Skip to content
BibleKenya

Lontomba

MALAKO 16

Makundwelo manka Yesu

(Lenda mpe Mat 28, 1-8; Luk 24, 1-12; Yoa 20, 1-10)

O mbiha e boina bo sabala, Malia mohi Magadala, Malia ma nyango enka Zake na Salɔmɛ bahombaki mauta ma mɔhimbɔ noha nohinga bionge binka Yesu nobiomia olongi tabipɔndɔke. Mpe na ntei e mpendu e boina bo boho bonka eyenga, ohilaki mɔnyɛnɛ nɔbɛlɛ, bainto baiko bahaki o iyita. Bayahangelaki o iyɔngɔ i balɔkɔ: «Okotobungutwela ibɔkɔ ile o munya mo iyita nɔni?» Ya oiyeyaki balɔkɔ maiho, baoywɛnɛ mbɔ ibɔkɔ iobungutwa, nsande iliki inɛnɛ. Na boiko, baɔyɔtwa o iyita; baoywɛnɛ ɛlɛngɛ e mwele, akihi o lɔbɔkɔ lo lome, alɔti monkoto mo menza, mpe baoyoka bɔɔmɔ. Ya nde aobaebia bɔnɛ: «Tabokake bɔɔmɔ; bokomba Yesu e mohi Nazaleta, ebakemaki o ekulusu; aokundwa o iyɔngɔ i bawi, ainda anɛ. Bolendaka manda emokundaki balɔkɔ. Ya bonsɔ nko aiko yoko nwebia baekoli banande na Petelo: “Aolɔndɔ o boho bo nyainyo o Galilaya; bongomwɛnɛ ɔkɔ, nga bobwebiaki nde1.” » Na boiko, baobɛlɛ mpe baolota iteta na iyita, na itina balɔkɔ bankuma babilimaki mpe bakakatanaki. Mpe tabaebia moto nsa ɔmɔ na itina baliki na bɔpɔlu.

Yesu aɔyaɛnia onka Malia mohi Magadala

(Lenda mpe Mat 28, 9-10; Yoa 20, 11-18)

[2 Okundwaki nde na mpendu e boina bo boho bonka eyenga, Yesu abɛlɛlɛki boho Malia mohi Magadala, mabɛliaki nde melimo me mebe nsambo. Malia mohi Magadala aohaka nɔlɔndwela baliki na Yesu mpe baliki o itale nolelaka. Ya balɔkɔ okaka mbɔ: «Yesu ale na bɔmɔi, ambɔmbɛlɛle!» Ya balɔkɔ tabamoimenyena. O mbiha ɛlɔkɔ, ayaɛniaki o lolenge lonkina onka bape o iyɔngɔ inka baekoli baisiaki o bola bo balɔko. Mpe baekoli baiko bape baisiaki nɔlɔndwela bankina, na balɔkɔ, ya tababaimenyena.

Yesu aobɛlɛlɛ baekoli liomu na ɔmɔ

(Lenda mpe Mat 28, 16-20; Luk 24, 36-49; Yoa 20, 19-23; Bik 1, 6-8)

Na mbiha, Yesu ayaɛniaki onka baekoli liomu na ɔmɔ o elaka ɛlɛkɛki balɔkɔ; mpe abapɛlɛki na bohenga bo bwambi mpe na boolo bo meloko na itina tabaimenya baiko bamwɛnɛki o mbiha e makundwelo manande. Mpe Yesu aobaebia bɔnɛ: «Bɔnsɔ o molongo na ibondo nolalolake Nsango Ndɔti onka bato bankuma3. Oiko ongwambe mpe ongoiname angobikiama; opatamba angouliama. Mpe lenda bilembetelo bingwɛnɛne onka baiko bangwambe: O lina imi, bangobɛlia melimo me mebe, bangotepela o nkota i ntɛmu, kaki bangokata nzɔ na makata ma balɔkɔ mpe baomina yomba ɛmɔ e iwa, tengobaokia liale; bangohangia makata onka bakɔni, bangobikiama.» Aiko Nkolo Yesu o mbiha e ntepeli na balɔkɔ, aiyeyamaki o Lobola mpe aokihi o lɔbɔkɔ lo lome lonka Nyambe4. Nga na balɔkɔ, bahaki nolalolake o manda inkuma. Nkolo asalaki mputa na balɔkɔ mpe akembiaki Ilako na bilembetelo biliki mbahema na balɔkɔ.

Source notes (4)
  1. Footnote Lenda 14.28.
  2. Footnote Melɔngɔ 9-20 tamembe o ba buku nzike i kala.
  3. Footnote Nwɛlia na Bik 1.8.
  4. Footnote Nwɛlia na Bik 1.9-11.

Lontomba. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.