Dawro Full Bible Ethiopic
ኤርማሳ 11
ኤርማሳነ ጾሳ ጫቁዋ
መና ጎዳፐ ኤርማሳዉ ዬዳ ቃላይ ሀዋ፤ “ሀ ጫቁዋ ቃላቱዋ ስሳ፤ ይሁዳ አሳዉነ የሩሳላመ ካታማን ደእያዋንቶ ኦዳ። መና ጎዳይ እስራኤልያ ጾሳይ ሀዋዳን ያጌ ጋደ ኦዳ። ሀ ጫቁዋ ቃላዉ አዛዘተናዌ ሸቀቴዳዋ ግዶ። ታን ካሰ ህንተ አዎቱዋ ግብጼ ቢታፐ፥ ብራታ ሴርስያ ጮጭያፐ ከስያ ዎደ፥ ታዉ ኤኖ ጊተ፤ ታ ህንተና አዛዝያዋ ኡባ ኦተ። ያቶፐ፥ ህንተ ታ አሳ ግዳና፤ ታንካ ህንተ ጾሳ ግዳና ያጋድ። ሄዋዳንካ፥ ማነ ኤሳ ጎግያ ቢታ ካሰ ህንተ አዋቶ እማናዉ፥ ታን ጫቄዳ ጫቁዋ ፖላና ያጋድ። ሄዌነ፥ ሀች ህንተ ላቴዳ ቢታ ያጋ” ያጌ።
ታን፥ “ኤኖ፥ መና ጎዳዉ፥ አመንእ” ያጋድ።
መና ጎዳይ ታዉ ሀዋዳን ያጌዳ፤ “ሀዋ ታ ቃላ ኡባ ይሁዳ ካታማቱዋንነ የሩሳላመ ኦገቱዋን ሀዋዳን ያጋደ አዋያ፤ ‘ሀ ጫቁዋ ቃላ ስስተ፤ አ ካልተ። ካሰ ህንተ አዎቱዋ ታን ግብጼ ቢታፐ ከሶደፐ ሀች ጋካናዉ፥ ዛራ ዛራደ፥ “ታዉ አዛዘትተ!” ጋደ ሴራድ። ሽን ኡንቱንቱ ታ ቃላ ስስበይክኖ ዎይ ሀይዝበይክኖ። ሄዋ አጊደ፥ ኡንቱንቱ ባረንቱ ኢታ ዎዛና ሙመተ ካሌድኖ። ታን ታ ጫቁዋ ቃላ ኡንቱንቱ ናጋና ማላ አዛዛድ፤ ሽን ኡንቱንቱ እጼድኖ። ሄዋ ድራዉ፥ ሄ ጫቁዋ ግዶን ጻፈቴዳ ሸቃ ኡባ ኡንቱንቱ ቦላ አሃድ’ ያጋ” ያጌዳ።
ዛሪደካ መና ጎዳይ ታዉ ሀዋዳን ያጌዳ፤ “ይሁዳ አሳ ግዶንነ የሩሳላመን ደእያዋንቱ ግዶን ማቁ ደኤ። ኡንቱንቱ ካሰ ታ ቃላ ስሰናን እጼዳ ባረንቱ ማይዛ አዎቱዋ ናጋራዉ ጉየ ስሜድኖ። ኡንቱንቱ ሀራ ጾሳቶ ጎይኔድኖነ ኡንቱንቶ ኦድኖ። እስራኤልያ አሳቱካ ይሁዳ አሳቱካ ታን ካሰ ኡንቱንቱ ማይዛ አዎቱዋና ጫቀቴዳ ጫቁዋ ካንድኖ። ሄዋ ድራዉ፥ መና ጎዳይ ኡንቱንታ ሀዋዳን ያጌ፤ ‘ኡንቱንቱ ባቃቲደ አታናዉ ዳንዳየና መቱዋ ታን ኡንቱንቱ ቦላ አሀና። ኡንቱንቱ ታዉ ዋስናካ፥ ታን ኡንቱንቶ ስስከ። ሄ ዎደ ይሁዳ ካታማቱዋ አሳቱነ የሩሳላመ አሳቱ ቢደ፥ ባረንቱ እጻና ጩዋይያ ጾሳቶ ዋሳና። ሽን መቱዋ ዎደ ሄ ጾሳቱ ሙለካ ኡንቱንቱ ማድክኖ። ህንተኖ፥ ይሁዳ አሳቶ፥ ህንተ ጾሳቱ ህንተ ካታማቱዋ ኬሻ ጮራ። ቃይ ባኣላ ግያ ሄ ዬላ ጾሳዉ እጻና ጩዋያናዉ ህንተ ኤሴዳ ያርሽያ ሳአቱ የሩሳላመ ኦገቱዋ ኬሻ ጮራ’ ያጌ።
“ኤርማሳ፥ ሀ አሳቶ ታና አይነ ዎሶፓ፤ ኡንቱንቱ ድራዉ ጋናቶፓ ዎይ ኦቾፓ። አያዉ ጎፐ፥ ኡንቱንቱ ባረንቱ መቱዋ ጋላስ ታና ጼስያ ዎደ ታን ኡንቱንቶ ስስከ።
“ዳሮቱዋና ባረ ኢታ ማቁዋ ማቀትደ ታ ሲቅያ አሳይ ታ ጌሻ ጎልያን ቤታናዉ በሲ? ህንተ ህንተ ኢታ ኦሱዋ ኦሽን፥ ያርሸቴዳ መህያ አሹ ህንተና ሙሩዋፐ አሻኔ? አሽንቶ ህንተ ናሸታና ሽን” ያጌዳ።
መና ጎዳይ ኔና፥ ድጭያ፥ ሎኦ አይፍያ አይፍያ ዎጋራ ያጊደ ሱንዳ። ሽን እ ሀ ዎጋራ ዎልቃማ ዳዳ ጉንን፥ ታማን ጹጋና፤ አ ቃንካቱካ መኤረታና።
ታን፥ ህንተና ቶኬዳ ኡባፐ ዎልቃማ መና ጎዳይ ህንተ ቦላ ኢታባ አሀናዉ አዋያድ። አያዉ ጎፐ፥ እስራኤልያ አሳቱነ ይሁዳ አሳቱ ባኣላዉ እጻና ጩዋዪደ፥ ታና ይሎዬድኖ።
ኤርማሳ ዎናዉ ማቀቴዳ ማቁዋ
መና ጎዳይ ኡንቱንቱ ማቁዋ ታዉ ቆንጭሴዳ ድራዉ፥ ታን ኤራድ። ሄ ዎደ ኡንቱንቱ ኢታ ኦያዋ እ ታና በሴዳ። ታን ሹካዉ ካለደ አፍያ አዳ ዶርሳ ማራ ማላ ግዳድ። ኡንቱንቱ ታ ቦላ፥ “አነ ኑን ምካ አ አይፍያካ ይሴቶ። አ ሱንይ ሙለካ ሀሳየተና ማላ፥ አነ ኑን አ ፓጻ ደእያዋንቱ ግዶፐ ቆሊደ ይሴቶ” ያጊደ ማቀቴዳዋ ታን ኤራበይከ። ሽን አቤት ኡባፐ ዎልቃማ መና ጎዳዉ፥ ጽሉዋ ፕርድያዎ፥ አሳ ዎዛና ካሃ ቆርያዎ፥ ኔን ኡንቱንቱ ቦላ ነ ሀሉዋ ከስያዋ ታና በሳ። አያዉ ጎፐ፥ ታን ታ ቆሁዋ ነዉ ማጋናድ።
ሄዋ ድራዉ፥ “መና ጎዳ ሱንን ትምቢትያ ኦዶፓ፤ ኔን ኑ ኩሽያን ሀይቃና” ያጊደ፥ ኔና ዎናዉ ኮይያ አናቶታ አሳዉ መና ጎዳይ ግያዌ ሀዋ። ኡባፐ ዎልቃማ መና ጎዳይ ሀዋዳን ያጌ፤ “ታን ኡንቱንታ ሙራና። ኡንቱንቱ ዎዳላቱ ማሻን ሀይቃና፤ ኡንቱንቱ ማጫ ናናቱነ አቱማ ናናቱ ኮሻን ሀይቃና፤ ኡንቱንቱፐ እቱነ ደኤና። አያዉ ጎፐ፥ ታን ሙርያ ላይ አናቶታ አሳ ቦላ ኢታባ አሀና” ያጌ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.