Wale Magar Kham
लुका 4
येसुलो उपरिछ्या
मत्ती ४:१-११; मर्कुस १:१२-१३
येसु चोखो आत्मालो ओसक्तिये ब्यालडे यर्डन भैलाम वोल्डे ओराव, होकाम चोखो आत्माये येसुलाई कडिज़ मालेव बनलं ओलाङो होकाम कडिज़ मालेव बनलं सैतानये येसुलाई चालीस डिन समं परिछ्या ओडोव। येसुये हो बेलाकं कडिज़ माज़्योडे उलिज़्याव, होकाम चालीस डिन ओखेमकं येसुलाई ओकरेव।
होकाम येसुलाई सैतानये हैओडोव, “नङ परमेस्वरलो ओज़ा टावसं आव जुरलाई बरे टाङंन वार्डे हैडो।”
येसुये नोलाई जबाफ ओयोव, “सर्सिवले, ‘बरेयाज़ ज़्याडे मी माबान्चिडु।’”
होकाम होये येसुलाई टोबो झेनो ढुरिटं लाङडे होपान्त्राज़ सङसारला स्यान्टै राज्य ओसंटन्ड्योव। सैतानये येसुलाई हैओडोव, “ङा आव स्यान्टै अडिकार सोनो आला लेव स्यान्टै ढन सम्पतिरं नङलाई ङायान, कडालेकं आव स्यान्टै ङाकुइटं सुम्पिसिव ले, होकाम ङा जोलाई इछ्या ङाडो होलाई ङायो। नङ ङालाई मान डाडे ढो नडाङखे भने आव स्यान्टै नमि टानेले।”
येसुये नोलाई एटाव जबाफ ओयोव, “सर्सिवले, ‘नङ स्यान्टैराई भन्डा घ्योव प्रभु, नपरमेस्वरलाई याज़ ढो डो होकाम होलो याज़ ओसेवा डो।’”
होकाम नोये येसुलाई यरुसलेमला प्रार्ठना ज़ीःमलो उढुरिटं लाङडे, हैओडोव, “नङ परमेस्वरलो ओज़ा टावसं आटाम फाल गझाके। कडालेकं सर्सिवले, ‘परमेस्वरये नङलाई जोगैनेलो लागिटं स्वर्गटा ओकटंवालरंलाई अरैनेरंले,’ ‘होकाम नङलाई नोराई याकुइ ठाङडे अडैनेलेरं, मानि के नखङ जुरटं टसिनेले।’”
येसुये नोलाई एटाव जबाफ ओयोव, “एटाव सर्सिवले, ‘नङ स्यान्टैराई भन्डा घ्योव नपरमेस्वरलो उपरिछ्या टाडो।’”
सैतानये येसुलाई स्यान्टै परिछ्या डोडे ओखेमो पान्त्रा फरि मौका ओम्डैया समं येसुलाई राःडे ओख्यानोयो।
येसुये गालीललाम ओसेवा ओठालिव
मत्ती ४:१२-१७; मर्कुस १:१४-१५
येसु चोखो आत्मालो ओसक्ति डैडे वोल्डे गालीललं ओराव, होकाम येसुलो ओबारेला रोः आसै होसैयाला स्यान्टैडे ओफैलिव। येसुये यहुडीरं याडुप्सिने ज़ीःमयालं ओपैरंकं स्यान्टैये ओप्रसन्सा डाडे यायोव।
नासरतलं येसुलाई याममानिव
मत्ती १३:५३-५८; मर्कुस ६:१-६
येसु ओल ओघ्योव सहर नासरतलं ओराव, येसु नाःसिने डिन छ्याम प्रार्ठना डोने ज़ीःमलं नाने ओबानिलेव, होकाम होलं नाडे चोखो सास्त्र परिःने वार्डे ओच्याङसिव। येसुलाई यसैया अगमबक्तालो ओपोस्टोको यायोव। येसुये नो पोस्टोको फैडे, होटं एटाव रोः सर्सिव खन्ड ओहायो,
“स्यान्टैराई भन्डा घ्योव प्रभुलो ओआत्मा ङासं ले,
कडालेकं गरिबरंलाई चाव सोर सठैनेलो लागिटं
परमेस्वरये ङालाई अभिसेक झैडेनैसोङो।
कैडला लेवरंलाई छुटैनेरं,
सोनो यामि मारोःनोरंलाई यामि सरःनड्याने,
हेलाहारी टावरंलाई यामान लेव झैनेलो लागिटं,
होकाम उमीरंलाई जोगैनेलो लागिटं स्यान्टैराई भन्डा घ्योव प्रभुलो सुहिव ओसमय राडेले वार्डे मीरंलाई सठैनेरं,
परमेस्वरये ङालाई परिःङडेनैसोङो।”
येसुये पोस्टोको पटैडे, यहुडीरं याडुप्सिने ज़ीःमला टोबो सेवा डाने मीलाई याडे उचुङो। होला लेव स्यान्टैराई येसुलाई रोःङोका रोःङो याटाव। होकाम येसुये होरंलाई हैओडोवरं, “आछिम सास्त्रटा आव बचन जेठैज़्याकं-जेठैज़्याकंज़ पुरा टाडेले।”
स्यान्टैराई येसुलो ओप्रसन्सा याडोव, येसुये मयासं ओपाङो ठैडे अचम्ब याटाव, होकाम नोरं हैयावारो, “आव के योसेफलो ओज़ा माङ्क डोरो?”
येसुये होरंलाई हैओडोवरं, “डस्साज़, जे ङालाई आव सात्रो हैडानेजेले ‘ए बैड, नङ ससम्सिन।’ कफर्नहुमलं नङ खाडंङ येःन नडोव गे ठैडेगेनै, हैटाव येःन आव नसहरलं पनि डो।” होकाम येसुये हैओवारो, “डस्साज़ ङा जेलाई हैङाडाच्यो, काङ्का अगमबक्तालाई पनि ओनाङखारलं खर्कज़ ओमान माटाये। ङा जेलाई सड्डे रोः हैङाडाच्यो, एलियालो ओपालालं इस्राएललं बनै भ्या रान्डिनिरं लेवरं, हो बेलाकं सोङ बर्स छ मैना नमं मावाडे डेसलं बनै घ्योव अनिकाल ओटाव। हैनि पनि एलिया उरु काङ्काराई याज़ीःमलं मानाये परमेस्वरये, सीडोन डेसला सारपतला लिज़्याव टोबो रान्डिनिलो उज़ीःमलं याज़ उपरिःङो। एलीसा अगमबक्ता उलिज़्याव बेलाकं इस्राएललं बनै भ्या कुःरिरं लेवरं हैनि पनि सिरियाला नामान याज़ ओसोमो, उरुका काङ्का पनि मासमरंये।”
आवरोः ठैडे यहुडीरं याडुप्सिने ज़ीःमलं लेव मी भरि स्यान्टै यारिसये मोल याटाव। नोरं च्याङसिडे येसुलाई नाङखारलाम हाइडे नोराई डान्डालो उढुरिटं लाङडे मेलं ख्याने यापानो, हो ढुरिटं नोराई यानाङखार लेव। हैनि पनि येसु होराई याखार्लाम बाडे ओनाव।
माचाव आत्माये ओडापो मी
मर्कुस १:२१-२८
येसु गालीलला टोबो सहर कफर्नहुमलं ओनाव। यहुडीरं यानाःसिने डिन छ्याम येसुये होला मीरंलाई ओपैज़्यावरं। येसुये अडिकारसं ओपाङज़्याव ठैडे होला मीरं अचम्ब याटाव। यहुडीरं याडुप्सिने ज़ीःमलं माचाव आत्माये डापडे ओनैज़्याव टोबो मी लेव, हो बनै कस्सिडे उकिःव, “ए नासरतला येसु, गेसं नयेःन कडि उलिज़्याव? होकाम नङ गेलाई समल्ने नराव रो? ङालाई ठा ले, नङ परमेस्वरलो चोखो ओमी ची।”
होकाम येसुये नोलाई ऐ वार्डे ओहक्लोयो, “गाइगुइ टालेन, नो मीलो ओक्याङटाम पुलुडे नान।” नो मीलाई कडि हानि माझैडे मीराई याखार्ल फङ टडे नो माचाव आत्मा नो मीलो ओक्याङटाम पुलुडे ओनाव।
होकाम होला मी भरि अचम्ब टाडे, या-याज़ ऐ वार्डे रोः याडोव, “आव खेटाव बचन खेने? आवये के भुत आत्मारंलाई पनि अडिकार सोनो सक्तिसं ची अरैज़्यावरं, होकाम नोरं पुलुडे नाज़्यारं।” होकाम आसै होसैयाला नाङखार यालं स्यान्टैडे येसुलो ओरोः ओफैलिव।
येसुये भ्या मीरंलाई ओससोमोरं
मत्ती ८:१४-१७; मर्कुस १:२९-३४
येसु यहुडीरं याडुप्सिने ज़ीःमलाम पुलुडे सिमोनलो उज़ीःमलं ओनाव। होलं सिमोनलो, उमैज्यु बनै ओजोरो राडे ठलिडे उलिज़्याव, होकाम नोराई होलो ओलागिटं येसुलाई प्रार्ठना डोड्यासि वार्डे बिन्ती याडोव। येसुये होलो ओछ्योकं च्याङसिडे जोरोलाई ओहक्लोयो, होकाम होलाई जोरोये ह्वाङ ओराःव, होकाम होये होपान्ट्राज़ सोडे येसुराई यासेवा ओडोव।
होकाम निमी उनुपरिव बेलाकं नोराई छुटं-छुटं रोगोये ठलिव मीरंलाई येसु लेवकं यारोयोरं। हो स्यान्टैरंलाई येसुये यातर्ट उकुइ नैडे ओससोमोरं। बनै भ्या मीराई याक्याङटाम ज़्याःर ऐ वार्डे किःये किःये यापुलुव, “नङके परमेस्वरलो ओज़ा ची।” हैनि पनि येसुये नोरंलाई हक्लैडे पाङो मायोवरंये, कडालेकं नोराई येसुलाई परमेस्वरलो ओज़ा ची वार्डे सःरेरंये।
यहुडीरं याडुप्सिने ज़ीःमलं येसुये ओपोयो
मर्कुस १:३५-३९
छकाल्ने उज्यालो ओटाकं येसु पुलुडे कडिज़ मालेव बनलं ओनाव। होकाम बनै भ्या मीरं येसुलाई खिमये-खिमये ओल लेवकं राडे, “गेलाई टाख्यानैसि” वार्डे येसुलाई वोङने यापानो। हैनि पनि होरंलाई येसुये हैओडोवरं, “ङा परमेस्वरलो ओराज्यला चाव सोर उरुका नाङखारयालं पनि सठैने लिज़्या, कडालेकं परमेस्वरये ङालाई आव येःनलो ओलागिटंज़ उपरिःङसोङो ची।”
होकाम येसुये यहुडियाला स्यान्टै यहुडीरं याडुप्सिने ज़ीःमयालं प्रचार ओडोव।
Wale Magar Kham. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.