा इहअ ई, पर हाम्हां निं तिन्नां का तेतो बैज़ ढाकणअ आथी। ऐबै करा तम्हैं इहअ कि तिन्नों सारअ ऋण करा माफ अर तिन्नें दाख अर जैतूने बाग अर घअर दैआ तिन्नां लै बापस फरेऊई। एता का लाऊआ ज़ुंण तम्हैं दाखो रस, तेल ज़ुंण तम्हैं तिन्नें साल-फसला का मांगा तै, तेतो दैआ तिन्नां लै शौ गुणा ढब्बै बापस।”
तिन्नैं सैणैं दैनअ ज़बाब, “हाम्हां करनी सोभै गल्ला तेही ई ज़िहअ तंऐं बोलअ। हाम्हां करनअ तिन्नों ऋण माफ संघा दैणीं तिन्नें ज़ैगा-ज़िम्मीं बापस।”
तेखअ शादै मंऐं प्रोहत संघा बझ़ैल़ी तिन्नां सम्हनै तिन्नां सैणैं का कसमा खैऊंणैं कि तिंयां बादा का नांईं हुधिए अर तिंयां ज़िहअ बोलअ तिहअ ई करे। तेखअ फल़ाक्कअ मंऐं आपणैं झिकल़ैओ पाल्लअ संघा बोलअ इहअ, “ज़ै तम्हैं आपणीं ज़बानी का हुधिए, तै फल़ाक्कणैं परमेशरा तम्हैं बी इहै ई। तै करनै तम्हैं बी तेऊ थारै घअरा का सारी ज़ैदात दूर करी इहै ई सोभी गल्ला का रित्तै।”
तिधी सभा दी बोलअ सोभी लोगै, “एवमस्तू1।” संघा किई सोभी बिधाते ज़ै-ज़ैकार। संघा किअ सोभी तिहअ ई ज़ेही तिन्नैं ज़बान ती दैनी दी।
नहेमया किई तत्त-दिला का च़ाकरी
हुंह बणाअं अर्तक्षत्र माहा राज़ेए राज़ा दी बिहुई साला पोर्ही तेऊए राज़ा दी बत्तूई साला तैणीं यहूदा मुल्खो राज़पाल। इना बारा साला दी नां मंऐं अर नां मेरै रिश्शतैदारै सह ज़िणस खाई ज़ुंण राज़पाला भेटा ती। पर मुखा आजी ज़ुंण राज़पाल थिऐ, तिंयां पाआ तै सारअ बोझ़ परज़ा लै, तिंयां गराहा तै परज़ा का हर धैल़ै च़ाल़्ही च़ंदीए सिक्कै, रोटी अर दाखो रस। तिन्नें नोकर-च़ाकर तोही गराहा तै लोगा का आप्पू लै ढब्बै! पर मंऐं निं तिन्नां ज़िहअ काम किअ किल्हैकि हुंह रहा त बिधाते डरा हेठै। मंऐं लाअ आपणअ सारअ ज़ोर गहल़े दुआली च़िणना लै अर मंऐं निं आप्पू लै किछ़ै ज़ैदात खटी। ज़ुंण मेरअ काम करा तै, तिंयां थिऐ सोभ तिधी गहल़े दुआली च़िणदै। धैल़ हआ ती मुंह सेटा खाणैं आल़ै एक शौ पज़ाह ज़ण्हैं यहूदी अर तिन्नें सैणैं। एता का लाऊआ हआ तै ओरी-पोरी देशा का पराई ज़ातीए लोग बी आऐ दै। हर धैल़ै काटा तै हेल़्ही मांझ़ा का एक बल्द, छ़ह मोट्टी-मोट्टी भेडा अर कई मुर्गै अर हर दसुऐ धैल़ै करा त हुंह ताज़ै दाखे रसो इंतज़ाम। पर तज़ी बी निं मंऐं सह हक मांगअ ज़ुंण राज़पाला परज़ा का भेटा त।
मंऐं किई एही अरज़ कि ज़ुंण बी मंऐं आपणैं लोगा लै किअ, तेते बदल़ै दैए बिधाता मुल्है आप्पै बर्गत।
Source notes (1)
- Footnote एवमस्तू मतलब इहअ ई लोल़ी हुअ
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.