लुका

लूकाले लेखेको सुसमाचार

लुकाये ओसोरो चाव सोर

कितापलाई सरेःने

लुका टोबो साःरौ न्यामला लेव चाव सोरला चार गोटा कितापरंलाम टोबो किताप ची। आलं येसु ख्रीस्टलो उजीबनलो बर्नन डोसिव ले। नो स्यान्टैरंलाई “गोस्पल” डासिये आवलो ओमाने “चाव सोर टाये” आव कितापरं येसु उसिव छिन्डे मत्ती, मर्कुस, लुका सोनो युहन्नाराई यासोरो ची। लुकाये येसुलो उजीबनलो कठा याज़ ओसोरो माङ्कची, बुरु हो सिडे ज्युङडा ओटाव झिन्डे उसिसराई याडोव येःनलो ओबारेलं पनि टोबो किताप ओसोरो, आव कितापलो उमिन प्रेरितराई यायेःन ची। आव लुकाये ओसोरो चाव सोर ठ्याक्क खर्क, काङ सर्सिव आवलो ओबारेलं काङ्कालाई पनि ठा माले। हैनि पनि भ्या परिव मीराई ऐवार्रये येसु उजर्मिवकाम सहतंर बर्स छिन्डे आव किताप सर्सिव टाव ढुव।

आव किताप सर्ने लुका टोबो बैड लेव। जो झैडे होये आव किताप ओसोरो होकाम जो पाङङाम ओसोरो हो अनंसार आव ठा टाये, लुका टोबो भ्या परिःव मी लेव। लुकाये येसुलो उजीबनला रोःरं सहि सर्ने कोसिस डाडेनोयो। जो घटना जोझैडे टाव लेव हैजैडेज़ सर्ने कोसिस डाडेनोयो, कडालेकं नोलो ओबारेलं परिःडे उरुरंलाई फाइडा गटाकं।

लुकाये ओसोरो आव किताप मत्ती सोनो मर्कुस स्यानाव ले। कडालेकं नोरं हो रोःज़ हैटाव झैडेज़ बयान डोडेनैरं। आव सोम्बऱ्याङ कितापरंलाम बप्तिस्मा याने युहन्ना उजर्मीव बारेलं स्यानटैराई भन्डा भ्या लुकाये हैवार्डे ले। छेमा सोनो प्रार्ठनाटं लुकाये भ्या जोर याडे नोयो। छेमालो ओबारेलं। अड्या

आव ज्युङला बिसयेरं

१. आव अड्यालं लुकाये ओल ओसोरो चाव सोरलो ओबारेलं बयान डाडे कडाने ओसोरो वार्ने रोःलो ओकारन हैवार्डेले।

२. होकाम नोये येसु उजर्मिव बारेलं सोनो येसुये ओडोव सेवालो ओबारेलं बयान डाडेनोयो।

३. ओसोरो कितापलो बाङ्कि भागलं येसुये चिन्न सोनो अचम्बला येःनरं ओडोव होकाम जो रोःरं ओपोयो होलो ओबारेलं लुकाये हैवार्डे ले।

४. आखिरलं आखिरला नेबऱ्याङ अड्यालं येसु कैजैडे उसिव, कैजैडे ओगाडिसिव, होकाम कैजैडे सिवलाम ज्युङडा ओटाव आव रोः हैवार्ये।