Skip to content
BibleKenya

Dawro Full Bible Ethiopic

ኤርማሳ 2

ጾሳይ ይሁዳነ እስራኤልያ አሳ ሙርያዋ

(ኤር. 2:1—25:38)

እስራኤልያ አሳ ናጋራ

መና ጎዳ ቃላይ ታዉ ዪደ፥ “ባደ የሩሳላመ አሳ ሀይን ሀዋዳን ያጋደ አዋያ፤ ‘ኔን ያላጋተን ታዉ አይ ኬሻ አማነቴደንቶ፥ ቃይ ኔን ብሮ ምሽራን ደእያ ዎደ፥ ታና አይ ኬሻ ሲቄደንቶ፥ ታን ጾሳይ ሀሳያይ። ኔን ባዞ ግዱዋና፥ ዘረይ ዘረት ኤረና ቢታና ታና ካላዳ። ሄ ዎደ እስራኤሊ መና ጎዳዉ ጌሻ። አዉ ባይራ ካ ማላ፤ አፐ ሜዳ ኡባቱ ባይዛንቻ ግዲኖ። ያትና፥ ኡንቱንቱ ቦላ ኢታባይ ዬዳ። መና ጎዳይ ሀዋ ኦዳድ’ ያጋ” ያጌ።

ህንተኖ፥ ያቆባ አሳቶ፥ እስራኤልያ ዛረቶ፥ ኡባይካ መና ጎዳ ቃላ ስስተ! መና ጎዳይ ሀዋዳን ያጌ፤ “ካሰ ህንተ አዎቱ ታናን አይ ባይዙዋ ደሚደ፥ ታፐ ሃኪደ ቤድኖ? ኡንቱንቱ ፓና ኤቃቶ ጎይኒደ፥ ፓናባ ግዴድኖ። ኡንቱንቱ፥ ‘ኑና ግብጼፐ ከሴዳዌ፥ መላ አፎ ግዴዳ ባዙዋና፥ ኮሻይነ ጵ ጎ ማይ ደእያ ቢታና፥ አይ አሳይነ አና ዎይ ደኤና ሳና ካለዳ መና ጎዳይ ሀቃን ደኢ?’ ያግበይክኖ። ህንተ አፐ ቴራነ ሎኦባ ማና ማላ፥ ታን ህንተና ቱኤ ቢታዉ አሃድ፤ ሽን ህንተ ዪደ፥ ታ ቢታ ቱንሴድታነ ታ ላታ ኢሴድታ። ቄሳቱ ካ፥ ‘መና ጎዳይ ሀቃን ደኢ?’ ያግበይክኖ። ታ ህጊ ኡንቱንቱ ኩሽያን ደእያ አሳቱካ ታና ኤርበይክኖ። አሳ ሞድያዋንቱካ ታ ቦላ ማካሌድኖ። ትምቢትያ ኦድያዋንቱካ ባኣላ ሱንን ትምቢትያ ኦዲደ፥ ፓና ኤቃቶ ጎይኔድኖ” ያጌ።

ቃይካ መና ጎዳይ ሀዋዳን ያጌ፤ “ሄዋ ድራዉ፥ ታን ህንተና ብሮካ ሞታና፤ ህንተ ናናቱዋ ናናቱዋካ ሞታና። አነ አዋይ ዶልያ ባጋ ቢደ፥ ቆጲሮሳ ግያ ሃን ዶደቴዳ ቢታ ጼልተ። ዎይ አዋይ ዉልያ ባጋ ቄዳረ ግያ ቢታ አሳ ኪቲደ ጾሞስስተ። ያቲደ አነ ሀዋ ማላባይ ሀዋፐ ካሰ ባጋን ሀኔደንቶነ በእተ። ኡንቱንቱ ቱሙ ጾሳቱዋ ግዳና ዮፐነ፥ ደሪ ባረ ጾሳቱዋ ላምቤና። ሽን ታ አሳይ ታና ባረ ቦንቹዋ ፓና ኤቃቱዋን ላሜዳ” ያጌ።

ቃይካ መና ጎዳይ ሀዋዳን ያጌ፤ “ሳሎቶ፥ ‘ፖራ!’ ጊተ፤ ዳጋሚደ ኮኮርተ! አያዉ ጎፐ፥ ታ አሳይ ላኡ ኢታባቱዋ ኦዳ፤ ሄዋንቱነ፥ ደኡዋ ሃ ፑልቱዋ ታና አጌዳ፤ ሃ ኦይቃናዉ ዳንዳየና፥ ጾኤት ድጌዳ ኦላ ባረዉ ቦኬዳ።

“እስራኤሊ ቆማነ ግደና፤ ሶን የለቴዳ አይለነ ግደና። ያትና፥ እ አያዉ ዶአይ ኦይቂያዋ ግዴዴ? አ ሞርከቱ ጋሙዋዳን፥ አ ቦላን ጉዴድኖ። ኡንቱንቱ ባረንቱ ቃላ ቁ ኦደ ዳሬድኖ፤ ኡንቱንቱ አ ቢታ መላ ከሴድኖ፤ አ ካታማቱካ ላለቲደ፥ ደእያዋ ዬድኖ። ሄዋ ቦላካ መምፕሳነ ጻፍናሳ አሳቱ አ ሊጲያ ሜዴድኖ። ኔኖ እስራኤልያዉ፥ እ ኔና ኦግያን ካለሽን፥ መና ጎዳ ነ ጾሳ አጌዳዋን ሀዋ ነ ቦላ አሄዳዌ ኔና ግድኪ? ናይለ ሻፋፐ ሃ ኡሻናዉ ግብጼ ብያዌ ኔና አያ ማዳኔ? ዎይ ኤፍራጺሳ ሻፋፐ ሃ ኡሻናዉ አሶረ ቢታ ብያዌ ኔና አያ ጎአኔ? ስም ነ ኢታተይ ኔና ሙራና፤ ኔን ታና አጌዳዌ ነ ቦላ ፕርዳና” ያጌ።

መና ጎዳይ፥ ኡባፐ ዎልቃማ ጾሳይ ሀዋዳን ያጌ፤ “ኔን ታና መና ጎዳ ነ ጾሳ አጌዳዌ አይ ኬሻ ኢታነ ጫማ ግድንቶ፥ አነ ኤራነ በአ። ኔን ታዉ ያይያ ያሻይ ኔናን ባዋ።

“ታን ነ ሞርገ ም በን መንድ፤ ነ ቃሹዋካ ዱድ። ያትናካ፥ ‘ታን ነዉ ኦከ’ ያጋዳ። ደርያ ኡባ ቦላነ ዳሻ ም ኡባ ጋርሳን ሻርሙጻዳን ግሳዳ። ታን ኔና በርተ ዘረፐ አካደ፥ ሎኦ ዎይንያ ቱራዳን ቶካድ። ያትና፥ ዋና ጉየ ስማደ፥ ዎራን ዶሌዳ፥ ባዬዳ ዎይንያ ቱራ ግዳዲ?” ያጌ።

ቃይካ ኡባ ሞድያ መና ጎዳይ ሀዋዳን ያጌ፤ “ኔን ሀንጪጭያን ሜጨታንቶካ፥ ሳሙና ዳርሳደ ጎርፐታንቶካ፥ ነ ባይዙዋ ቅታይ ሀእካ ታ ስንና። ኔን ዋናደ፥ ‘ታን ቱናበይከ፤ ታን ባኣላ ኤቃቶ ጎይናናዉ ዎጻበይከ’ ጋናዉ ዳንዳያይ? አነ ኔን ዎምባን ሀኔዳዋ ጼላ፤ ኔን ኦዳዋነ አኬካ። ኔን ያነ ሃነ ዎ ጃምያ ጋላት ማላ። ኔን ባዙዋ ሜዘቴዳ፥ ባረ ዚታ ዎደ ጫርኩዋ ስንገያ ሀራት ማላ። አ ብራሳዉ ኤቃ ክችና፥ ኦን እዞ ተአናዉ ዳንዳዪ? እዞ ዚትያ አይ ዎዳላ ሀሪነ ዳቡረና፤ እ እዝ ጨገናን እዞ ደም አጌ። ኔኖ፥ እስራኤልያ፥ ነ ጫማይ ዉራና ጋካናስነ ነ ኮኪ መላና ጋካናዉ፥ ሀራ ጾሳቱዋ ጌዱዋ ሀዋዳን ዎጾፓ። ሽን ኔን፥ ‘እጻዳ፤ ሄዌ ታና አይነ ማደና። አያዉ ጎፐ፥ ታን እማ ጾሳቱዋ ሲቃ ድጋድ፤ ታን ኡንቱንቶ ጎእናና’ ያጋዳ።

“ካይሱ ኦይቀቴዳ ዎደ ዬላትያዋዳን፥ እስራኤልያ አሳይ ዬላቴ፤ ኡንቱንቱካ፥ ኡንቱንቱ ካተቱ፥ ኡንቱንቱ ካፓቱ፥ ኡንቱንቱ ቄሳቱ ነ ኡንቱንቱ ትምቢትያ ኦድያዋንቱ ኡባይ ዬላቲኖ። ኡንቱንቱ ም፥ ‘ኔን ታ አዉዋ’ ያጊኖ፤ ቃይ ሹቻ፥ ‘ኔን ታና የላዳ’ ያጊኖ። ኡንቱንቱ ታዉ ባረንቱ ሶምኡዋ አጊደ፥ ባረንቱ ዞክያ ዛሬድኖ። ሽን ኡንቱንቱ መቶትያ ዎደ ታና፥ ‘ደንዳ! ኑና አሻ!’ ያጊኖ። ሽን አነ፥ ህንተ ህንተዉ መዳ ጾሳቱ ሀቃን ደእኖ? ህንተ መቶትያ ዎደ ህንተና አሻናዉ ዳንዳዮፐ፥ አነ ደንድኖ! ህንተኖ፥ ይሁዳ አሳቶ፥ ህንተ ጾሳቱ ህንተ ካታማቱዋ ኬሻ ጮራ” ያጌ።

መና ጎዳይ ሀዋዳን ያጌ፤ “ህንተ ታናና አያዉ ሞተቲቴ? ህንተ ኡባይካ ታዉ ማካሌድታ። ታን ህንተና ጮ መላ ሙራድ፤ ህንተ ባይበይክታ። ኮሻቴዳ ጋሙዋዳን፥ ህንተ ማሻይ ህንተ ትምቢትያ ኦድያዋንታ ም ድጌዳ” ያጌ።

ህንተኖ፥ ሀ ዎድያ የለታቶ፥ መና ጎዳ ቃላ ስስተ! እ ሀዋዳን ያጌ፤ “ታን ህንተዉ፥ እስራኤላቶ ባዞ ማላ ዎይ ጵ ጎ ማ ቢታ ማላ ግዳድታየ? ያትና፥ አያዉ ታ አሳይ፥ ‘ኑን ኑ ሸንያዳን ባና፤ ላኤን ኡባካ ኔኮ ስሞኮ’ ያጊ? ወዶራታ ባረ አሌቁዋ ዎይ ቡላቼትያና ባረ ቡላቻ ማዩዋ ዶጋይ? ሽን ታ አሳይ ታና ፓይዱ ባይና ጋላሳ ዶጌዳ። ኔን ነ ላገቶ ጌዱዋ ዎጽያዋ አያ ሜዘታዲ! ሎይ ኢታ ማጫ አሳቱካ ነ ኦግያፐ ታማራናዉ ዳንዳዪኖ። ቃይ መንደ ገልሽና ኦይቄዳ አሳ ሱን ግደናን፥ ጽሎ ህዬሳቱዋ ሱ ጩዋን ነ ማዩ ባይ ኡቴዳ።

“ኔን ሀዋ ኡባ ኦደካ፥ ‘ታን ጽሎ፤ ቱሙዋፐ ጾሳይ ታ ቦላ ሀንቀተና’ ያጋሳ። ኔን፥ ‘ታን ናጋራ ኦበይከ’ ግያ ድራዉ፥ ታን ነ ቦላን ፕርዳና። ያትና ኔን ነ ኦግያ ላማናዉ አያዉ ብቻራይ? ካሰ ኔና አሶረ ቢታይ ዬላዬዳዋዳን፥ ግብጼ ቢታይካ ዬላያና። ኔን ሀዋፐካ ነ ሁጲያ ኦይቃደ ከሳና። አያዉ ጎፐ፥ መና ጎዳይ ኔን አማነትያዋንታ እጼዳ። ኔን ኡንቱንቱን ማደታካ” ያጌ።

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.