Skip to content
BibleKenya

Lontomba

MALAKO 5

Yesu aobikia moto otungiamaki na melimo mebe

(Lenda mpe Mat 8, 28-34; Luk 8, 26-39)

O mbiha, baiyaki nsemboka eni enkina e ibeke i ebale, o mokokolo monka Bagelasa1. Ohapwaki Yesu o bwato, moto ɔmɔ otungiamaki na molimo mo bompunda aimaki o maita, ayakaki nko elaka eiko nokumana na nde. Akihaka o maita mpe moto nsa na ɔmɔ taisia nɔhɔ nomokanga nsa na bwamba; na itina bilaka bike akangemaki na mehinga mpe na maamba, ya atenakaka mehinga meiko na maamba. Nsa na moto ɔmɔ tayala na nguya nomoimba. Na miane na matio, ambokihake nko o maita mpe o menkondo, nototwaka mpe noyakɛtɛkɛ na mabɔkɔ. Ɔɛnɛki nde Yesu iteta; na boiko, apuhwaki mpe akukamaki na mabɔngɔ o boho bonande, mpe atotwaki na nguya: «Londi wɛ na mi be, Yesu, Ngana onka Nyambe Ependa Kaa? Nakɔbɔndɔ o lina inkana Nyambe tontungiake!» Na itina Yesu amwebiaki mbɔ: «Molimo mo bompunda, bɛlɛ o iyɔngɔ inka moto ɔnɛ!» Yesu amoubolaki bɔnɛ: «Lina iwɛ be?» Amoisenyaki ndɛmbɔ: «Lina imi “Impinga”, na itina tole boike.» Mpe amɔbɔndɔki na ipeta noyala nko batinda o mokokolo monkina. Lendaka mpiko o lokenge lo monkondo, eliki na botonga bo bɔnɛnɛ bo ngulu2 bombokombake biomba nɔlɛ. Melimo me bompunda mɛbɔndɔki Yesu ntepela mbɔ: «Ototinde onka ngulu olongi mbɔ tɔtɛle tumbu o ilɔkɔ!» Amepaki epohe. Na boiko, mɛbɛlɛki nɔtɛlɛ o ngulu mpe botonga bokulumwaki noyaboka nyaima o mekilibongo ki o ebale. Eliki bɛlɛbɛlɛ ngulu nkoto ipe ilindaki mpe iowa. Boiko baibongolaki balotaki mpe batombaki nsango o inanga mpe o ngando. Mpe bato bayakaki nolenda lokelamaki. Baoyoye bɛlɛbɛlɛ na Yesu mpe baoywɛnɛ moto oiko otungiamaki na molimo mo mobe: akihi, alɔtɔ bitobo mpe ale hilɛ: nde otungiamaki na impinga i melimo me mebe. Mpe baokaki bɔɔmɔ. Baiko baɛnɛki babahɛkwelaki lilekaki onka moto otungiamaka na molimo mo mobe mpe ilekaki onka ngulu. Boiko baɔbɔndɔ Yesu mbɔ atangwe o mokokolo mo balɔkɔ. Okondelaki Yesu o bwato, oiko otungiamaka na molimo mo mobe amɔbɔndɔki mbɔ ayale mputa na nde. Yesu tamopa epohe, ya aomwebia mbɔ: «Nsɔ o itumba iwɛ onka bokundu bɔ wɛ, mpe obahɛkwele liokokelela Nkolo na boili molika monande.» Na boiko, moto oiko ahaki mpe abandaki nolalolake o Dekapoli inkuma imokelelaki Yesu; mpe bankuma baemwaki.

Ngana o ngainto onka Yailo na ngainto okataki etobo enka Yesu

(Lenda mpe Mat 9, 18-26; Luk 8, 40-56)

Oisiaki Yesu o bwato nopendia nsemboka eni e ibeke i ebale, impinga i inɛnɛ i bato iputanaki bɛlɛbɛlɛ na nde aiko oliki nde o ibongo. Ɔmɔ o bakɛndii ba itumba i mondela inka Bayuda, lina Yailo, ayakaki. Ɔɛnɛki nde Yesu, aoyauha o makaka manande mpe aɔmɔbɔndɔ na ipeta ntepela mbɔ: «Ngana omi o ngainto o ɛlɛngɛ akatana na iwa, yakaka omohangie makata olongi abike mpe ayale na bɔmɔi!» Yesu ahaki mputa na nde. Impinga i inɛnɛ imoiyelaki mpe imɔmɛnyɛki.

Eliki na ngainto ɔmɔ otungiamaki na ikoni intangi makila mebu liomu na mepe. Anyɔkwamaki penda onka menganga meike, mpe abungiaki binkuma biliki nande boiko tabata bwenzi; nsande, ikɔni ipendaki nko mpependa. Boiko ngainto oiko aokaki litepwamaki onga na Yesu. Ayakaki o mbiha enka impinga, mpe aokaki etobo enande. Na itina ayahangelaki: «Kaki naokata nsa bitobo binande, nangobikiama.» Nko o elaka ɛlɔkɔ, makila matangaki matenaki mpe aokaki o bionge binande mbɔ aobikiama o liale inande. Nko o elaka ɛlɔkɔ, Yesu aokaki mbɔ nguya ɛɔbɛlɛ o iyɔngɔ inande. Abutwaki o iyɔngɔ i impinga mpe atepelaki: «Ombokate bitobo bimi nɔni?» Baekoli banande bamoisenyelaki: «Ɔɛnɛ impinga ikɔmɛtɛ mpe oubola: “Ombonkate nɔni?”» Ya Yesu alendaki mbiha na mbiha nwɛnɛ ngainto nɔni olokelaki. Boiko ngainto aoyoka bɔɔmɔ mpe aobilima nweba loiko lomoiyelaki; ahaki noyauha o makaka manka Yesu mpe aomwebia iliɔlɔ inkuma. Ya Yesu ndɛmbɔ: «Ngana o mi o ngainto, bwambi bɔwɛ bokobikia. Nsɔ na nyɛ mpe bikiama o liale iwɛ.» Nko aiko otepelaki nde boiko, metwantomo mioyoima onka mɔkɛndii mo itumba i mondela inka Bayuda mpe miomwebia bɔnɛ: «Ngana ɔwɛ o ngainto aowa. Itina isia wɛ notungia Molaki be?» Ya Yesu tabapwa na moiye, aohangela mɔkɛndii mo itumba i mondela: «Tokake bɔɔmɔ, aamba nko nyamamba.» Mpe tapa epohe onka moto nsa ɔmɔ noha mputa nande, umonya nko Petelo, Zake na Yoane, mohikɔlɔ o mwele onka Zake. Oiyaki balɔkɔ o itumba inka mɔkɛndii mo itumba i mondela, Yesu aoywɛnɛ boyapoma bato, na bilelo mpe mianze na nsimo. Aɔyɔtwa mpe aobaebia bɔnɛ: «Itina iyapoma inyo na bilelo be? Ngana tawili ya aɔngi ilɔ.» Ya bamɔhɛkɛki. Na boiko, abɛliaki bato bankuma o nanda mpe apwaki mputa nande, ihe na nyango enka ngana mpe bakɛndɛki nande, boiko aɔtwaki mpiko oliki ngana. Amokataki o ikata mpe aomohangela ndɛmbɔ: «Talita kumi!» nimbo mbɔ «Ɛlɛngɛ e ngainto, nakwebia, tɛlɛmɛ!». Nko o elaka eiko, ɛlɛngɛ e ngainto aɔtɛli mpe aobanda nɔkɛndɛ naitina aliki na mebu liomu na mepe. Nkaiko, bankuma bakakatanaki. Ya Yesu abakokomiaki mbɔ moto nsa ɔmɔ talwebake; mpe abahangelaki mbɔ: «Bopa ɛlɛngɛ e ngainto biomba bi ndei.»

Source notes (2)
  1. Footnote Nwɛlia na Mat 8.28 mpe nkɛti ile o nse.
  2. Footnote Lew 11.7 mpe Dut 14.8.

Lontomba. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.