MALAKO 4

Ekolongo enka mobweyi

(Lenda mpe Mat 13, 1-9; Luk 8, 4-8)

1Yesu aisiaki nolaka o ntundu e ibeke i ebale. Impinga i bato ikokanaki bɛlɛbɛlɛ nande, na boili boike bo bato aokondela o bwato bɔmo mpe aokihi. Impinga inkuma i bato iliki o mokonda ntakatolo na mai. 2Abalakaki mbo boike o bikolongo mpe o ilako inande aobaebia bɔnɛ: 3«Bolangola! Boina bɔmɔ, mobweyi ɔmɔ abɛlɛki nobweyake. 4Lendaka, obweyaki nde, ngano maopo maokita o ntundu e mboka: mpulu ioyoye mpe iɔlɛ mankuma. 5Mamɔ makitaki o manda e mabɔkɔ epa lɔbɔmbi taloyala loike. Na ihali, mapundwaki itina lɔbɔmbi taloyala na mpipa. 6O elaka ebalaki mwane mpe, na boili mekanga tameyale meike maomaki. 7Mamɔ mpe makitaki ɔ nsɛndɛ. Nsɛndɛ ioywanga mpe ioyikimia miɔbɔlɔ, mpe tamɛtɔ mambo. 8Mamɔ maopo makitaki o lɔbɔmbi lo bɔmpou; maopundwa mpe maoyoula, maɔtɔ mpongo: imɔ iɔbɛlia mambo ntuku ihato, inkina ntuku motoba mpe imɔ monkama.» 9Mpe Yesu atepelaki nɛmbɔ: «Oiko ole na matoi manzoki, aoke!»

Itina be Yesu ahɛkɔlɔki o bikolongo

(Lenda mpe Mat 13, 10-17; Luk 8, 9-10)

10Oliki Yesu nde kaika o manda, bato bamolingolaki mputa na baekoli liomu na bape baomoubola na boili bikolongo. 11Yesu aobabekwela bɔnɛ: «Na boili inyo, inɛ ibombi i Bonkumu bonka Nyambe ibopaemena; ya onka baiko bale o nanda, inkuma ioyokana lo bikolongo, 12olongi mbɔ

“nsa balenda, bapwɛne

mpe nsa baoka, bapɔhɔle

ntiki tabaenza meloko mpe tabaohabinyama1!”»

Yesu aolimbola ekolongo enka mobweyi

(Lenda mpe Mat 13, 18-23; Luk 8, 11-15)

13Mpe Yesu aobaebia: «Bɔpɔhɔle ekolongo ɛnɛ? Na boiko bɔngɔhɔlɔ bikolongo binkuma bolobe? 14Mobweyi abweya Ilako enka Nyambe. 15Lenda bale o ntundu e mboka obweyama Ilako: oka balɔkɔ Ilako, Satana aoyoye nko o elaka ɛlɔkɔ mpe aoyoumonya Ilako imbobweyame onka balɔkɔ. 16Nko o lolenge lɔlɔkɔ, lenda baiko baobweyama o manda i mabɔkɔ: balɔkɔ kaki baoka Ilako, baoyoiyamba na ihali na ibulwako. 17Ya o iyɔngɔ i balɔkɔ taimbe na mekanga, bale bato ba elaka ɛmɔ. Mpe kaki liale na mɛnyɔkɔ bioya na boili Ilako, baokita o bwambi. 18Mamɔ maobweyama ɔ nsɛndɛ: ele baiko baoka Ilako, 19ya mekiɛtɛno me molongo, nengwami e mbati mpe na mpoha inkina imbe ioyɔtwa mpe ioyoikimia Ilako iya na bohenga bo mambo. 20Lendaka banɛ bahikamaki o lɔbɔmbi lɔ bɔmpɔu: baiko baoyoka Ilako, baoiyamba mpe iobota mambo, inɛ ntuku ihato, imɔ ntuku motoba mpe inkina monkama.»

Ekolongo na boili mbaka

(Lenda mpe Luk 8, 16-18)

21Boiko Yesu abaebiaki bɔnɛ: «Mbaka engoya mbɔ etikame o nse e eboko na mpe o nse e nkengo? Tembe mbɔ etikame o liko i ehatielo2? 22Na itina inkuma ibombi ingwɛnɛnɛ polele o boina bo bɔnɛnɛ, mpe inkuma ile o nkuku ingomɛngiama bwe bwe. 23Kaki oiko ole na matoi manzoki, aoke!» 24Yesu abaebiaki: «Boyabakaka na liko ioka inyo! Ele nko lwɛli lwɛlia inyo, longobwɛlielama mpe longobopaemena penda. 25Na itina oiko ole na yomba engomopaemena; ya onka oiko opa tambe na, nsa eiko ele nande engomolamwamema.»

Ekolongo na boili boopo bopundwa bɔlɔkɔ kaika

26Yesu atepelaki bɔnɛ: «Engoyala nko lolenge loiko o Bonkumu bonka nyambe: Nga lo moto o bweya maopo o lɔbɔmbi. 27Aɔnge na mpe ateleme na miane na matio, boopo bongopundwa mpe boyoula, nde tangweba lokelama. 28Lɔbɔmbi lɔlɔkɔ lɔmɛnɛ lopundoya: boho ihɔngi, o mbiha mpongo mpe o nsuki mambo i bule ntwatonda na mpongo. 29Mpe o elaka ɛngwɛle mambo i bule, ipaka ingopwama na itina elaka e malukelo eiya3.»

Ekolongo na boili boopo bo mutalade

(Lenda mpe Mat 13, 31-32; Luk 13, 18-19)

30Yesu atepelaki: «Tɔhɔ nwɛlia Bonkumu bonka Nyambe na yomba lina be na mpe na ekolongo lina be ɛɔhɔ iho nwɛlia na bonkumu bonka Nyambe? 31Ele nko nga lo boopo bo mutalade: kaki bohikama o lɔbɔmbi, boyalake bɔkɛ penda maopo mankuma male o molongo. 32Ombiha e mbweyami, bopundwa mpe boyoula nopenda mete menkuma mele o itia. Mpe mɔbɛlia bikɔkɔ bi binɛnɛ biɔhɔ mpulu i liko notonga maumbu o lonse lo ikemba i mɔlɔkɔ.»

33Na bikolongo biike bi lolenge loiko, Yesu abalakaki Ilako, o lolenge lɔbɔtɔki balɔkɔ nɔmɔhɔlɔ. 34Tabaebiaka mbo noyala nkɔtɛyɛ ekolongo; ya kaki ale manda ɛmɔ na baekoli banande, abalimbwelaka inkuma.

Yesu aama empumpu

(Lenda mpe Mat 8, 23-27; Luk 8, 22-25)

35O boina boiko na mpokwa, Yesu aohangela baekoli banande: «Topendie nsemboka eni e ibeke i ebale.» 36O kambiaki balɔkɔ impinga i bato; batombaki Yesu nokondela o bwato boliki nde. Mato mankina mpe maliki aiko. 37Mpe empumpu ɛnɛnɛ ekanzwaki, mabombi ma moula mabatandaki mpe bwato botondaki na mai. 38Mpe Yesu abetamaki o lombiha lo bwato, motu nsangema o monkili. Baekoli banande bamoumona mpe baototwa bɔnɛ: «Molaki, iho tohaka iwa: lobo loiko lopokwɛne wɛ?» 39Yesu atolomwaki, angwelaki ɛpɛli mpe aohangela mai ma ibeke i ebale: «Yala nyɛ!» Ɛpɛli esulwaki mpe ebale eotanda molenge. 40Yesu aobaubola bɔnɛ: «Boka bɔɔmɔ itina be? Tabombe nani na bwambi?» 41Bapendaki noka bɔɔmɔ mpe baoyahangelaki balɔkɔ na balɔkɔ bɔnɛ: «Ale noni ole nsa na bipɛli na bibale bimona4?»