MALAKO

Nsango Ndɔti nga bɔkɛtɛki

Malako

Ebandelo

O menkanda mɛnɛi me Nsango Ndɔti enka Yesu, mɔkɛtɛki Malako mole mopenda boube mpe mopenda noyalela.

O mɛlɔngɔ me boho, Malako aɛnia Yesu lo «Ngana onka Nyambe» (1, 1). Ya motu molobo mwemonya, lendaka moimenyama mbala nzike o Nsango Ndɔti enkuma (1, 11; 9, 7; lenda mpe 3, 11; 5, 7), ɛbɔtɔ nobomama kwokwo nyaima nsa o mpoha enka Yesu (Lenda mpe 3, 12; 5, 43; 7, 24; 8, 30; 9, 30). Itina be? Na itina ɛɔhɔ nɔhwama nko na nyambeli Oiko owakaki o ekulusu, lolenge lwambaki nkumu enka bamani monkama.

O lolenge loiko, Yoane Moini abataki lotomo nɔkɔlɔngɔnia bato banka Nyambe (1, 2-8). Ele na boili nde Yesu mpe ainamaki (1, 9-11).

Yesu amekamaki o bokaika (1, 12-13). O mbiha, aobanda nwɛnia polele ntomo inande o iyɔngɔ i bato. Aiko Malako aɛnia na ipeta mbala nzike bonkumu bonka Yesu, o elaka elakaka nde mampinga na mpe ebikiaka nde bakɔni (1, 14; 8, 30).

O eteni eipe enka nkɛti inande, Malako aɛnia lolenge lohaka Yesu o mɛnyɔkɔ, na iwa mpe na makundwelo mamolila o Yelusalema (8, 31; 10, 52). Alwebia onka baekoli banande mbala ihato, ya tabaɔhɔlɔ. Ambotepelake penda na boili nde mɔmɛnɛ noyahɔlɔ lo «Ngana onka Moto», ya liko ibombi ilingola bomoto bonande ile na ilɔkɔ bɔnɛnɛ.

O Yelusalema, Yesu ɔtwaki na loumu, aɔbɛlia batɛki o itumba i Nyambe mpe baoyakekia na bakɛndii ba Isalaɛlɛ. Onka nde eliki epohe e ilako i mbiha onka malanga manande, onka impinga, mpe onka baekoli banande (ikapo 11-13).

Makapo ma 14-15 mabuliama o maina mape ma mbiha manka Yesu. Ele ɔkɔ ongwɛnɛne nkɛti i mbiha i elambo ɛlɛ nde na banande (nkapola mputa na balɔkɔ impa na vinyo), lobondela lonande kaika o itia i getesemani, ikamba inande, mbakema enande o ekulusu, mpe nkundami enande. Lendaka o mbiha e iwa inande, bainto baotana iyita inande boponga mpe baoywamba mbɔ aokundwa o iwa ale na bɔmɔi (16, 1-8). Bayabombaki lo baeywa (nkɛti inkina ihangia mbɔ inkina itepela na boube nyɛniami enka Yesu ekundwaki mpe nziyeyami e nande; nkɛti ilɔkɔ iyɛniama o nenge inkuma o menkanda menkina).

O mbiha e ntangi Nsango Ndɔti nga bɔkɛtɛki Malako, bongweba na inyo lo ɔmɔ o bakɛndii banka Loma, mbɔ Yesu e mohi Nazaleta «aliki hɔlɔ Ngana onka Nyambe» (15, 39)?