लुका 14

येसुये टोबो ठलिव मीलाई ओससोमो

1नाःसिने डिन छ्याम येसु टोबो फरिसीराई यासेःरलो उज़ीःमकं काङ ज़्याने ओनाव। मीरं येसुलाई बनै ढ्यान याडे यारःङज़्याव। 2जलग्रहये ठलिव टोबो मी येसुलो ओङाःकं लेव। 3येसुये न्याम पैने मीरंलाई सोनो फरिसीरंलाई ओपंजोयोरं, “नाःसिने डिन छ्याम याजोर रावरंलाई ससम्ने न्याम अनंसार चाव, सै माचाव?”

4हैनि पनि नोरं गाइगुइज़ मालेरंये, होकाम येसुये नो रोगीलो ओक्याङटं उकुइये छुडे ओससोमो होकाम नो मीलाई उपरिःङो। 5होकाम येसुये नोरंलाई हैओडोवरं, “जेकाम काङ्काये कि ओज़ा, कि उयिःङ नाःसिने डिन छ्याम चुन्डालं याटेःखे भने होलाई चानोज़ माहायो?”

6होकाम नोराई आव रोःलो ओजंबाफज़ मायोडुरंये।

बुझाउ मी सोनो पाहुना पर्भैने

7भट्यारला राव पाहुनाराई यामान लेवरं चुङने पोटं बिनिडे याचुङज़्याव रःङडे येसुये नोरंलाई टोबो सात्रो हैओडोवरं 8“बिह्याँला भोजलं नङलाई कोइये याखुल्सोनो भने मान डैने पोटं टाचुङङंन। नङ भन्डा घ्योव सेःर मीलाई नलं खुल्सिव याले हो। 9नङलाई सोनो हो मीलाई खुल्ने मुख्या मीये राडे हैवार्नेले, ‘आवलाई चुङने पो गोयोके,’ होकाम नङ लाजमोर्नो टाडे स्यान्टैराई भन्डा याछिन्ङ चुङनेनंले। 10नङलाई याखुल्सोनो भने नाडे झिन्ङ चुङसिन, होकाम भोजला मुख्या मीये राडे नङलाई हैडानेले, ‘ए ङानै, रोटं नाडे चुङनान।’ नो बेलाकं नङसं ज़्याव ज़्योज़्यावराई याङाःकं नमान टानेले। 11कडावार्क जोये ओललाई घ्योव झोयो, नो आलिज़ा टानेले, होसोनो ओललाई आलिज़ा झैने घ्योव टाने ले।”

12होकाम येसुये ओललाई खुल्नेलाई पनि हैओडोव, “नङ रीःम्डे सै छकाल्नेका भोजलं नखुलरंकं, ननैरंलाई, नडाज्यु भाइरंलाई, नकुटुमबंरंलाई सोनो ढनी नछिमेकीरंलाई टाखुलरं, मानि के नोराई पनि ओपैचा खुल्डे नङलाई पनि नडोव गुन सोवोल्ड्याने लेरं। 13नङ भोजलं नखुलरंकं, गरिब, लुला, लङगरा, अन्डलारंलाई खुलरं, 14होकाम नङ आसिक डैने नले, कडावार्क नोराई नङलाई नडोव गुन मासोवोलडुरं। सहि मीरं सिवलाम ज्युङडा याटाकं नङ आव येःनलो इनाम डैने नले।”

घ्योव भट्यारलो ओसात्रो

मत्ती २१:१-१४

15येसुसं ज़्याव ज़्योज़्यावरंकाम टोबोये येसुलाई हैओडोव, “नो मी के बनै ओरेङकं, जोये परमेस्वरलो ओराज्यलं भोज ज़्यानेले!”

16होकाम येसुये नोलाई हैओडोव, “टोबो मीये बनै घ्योव रिःम्डेका भट्यार तयार ओझोयो, होकाम भ्यारंलाई उखुलोरं। 17नोये ओनौकरलाई काङ ज़्याने बेलाकं खुल्सिव मीरंलाई ऐ डोरं वार्डे हैडाव उपरिःङो, ‘गराच्योके आबो स्यान्टै तयार लिज़्या।’” 18“हैनि पनि नोराई स्यान्टैये टोबो नास्याव बाहाना याझोयो। पैलाकाये नोलाई हैओडोव, ‘ङा टोबो येःङ लःङडेङानै, ङा नो रःङने नाने ची। ङा बिन्ती ङाडो, ङालाई माफ ओटाकं।’” 19“छुटंये हैओवारो, ‘ङा पाँस हल यिःङरं लःङडेङानै, ङा नोराई यायेःन जान्चिने नाने ची। ङा बिन्ती ङाडो, ङालाई माफ ओटाकं।’” 20“टोबो छुटंये हैओवारो, ‘ङा बिह्याँ डाडेङानै। हैजैडे ङा ङामराडु।’” 21“होकाम नौकरये राडे ओसाहुलाई आव स्यान्टै रोःरं हैओडोव। होकाम साहुये रिसिडे नौकरलाई हैओडोव, ‘सहरला येमयालं सोनो गल्लियालं चानो नान, होकाम गरिबरं, लुलारं, लङ्गरारं, अन्डलारंलाई आलं ज़ीःमलं रैरं।’ 22होकाम नौकरये ओसाहुलाई हैओडोव, ‘अँ नङ हैनवारो स्याव येःन टाडेले, अजं पनि पो रित्तो लिज़्या।’” 23“साहुये ओनौकरलाई हैओडोव, ‘मुल येमयालं सोनो गल्लियालं नाडे मीरंलाई कर डाडे ज़ीःमलं रैरं, होकाम ङाज़ीःमलं मीरं गब्यालरंकं। 24कडालेकं ङा जेलाई हैङाडाच्यो, खुल्सिव मी भरिरंलाम काङ्काये पनि ङाभट्यारला ज़्याव डारो डैनेमालेरं।’”

ख्रीस्टलो उसिस टाकं फोने येः

25बनै भ्या मीरं येसुसं यानाज़्याकं, येसुये नोरंलाई वोल्डे ऐओडोवरं, 26“कोइये ङा लेवकं राने युङ याडोव भने नोये ओबाबु, वामा, ओज्या, ओज़ारं सोनो ओडाज्युभाइ, ओनाना-बैनीरं सोनो ओल उज्युलो मया ङालाई भन्डा भ्या याडोवखे भने, नो ङासिस माटाडु। 27जो मी उक्रुस घुर्डे ङाछिन्ट मारा, नो ङासिस माटाडु।”

28“जेकाम कोइये टोबो ढरहरा झैने युङ याडोव भने, नो ढरहरा झैने खर्च ङासं लिज़्या सै माले वार्डे ङाःडेज़ चुङडे हिसाब माडोव डोरो? 29मानि नोये जग सुचुन्डे झैडे माखेमडुवखे भने, रःङनेराई स्यान्टैये ऐ वार्डे गिल्लैनेलेरं, 30‘आव मीये झैने के यापानो हैनि पनि माखेमडुवखे।’” 31“काङ्का राजा ची टाकेडं जो छुटं राजासं खप्सिने ओनाकं ओल्स लिज़्याव डस हजार सिफाइँराई नोलो उबिरोडलं राने बीस हजाररासं खप्सिने ङाढु सै ङाम्ढु वार्डे ङाडेज़ चुङडे सल्ला माडोने? 32नोये माढुने यालेखे भने, नो ओझगऱ्या राजा टाडाङं उलिज़्याकंज़ कैजैडे मिलिने वार्डे ओकटंवाललाई पजोयो परिःङने ले। 33हैजैडे जे मड्डे जोये ओल्स लेव स्यान्जाति माराःव नो ङासिस माटाडु।”

माडारो सापि

मत्ती ५:१३; मर्कुस ९:५०

34“सापि के चाव बस्त ची, सापिलो ओडार मालेखे भने नो कैझैडे डारो टाने? 35नो न गमलाई चाहिये न मललो उठुप्रालाई चाहिये। मीराई नोलाई मील्कैड्योरंये।

जोलो ठैने ओना ले, होये ओठोयोकं।”