Wale Magar Kham
लुका 2
येसु उजर्मीव
हो बेलाकं कैसर अगस्तसये ओराज्यला स्यान्टै मीराई यासङ्ख्या गनिने हुकुम ओयोवरं। कुरेनियस सिरियाला हाकिम उलिज़्याव बेलाकं आव मीराई यासङ्ख्या गनिने येःन सुरुला लेव। स्यान्टै मीरं यामिन सर्ने यासहर-यासहरलं यानाव।
योसेफ पनि गालीलला नासरतलाम यहुडियाला बेठलेहेम वार्ने डाउडलो ओसहरलं ओनाव, कडालेकं नो डाउडलो ओकुटुम्ब सोनो ओसन्तानला लेव। मिन सर्ने ओनाकं उकुइटं वाःङसिव मरियमलाई ओल्स लाङडे ओनाव। मरियम मुऱ्या लेव। होनि नलं निलिज़्याकंज़ मरियमलो सुर्क्याल्नि टाने ओबेला ओटाव। मरियमये जेठा ओज़ालाई ओजर्मोयो होकाम क्वाटं लुम्बैडे डोन्ठोलं ओनोयो, कडालेकं नोराई यालागिटं ढर्मसालालं बासिने पो मालेव।
ग्वालारं सोनो स्वर्गटा कटंवालरं
नो पोला टोबो बाङलं पाखाटंज़ ग्वालारं लेवरं, नोराई रिलं चुङडे याबगालरंलाई यागुज़्यावरं। नोराई याछ्योकं प्रभुलो टोबो स्वर्गटा ओकटंवाल ओरोःनो, होकाम नोराई याछ्योयालं प्रभुलो उउज्यालो ओचम्किव, होकाम नोरं बनै याछेव। होकाम स्वर्गटा कटंवालये नोरंलाई हैओडोवरं, “टाछेच्यो, कडालेकं आव ठैच्यो, ङा जेलाई बनै आनन्डला चाव सोर ङासंठैच्यो, जो स्यान्टै मीराई यालागिटं टानेले। आछिम डाउडलो ओनाङखारलं जेलागिटं टोबो छुट्कारा याने मी जर्मिडेले, होज़ ख्रीस्ट प्रभु ची। जेलागिटं एटाव चिन्न ले, जे टोबो बाल्खलाई क्वाटं लुम्बैडे डोन्ठोलं सुरुपसिव डैनेजेले।”
होकाम अमल्याङसानि हो स्वर्गटा कटंवालसं टपल्टन स्वर्गटा सेनारं यारोःनो। नोराई ऐ वार्डे परमेस्वरलो ओइस्तुति यागयो,
“परमेस्वरलाई स्यान्टै भन्डा रोट्ट स्वर्गटं महिमा,
होकाम प्रिठीबीलं जो मीरासं परमेस्वर खुसि ले, होरंलाई सान्ति!”
होकाम नोराई लेवकाम स्वर्गटा कटंवालरं स्वर्गडे यानाव, होकाम ग्वालारं या-याज़ ऐ यावारो, “बा गराच्योके, गे बेठलेहेम समं गेनाके, होकाम नला टाव घटना सोनो स्यान्टैराई भन्डा घ्योव प्रभुये गेलाई हैओडासिव रोःरं गेरःङके।”
होरं चानो-चानो यानाव, होकाम मरियमनि, योसेफनिलाई यारोःङोरं होसोनो बाल्खलाई डोन्ठोलं ऐस्याडे उलिज़्याव याडैनाव। नोराई आव यारःङो पाना, नो बाल्खलो ओबारेलं जो रोः नोरंलाई स्वर्गटा कटंवालये हैओडोवरं नोराई हो रोः स्यान्टैरंलाई हैयाडोवरं। ग्वालाराई हैयावारो रोः ठैने भरिरं स्यान्टै अचम्ब याटाव। हैनि पनि मरियमये आव स्यान्टै रोः बुझिडे उयुङलंज़ ओनोयो। नो ग्वालारंलाई स्वर्गटा कटंवालये खैटाव हैओडोवरं हेटावज़ रःङडे सोनो ठैडे, परमेस्वरलो ओमहिमा सोनो प्रसन्सा डोये-डोये वोल्डे यानाव।
येसुलो उमिन यानोयो
बाल्ख आठ डिनका ओटाकं खतना याझोयो छ्याम उमिन येसु यानैड्योव, जो मिन स्वर्गटा कटंवालराई येसु गर्भलं ओमराडेज़ यानैड्योव।
येसुलाई प्रार्ठना डोने ज़ीःमलं यासुम्पिव
मोसालो ओन्याम अनंसार नोराई चोखैसिने डिन पुरा ओटावपाना नोनि येसुलाई स्यान्टैराई भन्डा घ्योव प्रभुलो ओङाःकं सुम्पिने यरुसलेमलं नेरोयो, स्यान्टैराई भन्डा घ्योव प्रभुलो ओन्यामटं सर्सिवले, “ङाःडेङा जर्मीव स्यान्टै जेठा भरि स्यान्टैराई भन्डा घ्योव प्रभुलो ओलागिटं चोखो टानेले।” स्यान्टैराई भन्डा घ्योव प्रभुलो ओन्यामटं हैवार्सिव मान्टि “कि टजोर ढुङ्कुर कि नेबऱ्याङ परिवालो ओफोङ” लाङडे भोक चरैने यानाव।
यरुसलेमलं सिमियोन उमिन लेव टोबो सहि सोनो भक्त मी लेव, होसं चोखो आत्मा लेव। होये इस्राएलये सान्ति गोडोयोकं वार्ने आस ओडोज़्याव। “स्यान्टैराई भन्डा घ्योव प्रभुलो ओख्रीस्टलाई नमरःङया समं सिने नम्ले” वार्ने डर्सन चोखो आत्माङाम डैडे ओनैज़्याव। हो चोखो आत्मालो ओग्यान अनंसार प्रार्ठना डोने ज़ीःमलं ओराव। होकाम वामानि ओबाबुनि बाल्ख येसुलाई परमेस्वरलो ओलागिटं सास्त्र अनंसार न्याम पुरा झैने प्रार्ठना डोने ज़ीःमलं नेरोयो, होकाम सिमियोनये येसुलाई ओघोन्ट रैडे, परमेस्वरलाई ढन्याबाड याडे हैओवारो,
“ए स्यान्टैराई भन्डा घ्योव प्रभु,
नङ है नवारो अनंसारज़ नसेवा डोनेलाई सान्तिसं नाव यो।
कडालेकं नङ नपरिःङो छुट्कारा यानेलाई ङामिलङयेज़ रःङडेनोयो,
जो नङ स्यान्टै डेसला मीराई गरःङरंकं वार्डे तयार झैडे ननै,
यहुडीरंकाम उरुका मीरंलाई येम सतन्ड्याने
सोनो इस्राएलला मीराई यामहिमा रैनेलो लागिटं ज्योति ची।”
होकाम सिमियोनये येसुलो ओबारेलं एटाव रोः ओपाङज़्याव ठैडे येसुलो वामानि ओबाबुनि अचम्ब नेटाव। सिमियोनये नोरंलाई आसिक ओयोवरं, होकाम येसुलो वामा मरियमलाई हैओडोव, “रःङ, आव बाल्ख इस्राएललं भ्या मीराई यालागिटं नास टाने सोनो फरि ज्युङडा टाने कारन टानेले, होकाम स्यान्टै मीरं उबिरोडलं पाङने टोबो चिन्न टानेलो लागिटं रुजिसिव ची, होकाम नोलो उबिरोड डाडे बनै भ्या मीराई यायुङला बिचार रःन्नेले। होकाम नङ नयुङटं पनि तरवाल रुपिसिनेले।”
आसेरलो ओसन्तानलं हन्ना उमिन लेव फनुएललो टोबो मेमा ओज़ा लेव। नो बड्डि लेव, होकाम नो अगमबाडिनी लेव, नो कन्या ओलेकं बिह्याँ ओडोवकाम सात बर्स समं याज़ ओरे ओबान्चिव। होकाम नो रान्डिनि ओटाव चौरासी बर्स टाडेउलिज़्याव, नोये प्रार्ठना ज़ीःम राःडे कान्डेज़ मानाये, हैनि पनि उपासिडे सोनो प्रार्ठना डाडे लाकं रिलं परमेस्वरलाई पुजिवये। हो बेलाकंज़ नो मेमा राडे नोये परमेस्वरलाई ढन्याबाड ओयोव, होकाम यरुसलेमये छुट्कारा खर्क डोयोके वार्डे केन्ज़्याव स्यान्टैरंलाई बाल्खलो ओबारेलं हैओडोवरं।
होकाम नोनि परमेस्वरलो ओन्याम अनंसार स्यान्टै येःन डाडे नेखेमो, होकाम योसेफ सोनो मरियमनि गालीलला नेनाङखार नासरतलं वोल्डे नेराव। बाल्ख येसु ओक्याङ पनि ओघ्योव उबुड्डि पनि ओराव होसोनो ग्यान पनि ओडोयो, येसुसं परमेस्वरलो ओडया लेव।
बाल्ख येसु प्रार्ठना डोने ज़ीःमलं
येसुलो वामानि ओबाबुनि बर्सका टखेप राने निस्तार पर्ब मानिने यरुसलेमलं नानिये। होकाम येसु बार बर्सका ओटाकं, होरं याचलन अनंसार यरुसलेमलं यानाव। पर्ब ओखेमो छिन्डे नोरं वोल्डे यानाकं बाल्ख येसु यरुसलेमलंज़ उरंहिव। आव रोः येसुलो वामानि ओबाबुनि ठा मासन्निये। येसु यासं बोलोङ राव मीरासं लिज़्या वार्ने सुन्चिडे टछा लाभरिला येमलं बाडे नेनाव। होकाम येसुलाई नोराई याआपंना परिने मीराई सोनो यासःरेसिव मीराई याखार्ल याखिमो, नोनि येसुलाई माडैडे फरि वोल्डे यरुसलेमलंज़ येसुलाई खिमये-खिमये नेनाव। सोःङलाका नोनि येसुलाई प्रार्ठना ज़ीःमलं यहुडिला सिछ्या योनेराई याखार्ल चुङडे यारोः ठोयोग्यान होरंलाई पजोयोग्यान ओडोज़्यावरं नेडैनाव। येसुलो उबुड्डि सोनो ओजबाफ ठैनेरं स्यान्टै अचम्ब याटाज़्याव, येसुलाई रःङडे वामानि ओबाबुनि अचम्ब नेटाव, होकाम वामाये येसुलाई हैओडोव, “ङाज़ा, नङ गिनसं कडाने ऐ नलिज़्याव? रःङखेने नबाबुसं गिन नङलाई खिम्डे हैरान गेटाडुखे।”
येसुये होनिलाई हैओडोवनि, “जिन ङालाई कडाने जिखिम्सङज़्याव? ङा ङाबाबुलो उज़ीःमलंज़ लेने ची वार्ने रोः जिनलाई ठा माले?” होकाम येसुये होनिलाई हैओडोवनि रोः नोनि माबुझिडुनिये।
होकाम येसु होनिसं नासरतलं ओनाव, होकाम होनिसं आग्याकारी टाडे ओलेव। येसुलो वामाये आव स्यान्टै रोः उयुङलं ओनोयो होकाम येसु मीराई याडया मया सोनो परमेस्वरलो ओडया मया डैडे ओक्याङ सोनो उबुड्डिलं ओघ्योव।
Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.