ኤርማሳ

ኤርማሳ ትምቢትያ

ገሉዋ

ትምቢትያ ኦድያ ኤርማስ፥ ክርስቶስ የለታናፐ ካሰ ላፑን ጼቱ ላይ ዉርሰንነ ኡሱፑን ጼቱ ላይ ዶመ ሄራን ደኤዳ። ኤርማስ ዳሮ ዎድያ ኦዳ ባረ ኦሱዋን ኡንቱንቱ ኤቃ ጎይኑዋነ ኡንቱንቱ ናጋራ ኦሱዋ ጋሱዋን ጾሳ አሳ ቦላ ዎልቃማ ባሻይ ዪደ ደእያዋ ኡንቱንታ ምንሲደ ኤርሴዳ። ባረ ኦዴዳዌ ኡባይ ፖለቴዳዋ ፓጻ ደኢደ ባረ አይፍያን በኤዳ። ባብሎነ ካቲ ናቡካዳናጾር የሩሳላመ ኦይቂደ፥ ካታማነ ጌሻ ጎልያ ላሌዳ። ይሁዳ ካዉነ አሳፐካ ዳርያ ባጋይ ኦሞደቲደ ባብሎነ ቤዳ። ጉጂደካ ኤርማስ አሳይ ኦሞዱዋፐ ስማናዋነ እስራኤልያ ካዉተይ ኤቃናዋ ካሰቲደ ኦዴዳ።

ኤርማሳ ማጻፋ ኦይዱ ከሲደ በአናዉ ዳንዳየቴ።

1. ናብያ ጼሳባ፥ እዮስያሳ፥ ዮኣቄማ፥ ዮኣኪናነ ሰደቅያሳ ካዉተ ላይቱዋን ይሁዳ አሳስነ ኡንቱንታ ካለያዋንቶ ጾሳፐ ዬዳ ቃላ።

2. ሀናናዉ ኦደቴዳ ዱማ ዱማ ቃላቱዋነ ኤርማሳ ደኡዋን ፖለቴዳ ዋና ዋና የዎቱዋ ጉጂደ፥ ኤርማሳ ጻፍያ ባሩክ ጻፊደ ኦይቄዳ ቄር ዳዉታርያፐ ቤቴዳ ጹፈቱዋ።

3. ዱማ ዱማ አላጋ ቢታ አሳዉ ጾሳፐ ኦደቴዳ ትምቢትያ ቃላቱዋ።

4. የሩሳላመ ኦይቀባነ አሳይ ኦሞደቲደ ባብሎነ ባናዋ ኦድያ ጉጆ ታርከቱዋ።

ኤርማስ ባረ አሳ ሎይ ሲቅያነ ኡንቱንቱ ቦላ ባየ ፕርዳ አናዉ ሎይ ዳሮ እጽያ አሳ። ትምቢትያ ኦድያ አሳ ግዲደ ኦና ማላ ጾሳይ አ ጼሴዳ ድራዉ፥ ባረና ጋኬዳ መቱዋ ጋሱዋን እ ካዮቴዳ ምኖ ካዩ አ ማጻፋ ግዶን ዳሮ ሳኣን ጻፈት ኡቴዳ። ጾሳ ቃላይ አ ዎዛና ግዶን ታማዳን ጹግያ ድራዉ፥ ሄዋ ባሪደ ዎ አጋናዉ ዳንዳይቤናዋ ቆንጭሴዳ።

ሀ ማጻፋን ጻፈቴዳ ትምቢትያ ኦዴዳ ዎልቃማ ዎልቃማ ቃላቱዋፐ እቱ እቱ መቱ ኩሜዳ ኤርማሳ ላይፐ አደ፥ ዎዛናን ጻፈተደ ድራዉ፥ ሀሳይስያ አስታማሪ ኮሸናን፥ ኡባ ገደ ናግያ ኦራ ጫቁ ጾሳ አሳዉ እመትያ ዎዲ ያናዉ ደእያዋ ማላቲኖ (31:31-34)።

ሸምፓቱዋ ኡባቶ እመቴዳ ቃን ቆፋቱዋ

ጾሳይ ኤርማሳ ዶሬዳ

ጾሳይ ይሁዳነ እስራኤልያ አሳ ሙርያዋ

ኤርማስ ዎርዶ ናባቱዋ ኤቀቴዳ

ጾሳይ ባረ አሳ ባረንቱ ቢታዉ ዛራና

ኤርማሳ ዱማ ዱማ ኦሶቱዋ

የሩሳላመ ኩንደነ ይሁዳን መቴዳ ሀኖታቱዋ

ኤርማስ ግብጼ ቤዳ

ባሮካዉ ኦደቴዳ ትምቢትያ

ናቢ ዱማ ዱማ አሳዉ ኦዴዳ ትምቢትያ

የሩሳላመ ኩንደባዉ ኪተቴዳ ጉጃ ኦዱዋ