Lontomba
MALAKO 2
Yesu aobikia mokatatali
(Lenda mpe Mat 9, 1-8; Luk 5, 17-26)
Ombia e ngano maina, Yesu asiaki o Kapalanauma mpe bambaki mbɔ aliki o itumba. Mpe boike bo bato bakokanaki aiko teisia noyala na manda, nsa na o boho bo moiho mo itumba. Mpe abalakaki Mbo i Nyambe. Ngano bato bayakaki, bamɔbɛkɛlɛki mokatatali moliki mbebeba na bato banɛi. Mpe nga bopa balɔkɔ tabaɔhɔ nomoiyia ole nde na boili impinga i bato, batubaki mwanza onga na manda eliki Yesu, bamosuloyaki na itɔkɔ ibetamaki nde. Ɔɛnɛki nde bwambi bo balɔkɔ, Yesu aoyebia mokatatali: «Ngana omi, nsɔpi iwɛ iohabinyama.» Ngano balaki ba mokeko bakihaki aiko, bakanenaki o meloko me balɔkɔ bɔnɛ: «Moto ɔnɛ atepela boiko itina be? Anyaka Nyambe. Ɔhɔ nohabinya nsɔpi noni bopa Nyambe mɔmɛnɛ?» Nko o elaka ɛlɔkɔ, Yesu aɔhɔlɔki nyaima o molimo mo nande bikaneno bi balɔkɔ mpe aobaebia ndɛmbɔ: «Bole na bikaneno bi lolenge loiko o meloko me nyainyo itina be? Ele liale nwebia mokatatali mbɔ: “Nsɔpi i wɛ iohabinyama”, na mpe nohanga mbɔ: “Tɛlɛmɛ, pwa itɔkɔ iwɛ mpe nsɔ”? Ya bwebe mbɔ: Ngana onka bobato ale na bonkumu nohabinya nsɔpi o nse.» Boiko atepelaki onka mokatatali: «Nakwebia, tɛlɛmɛ, pwa itɔkɔ iwɛ mpe nsɔ o itumba iwɛ.» Moto oiko atɛlɛmɛki, apwaki itɔkɔ inande na ihali mpe abɛlɛki o boho bonka bato bankuma. Balɔkɔ bankuma bakakatanaki mpe baumiaki Nyambe ntepela mbɔ: «Tatwɛnɛni nsa na lopwa mpamba lolenge lɔnɛ!»
Yesu aobeya Lewi
(Lenda mpe Mat 9, 9-13; Luk 5, 27-32)
Yesu aisiaki noha o ntundu e ibeke i ebale. Impinga i bato inkuma imɔkɛndɛlɛki mpe abalakaki. Olekaki nde, aɛnɛki Lewi, ngana onka Alupayo, akihi o itumba i nzuti mputi. Amwebiaki bɔnɛ: «Onziele!» Lewi atɛlɛmɛki mpe amoiyelaki. Yesu asiaki nɔlɛ o mesa o itumba inka Lewi1. Boike bo bautii ba mputi mpe na bato ba nsɔpi baliki o mesa mputa na Yesu mpe na baekoli banande, naitina baliki boike nomoiyelake. Mpe balaki ba mokeko baliki o etuluku ɛmɔ na Bapalusi ɛnɛkɛ mbɔ Yesu alɛ mputa na bato ba nsɔpi mpe bautii ba mputi, baubolaki baekoli banande: «Be? Alɛkɛke mputa na bautii ba mputi mpe na bato ba nsɔpi2?» Yesu okaka boiko abaebiaki bɔnɛ: «Bato bale na bionge bokembu bapokombake nkanga ya baiko bakɔnɔ. Tiya nokombake baɛlɛmi ya bato ba nsɔpi.»
Ilako inka Yesu na boili mohipili
(Lenda mpe Mat 9, 14-17; Luk 5, 33-39)
Lendaka, baekoli banka Yoane na Bapalusi bakilaka. Boiko, bato baoyoye noubola Yesu bɔnɛ: «Baekoli banka Yoane na banka Bapalusi bakilake, ya bawɛ bapokile itina be?» Yesu ababekwelaki ndɛmbɔ: «Bokanena mbɔ babeyami ba ntɛkɔ e ibala baɔhɔ nokila aiko ole balɔkɔ mputa na boome? O elaka eiko ele balɔkɔ mputa nande bapɔhe nokila. Ya elaka engoya engoiyeyame boome; na boiko, bangokila boina boiko.
«Tembe na moto ɔho nobamba etobo ɛtɛkɛ na etobo ɛ ntɛmu; kaki mpamba, ɛntɛmu engwatola ɛnɛ ɛtɛkɛ, mpe eatwela engopula. Tembe na moto ɔhɔ nwangola vinyo ɛ ntɛmu o bikutu bi kala bikelama na mpoho i nyama; kaki mpamba, vinyo engwatola bikutu bilɔkɔ: Aiko na vinyo na bikutu bingopitana. Ya vinyo ɛ ntɛmu, o bikutu bi bitɛmu.»
Yesu mpe boina bo sabala
(Lenda mpe Mat 12, 1-8; Luk 6, 1-5)
Lendaka o boina bɔmɔ bo sabala, Yesu alekaki o matia ma mambo i bule. Mpe baekoli banande bahaki nonyukake mpongo mboka mboka. Na boiko, Bapalusi bamoubolaki: «Lendaka, itina be baekoli bawɛ bakela lipopae mokeko moyaiho epohe nokelama o boina bo sabala4?» Mpe Yesu ababekwelaki bɔnɛ: «Tabotanga lokelaki Dawidi o elaka eliki nde na bohenga, mpe okaki nde nzala nde na bakɛndɛki na nde? Ngamo ngamo o elaka enka nkanga ɛnɛnɛ enka Nyambe ɛmɔ e lina Abiatala, aɔtwaki o itumba i Nyambe, aɔlɛ mampa5 ma ikapo mapɔbɔte moto nsa na ɔmɔ nɔlɛ, umonya nko bankanga banka Nyambe, aomapa mpe onka baliki nande.» Mpe Yesu aobaebiaki: «Sabala ekelamaki na itina inka moto, ya moto takelama na itina inka sabala. Ɛlɔkɔ eiko Ngana onka bobato ale mpe Nkolo enka sabala.»
Source notes (5)
- Footnote Lenda Luk 5.29.
- Footnote Nwɛlia na mɔlɔngɔ 15-16 na Luka 15.1-2.
- Footnote Lenda mpe Dut 23.26.
- Footnote Lenda Mab 34.21.
- Footnote 2 Sam 15.35. Lenda Lew 249.
Lontomba. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.