Skip to content
BibleKenya

Wale Magar Kham

लुका 5

येसुये ङाःडेङा उसिसरंलाई उखुलोरं

मत्ती ४:१८-२१; मर्कुस १:१६-२६; युहन्ना 1:४०-४२

परमेस्वरलो ओपाङ ठैनेलो लागिटं बनै भ्या मीरं येसुलो ओछ्योयालं केःके याछुइसिरिव, येसु गनेसरेत वार्ने डहंलो ओछ्योकं च्याङसिडे उलिज़्याव।1 येसुये डहंलो ओगोराटं नेबऱ्याङ डोङ्गा ओरोःङो, जाल रिःसिने मीरं हो डोङ्गालो ओछ्योकं चुङडे याजाल याछेज़्याव। हो नेबऱ्याङ डोङ्गालाम टोबो डोङ्गा सिमोनलो लेव। येसुये हो डोङ्गालाई मीरं यालिज़्याव नाम काम जामा होसैकं लाङ वार्डे सिमोनलाई हैओडोव। होकाम येसु होटं चुङडे बनै भ्या मीरंलाई सिछ्या याने सुरु ओडोव।

पाङडे खेम्डे, येसुये सिमोनलाई हैओडोव, “ङाःरं क्योःनेलो लागिटं डोङ्गा बुडावलं लाङडे नजाल ख्या।”

हैनि पनि सिमोनये ऐ ओडोव, “गुरबा, गे तरिडुङ जाल ख्याडे पनि कडिज़ गेम्डैये, हैनि पनि नङ हैनडाङो अनंसार ङा जाल ङाख्या।”2

होकाम होये ओजाल ओख्याकं आढङ भ्या ङाःरं याक्योःवरं हैजैडे नोराई याजाल चिने ओपानो।3 होकाम नोराई छुटं डोङ्गाटा यासं बोलोङ ङाः सैःनेरंलाई साहान डाडे याखुलोरं, होकाम होराई राडे ङाःर नेबऱ्याङ डोङ्गाटं याझाकं डोङ्गाज़ बुडिने ओपानो। सिमोन पत्रुसये आव रःङडे येसुलो ओखङटं फुलुप्सिडे हैओडोव, “ए प्रभु, ङाछ्योकं टालेन, कडालेकं ङा के पापी मी ची।”

एटावका ङाःर याक्योव रःङडे ओल सोनो ओल्स लेनेरं स्यान्टै बनै अचम्ब याटाव। हैजैडे जब्डियालो ओज़ानि याकुब सोनो युहन्नानि पनि अचम्ब नेटाव। होनि सिमोनसं मिलिडे येःन नेडोज़्याव। येसुये सिमोनलाई हैओडोव, “टाछेङंन, नङ आबोकाम मीरंलाई क्योःनेरं नले।”

होकाम नोरं याडोङ्गारं पाखाकं रैडे, स्यान्जाति होकंज़ राःडे, येसुलो उझिन्ट यानाव।

येसुये टोबो मीलाई ओससोमो

मत्ती ८:१-४; मर्कुस १:४०-४५

टखेप येसु टोबो नाङखारलं उलिज़्याकं, टोबो ओक्याङ भरि कोःरो टाव मी येसुलाई रःङडे ओखङटं फुलुप्सिडे बिन्ती ओडोव, “ए प्रभु, नङ इछ्या नडोखे भने नङ ङालाई ससोमो नुढु।”

येसुये हो मीलाई उकुइये छुडे “ङा इछ्या ङाडो, नङ समङंन” वार्डे हैओडोव, होकाम होपान्ट्राज़ हो मीलो ओक्याङटा कोःरो ओसोमो। येसुये नोलाई हैओडोव, “आव रोः काङ्कालाई पनि हैटाडोरं। हैनि पनि सेवा डोने मी लेवकं नाडे सतन्सिनान, होकाम मीरंलाई नसमो रोःलो प्रमान गटाकं वार्डे मोसाये हैओवारो अनंसारला भेटी चरै।”

हैनि पनि येसुलो ओरोः झनज़ चारकोनाडे ओठोयो, होकाम बनै भ्या मीरं येसुलो ओपाङ ठैने सोनो यारोगोटाम सम्नेलो लागिटं याडुप्सिव। हैनि पनि येसु के कडि मीरंज़ मालेव बनलं नाडे प्रार्ठना डोवये।

ओखङ उकुइ सिव मी ओसोमो

मत्ती ९:१-८; मर्कुस २:१-१२

टछा येसुये ओपैज़्यारंकं गालील सोनो यहुडियाला स्यान्टै नाङखार सोनो यरुसलेमलाम राव फरिसीरं सोनो न्याम पैने मीरं ओछ्योकं चुङडे यालिज़्याव। येसुसं स्यान्टैराई भन्डा घ्योव परमेस्वरलो ससम्ने ओसक्ति लेव। मीराई ओखङ उकुइ सिव टोबो मीलाई चारपाईटं झाडे यारोयो, होकाम नोराई हो मीलाई ज़ीःमलं येसुलो ओङाःकं रैने यापानो। हैनि पनि मीरं भ्या याटाव कारनये नोलाई ज़ीःमलं लाङने येम माडैडे ज़ीःम ढुरिटं यापुलुव, होकाम ज़ीःमलो ओछाने कोडे हो मीलाई ओचारपाईसंज़ येसुलो ओङाःकं यारोयो। होकाम येसुये हो मीराई याबिस्वास रःङडे ओजोरो राव मीलाई हैओडोव, “नपाप छेमा याटाडु।”

होकाम न्याम पैने मीरं सोनो फरिसीरं ऐ यावारो, “परमेस्वरलो उबिरोड डाने आव काङ्का? पाप के परमेस्वरये मान्त्राज़ छेमा डोडुव।”

हैनि पनि नोराई हैवार्ने यापान्ज़्याव रोः ठा सन्डे येसुये होरंलाई ऐ वार्डे जबाफ ओयोवरं, “जे जियुङलं कडि जिसुन्चिज़्याव? ‘नपाप छेमा याटा’ वार्ने सै ‘सोडे बाडे नान’ वार्ने, कैवार्ने सजालो उलिज़्याव? हैनि पनि मानवालो ओज़ालाई प्रिठीबीलं पाप छेमा डाने अडिकारले वार्ने जे सन्डे नैच्यो।” होकाम येसुये हो ओखङ उकुइ सिव मीलाई हैओडोव, “ङा नङलाई हैङाडानज़्या, सोङंन होकाम नचारपाई छेन्डे नज़ीःमडे गनानके।”

होकाम होपान्ट्राज़ होराई याङाःकंज़ सोडे, ओल गलङडे उलिज़्याव चारपाई घुर्डे परमेस्वरलो ओमहिमा डोये-डोये उज़ीःमडे ओनाव। होकाम स्यान्टै अचम्ब टाडे परमेस्वरलो ओमहिमा याडोव, होकाम याछ्यासैये ऐ यावारो, “गे आछिम अचम्बला रोःरं गेरःङखे।”

येसुये लेबीलाई उखुलो

मत्ती ९:९-१३; मर्कुस २:१४-१७

येसु पुलुडे पाखाडे ओनाव, होकाम लेबी याडोज़्याव टोबो सिरमा डुप्ने मीलाई सिरमा डुप्ने पोकं चुङडे उलिज़्याव रःङडे, नोलाई हैओडोव, “ङाछिन्ट राङन।” होकाम लेबीये स्यान्जाति राःडे, च्याङसिडे येसुलो उछिन-उछिन ओनाव।

लेबीये येसुलो ओलागिटं उज़ीःमलं बनै घ्योव भोज ओझोयो। नलं सिरमा डुप्नेरासं उरुका बनै भ्या मीरं येसुसं भोजलं चुङडे यालिज़्याव। फरिसीरं सोनो न्याम पैनेरं येसुलो उसिसराई याबिरोडलं ऐ वार्डे गन-गन यालेव, “जे सिरमा डुप्ने सोनो पापीरासं चुङडे कडाने ज़्याने ओँने जेडोज़्याव?”

हैनि पनि येसुये होरंलाई हैओडोवरं, “याजोरो मारावरंलाई बैड माचाहिये, रोगीरंलाई याज़ चाहिये। ङा सहि मीराई यालागिटं ङाराव माङ्क ची ङा के पापीराई यापापलाम यायुङ गसवोलरंकं वार्डे खुल्नेरं ङाराव ची।”

उपासिने बारेलं येसुलाई प्रस्न

मत्ती ९:१४-१७; मर्कुस २:१८-२१

नोराई येसुलाई हैयाडोव, “युहन्नालो उसिसरं उपासिने सोनो बनै प्रार्ठना डोरंये। फरिसीराई यासिसरं पनि उपासिरंये, हैनि पनि नङ नसिसरं के ज़्याने ओँने डोज़्यारं।”

येसुये होरंलाई ऐ ओडोवरं, “डुलाहा जन्तिरासं ओलेकं जन्तिरंलाई उपासिव जेपरिःङरं डोरो? हैनि पनि एटाव बेला रानेले, जोकं डुलाहा जन्तिरासं छुटिनेले। होकं नोरं उपासिनेलेरं।”

येसुये नोरंलाई टोबो सात्रो पनि हैओडोवरं, “काङ्कायेज़ साःरौ क्वालो टालाये पुरानो चिव क्वाटं माटालिव, मानिके नोये साःरौलाई चिवये, होकाम साःरौ टाला पुरानो क्वाटं मासुहिव टाये। काङ्का मीये पनि साःरौ मड्डलाई पुरानो छालालो पिर्गुललं माझाव, मानिके साःरौ मड्डये छाला चिवये, होकाम मड्ड पनि घुप्टिडे ना, पिर्गुल पनि नास टाये। साःरौ मड्डलाई साःरौ छालालो पिर्गुललंज़ नैने ची। पुरानो मड्ड ओँडे साःरौ मड्ड काङ्का मीयेज़ माओँव, कडालेकं नोये ‘पुरानोज़ बनै चाव लिज़्या हैवार्ये।’”

Source notes (3)
  1. Cross-reference मत्ती १३:१-२; मर्कुस ३:९-१०; ४:१
  2. Cross-reference युहन्ना २१:३
  3. Cross-reference युहन्ना २१:६

Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.