Kulvi Outer Seraji Bible
नहेमया 7
ज़ांऊं हाम्हैं नगरी फेर गहल़ च़िणीं छ़ेक्कअ अर प्रऊल़ी दी पाल्लै लाई छ़ेक्कै, तेखअ आऐ बिधाते भबने पहरी, घैरी अर होर लेबी संघा सभाल़अ तिन्नां का तिन्नों काम। मंऐं बणाअं आपणअ भाऊ हनानी अर दाबेदपूर गहल़ो सैणअ हनन्याह एरुशलेम नगरीए सैनापति। किल्हैकि हनन्याह त शुचअ-पाक्कअ अर परमेशरे डरा हेठै रहणैं आल़अ मणछ। मंऐं बोलअ तिन्नां लै इहअ, “ज़ेभै तैणीं चटाक्क धुप्पअ निं लागे, तेभै तैणीं निं एरुशलेम नगरीए इना प्रऊल़ी घुआल़णै दैई। पहरीए छ़ुट्टी डेऊणैं का आजी लोल़ी उडै प्रऊल़ी हूल़ी छ़ेक्की। एरुशलेम नगरी का छ़ांटे पहरै लै मणछ ज़ुंण ज़ैगै-ज़ैगै गहल़ा फेरी दैंदै रहे लागी अर होर करै आपणैं-आपणैं घअरा सम्हनै पहरअ।”
तिंयां मणछ ज़ुंण गलामी का बापस फिरै
(एज्रा 2:1-70)
एरुशलेम थिई खास्सी बडी नगरी पर लोग नांईं तै तेतरै खास्सै आथी बस्सै दै, अर नां खास्सै घअर आथी तै च़िणैं दै। परमेशरै पाई मेरै दिलै एही गल्ल कि हुंह लोगा अर तिन्नें सैणैं अर कार-करिंदै झाल़ूं अर तिन्नें खिंबे साबै तिन्नें गणांई होए। मंऐं लोल़ै बही दी तिन्नें नाअं ज़ुंण सोभी का आजी गलामी का फिरी आऐ। तेथ त इहअ लिखअ द:
ज़ुंण बाबेल देशे राज़ै नबूकदनेसरै कैद करी निंयैं तै, तिन्नां मांझ़ै आऐ कई राज़धानी एरुशलेम अर यहूदा मुल्खे आपणीं-आपणीं नगरी लै फिरी। तिन्नें सैणैं थिऐ जरूबाबेल, जेशूआ, नहेमया, अजर्याह, रामाह, नहमानी, मुर्दकाई, बिलशान, मिसपरेत, बिगबाई, नहूम अर बानाह।
इज़राईले टोली मांझ़ै ज़ुंण फिरी आऐ, तिंयां थिऐ टोली अर खिंबे साबै एतरै ज़ण्हैं ज़ुंण बाबेल देशे गलामी का आऐ फिरी:
पारोश टोलीए आऐ पठी दूई हज़ार एक शौ भत्तर ज़ण्हैं गलामी का फिरी।
शपताह टोली का आऐ चअन शौ भत्तर ज़ण्हैं।
आराह टोली का आऐ छ़ह शौ बुंजा ज़ण्हैं,
पहात-मोआब टोली का आऐ जेशूआ अर जोआबे आद-लुआदा मांझ़ै दूई हज़ार आठ शौ ठारा ज़ण्हैं।
एलाम टोली का आऐ एक हज़ार दूई शौ चरुंजा,
ज़ाटू टोली का आऐ आठ शौ पंजताल़ी ज़ण्हैं,
जक्कई टोली का आऐ सात शौ शाठ ज़ण्हैं,
बिनूई टोली का आऐ छ़ह शौ अड़ताल़ी ज़ण्हैं,
बेबाई टोली का आऐ छ़ह शौ ठाई ज़ण्हैं,
अजगाद टोली का आऐ दूई हज़ार चअन शौ बाई ज़ण्हैं।
अदोनीकाम टोली का आऐ छ़ह शौ सताहठ ज़ण्हैं,
बिगबाई टोली का आऐ दूई हज़ार सताहठ ज़ण्हैं,
आदीन टोली आल़ै आऐ छ़ह शौ पजुंजा ज़ण्हैं।
हिजकिया टोली का आऐ अतेरे आद-लुआद ठैनुऐं ज़ण्हैं।
हशूम टोली मांझ़ै आऐ चअन शौ ठाई ज़ण्हैं,
बेसाई टोली मांझ़ै आऐ चअन शौ च़ौबी ज़ण्हैं,
हारीप टोली का आऐ एक शौ बारा ज़ण्हैं,
गबोन टोली का आऐ पजैनुंऐं ज़ण्हैं गलामी का फिरी।
ज़सरै दाद-बाब इना होरी नगरी रहा तै तिंयां थिऐ एतरै:
बेतलेम अर नतपाह नगरीए आऐ एक शौ ठास्सी ज़ण्हैं,
अनातोत नगरीए आऐ एक शौ ठाई ज़ण्हैं,
बेथ-अज़मबेथ नगरीए आऐ बयाल़ी ज़ण्हैं,
किर्यात-ज़रीम, कपीरा अर बरोत नगरीए आऐ सात शौ तरताल़ी ज़ण्हैं।
रामाह अर गिबा नगरीए आऐ छ़ह शौ इक्की ज़ण्हैं,
मिकमाश नगरीए आऐ एक शौ बाई ज़ण्हैं,
बेतेल अर एई नगरीए आऐ एक शौ त्रेई ज़ण्हैं।
दुजी नेबो नगरीए आऐ बुंजा ज़ण्हैं,
दुजी एलाम नगरीए आऐ एक हज़ार दूई शौ चरुंजा ज़ण्हैं।
हारीम नगरीए आऐ चअन शौ बिह ज़ण्हैं।
जेरिहो नगरीए आऐ चअन शौ पंजताल़ी ज़ण्हैं,
लूद, हादीद अर ओनो नगरीए आऐ सात शौ इक्की ज़ण्हैं अर
सेनाह नगरीए आऐ चअन हज़ार नौ शौ तिह ज़ण्हैं बाबेल देशे गलामी का फिरी।
प्रोहते टोली मांझ़ै ज़ुंण बाबेल देशे गलामी का फिरी आऐ तिंयां थिऐ ईंयां:
जेशूए आद-लुआद जदाया प्रोहते आद-लुआदा मांझ़ै आऐ नौ शौ त्हेतर ज़ण्हैं,
इमेरे आद-लुआदा मांझ़ै आऐ एक हज़ार बुंजा ज़ण्हैं,
पशहूरे आद-लुआदा मांझ़ै आऐ एक हज़ार दूई शौ संताल़ी,
हारीमे आद-लुआदा मांझ़ै आऐ एक हज़ार सतारा ज़ण्हैं।
लेबी टोली मांझ़ै ज़ुंण गलामी का फिरी आऐ:
होदाबये आद-लुआदा मांझ़ै जेशूआ अर कदमीएले लुआदा मांझ़ै चुहत्तर ज़ण्हैं।
घैरी मांझ़ै असापे आद-लुआद आऐ एक शौ अड़ताल़ी ज़ण्हैं,
बिधाते भबने प्रऊल़ी पहरी शलूमे आद-लुआदा मांझ़ै, अतेर, तलमोन, अकूब, हतीता अर शोबाईए लुआदा मांझ़ै आऐ एक शौ ठत्ती ज़ण्हैं।
बिधाते भबनै च़ाकरी करनै आल़ै मांज़ै ज़ुंण गलामी का फिरी आऐ, तिंयां थिऐ ईंयां:
सीहा, हसूपा तबाओते आद-लुआद,
केरोस, सीआ, पदोने लुआद,
लिब्ना, हगाबा अर शालमाईए लुआद,
हनान, गदेल, गहरे लुआद,
रायाह, रसीन नकोदे लुआद,
गज़ाम, उज्ज़ा अर पसेहे लुआद,
बेसाई, मूनीम, नपूशासे लुआद,
बकबूके लुआद, हकूपा, हरहूरे लुआद,
बसलीत, महीदा अर हरशे लुआद,
बारकोस, सिसरा, तेमाहे लुआद,
नसीह अर हतीपे लुआद।
राज़ै सुलैमाने दासे टोली मांझ़ै ज़ुंण गलामी का फिरी आऐ तिंयां थिऐ:
सोताई, सोपरेत अर परीदे लुआद,
जालाह, दरकोन, अर गदेले लुआद,
शपताह, हतील, पोकरेत-हाजबीम अर अमोने लुआद।
राज़ै सुलैमाने दास अर बिधाते भबनै च़ाकरी करनै आल़ै ज़ुंण गलामी का फिरी आऐ, तिंयां थिऐ पठी चअन शौ बैनूंऐं ज़ण्हैं।
छ़ह शौ बयाल़ी ज़ण्हैं आऐ दलाया, तोबियाह अर नकोदा टोली आल़ै संघै तेल-मेलाह तेल-हरशा, करूब, अदोन अर इमेर नगरी का, पर तिंयां निं ऐहा गल्लो सबूत खोज़ी सकै कि तिंयां बी आसा इज़राईलीए आद-लुआदा ई मांझ़ै।
प्रोहते टोली मांझ़ै बी थिऐ इहै कई ज़ुंण आपणैं इज़राईली खिंबे हणैंओ सबूत निं दैई सकै, तिंयां थिऐ ईंयां: हाबिया, हकोज़ अर बर्ज़िले आजू आद-लुआद। प्रोहते टोली मांझ़ै बर्ज़िलै थिअ गलाद मुल्खे बर्ज़िले नाओंए एक मणछे शोहरी संघै बैह किअ द संघा च़लाऊई आपणीं टोली आपणैं शौहरे नाओंऐं। तिंयां निं ऐहा गल्लो सबूत दैई सकै कि तिंयां बी आसा प्रोहत अर तैही निं तिंयां मनै आथी संघा डाहै प्रोहतच़ारी का दूर। यहूदी राज़पालै किअ तिन्नां लै नांह कि तिंयां निं बिधाता लै छ़ाडै दै भोज़ना का खाई। तेता खाणेंओ हक आसा सिधअ तिन्नां प्रोहता लै ज़हा का ऊरीम तूरीम आसा।
गलामी का फिरी एछणैं आल़ै इज़राईली तै पठी बयाल़ी हज़ार चअन शौ शाठ ज़ण्हैं।
एता का लाऊआ थिऐ मर्ध अर बेटल़ी दास सात हज़ार चअन शौ सैईंती ज़ण्हैं,
घैरी थिऐ मर्ध अर बेटल़ी पठी दूई शौ पंजताल़ी।
तिन्नें घोल़ै थिऐ सात शौ छत्ती
खच़रा ती तिन्नां संघै दूई शौ पंजताल़ी।
च़ार शौ पैंईंती ऊँट अर
छ़ह हज़ार सात शौ बिह गाधै।
बिधाते भबने भिई मराम्मत करना लै किई कई खास-खास सेठ मणछै मज़त:
राज़पालै दैनै
8 किलू
सुन्नअ
50
पज़ाह कऊली
530
प्रोहते च़ोल़ै
सोभी टोलीए सैणैं दैनअ
153 किलू
सुन्नअ
1,458 किलू
च़ंदी
होरी आम लोगै दैनअ
153 किलू
सुन्नअ
1,325 किलू
च़ंदी
67
प्रोहता लै च़ोल़ै
इहअ करै बस्सै प्रोहत, लेबी, बिधाते भबने पहरी अर बिधाते भबनै च़ाकरी करनै आल़ै, गाज़ै-बाज़ै आल़ै अर होर आम लोगा मांझ़ै सोभ इज़राईली यहूदा मुल्खै आपणीं-आपणीं नगरी।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.