Skip to content
BibleKenya

Lontomba

MALAKO 11

Yesu aɔtwa o Yelusalema

(Lenda mpe Mat 21, 1-11; Luk 19, 28-40; Yoa 12, 12-19)

Oiyaki balɔkɔ bɛlɛbɛlɛ na Yelusalema, bɛlɛbɛlɛ na Betepaze na Betania, baiyaki o monkondo mo Bilaya. Yesu aotinda bape o iyɔngɔ i baekoli banande mpe aobaebia bɔnɛ: «Bɔnsɔ o ehe eiko ele onga na inyo, aiko ɔkɔkiɔtwa inyo, bokotana ngana o nyama e lina ane atungi, nani moto takekondeli. Boketungole mpe bokɛbɛke. Mpe kaki moto aoboubola: “Bokela boiko itina be?” Bomoisenyelaka: “Nkolo akehenga, akoketinda na ihali.”» Bahaki mpe batanaki ngana o nyama e lina ane etungi o moiho mo nanda o mololo. Baoketungola. Bamɔ baliki aiko babaubolaki bɔnɛ: «Itina be itungola inyo ngana oiko o nyama?» Babaisenyelaki nga bobaebiaki Yesu; mpe babakambiaki nolokela. Babɛkɛlɛki Yesu ngana oiko o nyama; bakiapiaki bitobo bi balɔkɔ, Yesu akondelaki mpe akihaki1. Bato boike ba tandaki bitobo bi balɔkɔ o mboka, mpe bankina bikɔkɔ bi mete bi tenakaki balɔkɔ o matia2. Bato balɔndɔki na babaiyelaki batotwaki: «Ozana! Atwakwame Oiko oye o lina inka Nkolo! Botwakwame bonkumu boye bonka nkee e yaiho Dawidi! Ozana o manda ipenda kaa3!» Mpe Yesu aɔtwaki o Yelusalema kii o itumba i Nyambe. O mbiha enande nɔkɔtɔlɔ mbo inkuma ilekaki ɔkɔ, abɛlɛki noha o Betania mputa na baekoli banande liomu na bape, na itina mpokwa eiyaki.

Yesu aohila mote mo monkake

(Lenda mpe Mat 21, 18-19)

O mbiha e mpendu, ɔbɛlɛki balɔkɔ o Betania, Yesu aokaki nzala. Aɛnɛki iteta mote mo monkake mopukutana na nkaha, ahaki nolenda kaki na mpe akobata yomba ɔ mɔlɔkɔ; mpe ɔbɛlɛmɛki nde na mɔlɔkɔ, ya atanaki nko nkaha ntoo, na itina teyala motia mo mambo i monkake. Boiko Yesu aebiaki mote mo monkake bɔnɛ: «Moto noisia nɔlɛ mambo ima onka wɛ nko hiɔ!» Baekoli banande baokaki mbo liko.

Yesu o itumba i Nyambe

(Lenda mpe Mat 21, 10-17; Luk 19, 45-48; Yoa 2, 13-16)

Baiyaki o Yelusalema. Baɔyɔtwa o itumba i Nyambe mpe yesu aobanda nopanza batɛki mpe na bahombi o itumba i Nyambe; aobutola mesa inka baenzi ba mɛhɔlɔ mpe mbata inka batɛki ba bimenga, mpe takambia nsa moto abebe yomba nopendia itumba i Nyambe. Abalakaki mpe abaebiaki bɔnɛ: «Talɔkɛtɛmɛ mbɔ: “Itumba i mi ingobeyama itumba i mondela inka makundu mankuma”? Ya inyo, boitika ibomba inka bapunzi4!» Bankanga ba banɛnɛ banka Nyambe na balaki ba mokeko bambaki mpe bakombaki lolenge longomobome balɔkɔ; na itina bamokaki bɔɔmɔ, na itina impinga iemwaki na boili ilako inande. Oiyaki mpokwa, Yesu na baekoli banande baɔbɛlɛ o inanga.

Yesu na mote mo monkake moma

(Lenda mpe Mat 21, 20-22)

Olekaki Yesu na baekoli banande na mpendu, baɔywɛnɛ mote moiko mo monkake moma kii o melio. Petelo aoywepwa, mpe aohangela Yesu bɔnɛ: «Molaki, lenda, monkake mohilaki wɛ moma monkuma.» Yesu aobekwela baekoli banande bɔnɛ: «Boyala na bwambi onka Nyambe! Nko na hɔlɔ nabwebia bɔnɛ, kaki moto aebia monkondo mbɔ: “Umwa mpiko mpe yauha o ebale ɛnɛnɛ”, mpe kaki tahia lɔmpɛnyɛ o moloko monande, ya aimenya mbɔ litepela nde ingoiya, longomopaema. Ɛlɔkɔ eiko, nabwebia bɔnɛ: Binkuma biubola inyo o mondela, boimenya mbɔ bobibataki mpe bilɔkɔ bingobopaemena. Mpe kaki bɔtɛli nobondela, mpe bole na lobo na moto, bomohabinye, olongi Ihe e enyainyo ele o Lobola abohabinye na inyo mabunga ma nyainyo. [Ya kaki bopohabinye bankina, Ihe enyainyo ele o Lobola, tangobohabinya nsa lopwa bobe bokela inyo5.]»

Bonkumu bonka Yesu boima manda be ?

(Lenda mpe Mat 21, 23-27; Luk 20, 1-8)

Baoyoisie o Yelusalema. Aiko oliki Yesu aha, aisia o itumba i Nyambe, bankanga ba banɛnɛ banka Nyambe, balaki ba mokeko na bingambi bi Bayuda baoyoye bɛlɛbɛlɛ na nde. Balɔkɔ bamoubolaki bɔnɛ: «Okela mbo inɛ na bonkumu bole o be? Na mpe okopa bonkumu nɔni noikela?» Yesu aobaisenyele bɔnɛ: «Nakoboubola nko moubola mɔmɔ; kaki bombekola, aiko nakobwebia bonkumu boikela mi. Boinami bonka Yoane boimaki o Lobola na mpe onka bato? Bonzisenye mwambo.» Bakanenaki o iyɔngɔ i balɔkɔ bɔnɛ: «Kaki tohanga: “O Lobola”, akotoubola: “Itina be ipa inyo tabomoimenya?” Tokomwebia bɔnɛ: “Onka bato…”?» Baokaki impinga bɔɔmɔ, na itina bato bankuma bakanenaki mbɔ Yoane aliki hɔlɔ nteti. Boiko baomoisenyele mbɔ: «Topwebe.» Mpe Yesu aobabekwela bɔnɛ: «Nami mpe, napobohangele bonkumu boikela mi.»

Source notes (5)
  1. Footnote 6 Nwɛlia na Zek 9.9.
  2. Footnote Nga 2 Bank 9.13.
  3. Footnote Nwɛlia na Nye 118.25-26. Lendaka Mat 21.9
  4. Footnote Nwɛlia Isay 56.7; Yil 7.11.
  5. Footnote Lenda Mat 6.15.

Lontomba. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.