Dawro Full Bible Ethiopic
ኤርማሳ 10
ጾሳነ ኤቃ
ህንተኖ፥ እስራኤልያ አሳቶ፥ መና ጎዳይ ህንተዉ ኦድያ ቃላ ስስተ! መና ጎዳይ ሀዋዳን ያጌ፤ “ደረቱዋ ኦግያ ህንተ ታማሮፕተ። ደረቱ ሳሉዋ ቦላ ማላታ በኢደ ዳጋሞፐካ፥ ህንተ ዳጋሞፕተ። አያዉ ጎፐ፥ ደረቱዋ ዎጋይ መላ። ኡንቱንቱ ም ዎራፐ ቃንጺኖ፤ ማስያዌ ካልታን ማሴ። ኡንቱንቱ ብራንነ ዎርቃን አሌቂሲኖ፤ ቃጸናዳን ማዶሻን ምስማርያ ሺደ ኦይኖ። ኡንቱንቱ ኤቃቱ ኡንቱንቱ ሌክያ ጋርሳን ካፉዋ ዳጋንናዉ ኤስያ ምስልያ ማላ። ሃሳያናዉ ዳንዳይክኖ። ሀመታናዉ ዳንዳየና ድራዉ፥ አሳይ ኡንቱንታ ቶኬ። ኡንቱንቶ ሙለካ ያዮፕተ። አያዉ ጎፐ፥ ኡንቱንቱ ህንተና ቆሀናዉ ዳንዳይክኖ፤ ቃይ ማዳናዉካ ዳንዳይክኖ” ያጌ።
አቤት መና ጎዳዉ፥ ነ ማላይ ኦንነ ባዋ። ኔን ዎልቃማ፤ ነ ሱንይካ ዎልቃማነ ዎልቃማ። አቤት ካዉተቱዋ ካትያዉ፥ ኔና ቦንቼናን አጋናዌ ኦኔ?1 ኔና ቦንቻናዉ በሴ፤ አያዉ ጎፐ፥ አዳ ኤራንቻ አሳ ግዶንነ ኡንቱንቱ ካዉተ ኡባ ግዶን ነ ማል ባዋ። ኡንቱንቱ ኤያነ ዶንጭሎዋንታ፤ ኡንቱንቱ ምፐ ማሴዳ፥ ፓና ኤቃቱዋፐ አያ ታማሪኖ? ሄ ኤቃቱ ታርሴሳፐ ዬዳ ብራንነ ኡፋዘፐ ዬዳ ዎርቃን አሌቀቴድኖ። ኡንቱንቱ ዎይንያ ኤሳነ ሳሉዋ ማላትያ መዋና ማዩዋን ካመቴድኖ። ኡንቱንቱ ኡባይ ኩሽያ ኦሱዋ ሂላቱዋን ኦሰቴድኖ። ሽን መና ጎዳይ ቱሙ ጾሳ፤ እ ደኡዋ ጾሳነ መና ካትያ። አ ሀንቁዋን ቢታይ ቃጼ፤ ካዉተቱካ አ ሀንቁዋ ዳንዳይክኖ።
ጾሳይ ሀዋዳን ያጌ፤ “ኡንቱንቶ ሀዋዳን ያጋደ ኦዳ፤ ‘ሄዋንቱ ሳሉዋነ ሳኣ መቤና ጾሳቱ ሳኣፐነ ሳሉዋ ጋርሳፐ ያና’ ያጋ” ያጌ።
ጾሳ ሳቢያ ሳባ
ባረ ዎልቃን ሳኣ መዳዌ፥
ባረ አዳ ኤራን ሳኣ ኤሴዳዌ፥
ባረ አኬካን ሳሎቱዋ ምጬዳዌ አ።
እ ዎልቃምያ ዎደ፥
ሳሎቱዋን ደእያ ሃቱ ጉሚኖ።
እ ሻረቱዋ ሳኣ ጋጻፐ ፑደ ደን።
እ እራ ቡክሲደ፥
ዋልቃን ዎልቃምሴ።
ጫርኩዋካ ባረ ምንጃ ሳፐ ከሴ።
አስ ኡባይ ኤራ ዪደ ዳሜዳ፤
ዎርቃ ትግያ አሳይ ኡባይ
ባረ ኤቃቱዋን ዬላቴዳ።
አያዉ ጎፐ፥ ሄ ኤቃቱ ጭሙዋ፤
ኡንቱንቱን ሸምፑ ባዋ።
ኡንቱንቱ ፓናባ፤
ኡንቱንቱ ቅ ኦሱዋ።
ኡንቱንቱ ሙረትያ ዎድያን ያና።
ሽን ያቆባ ሳማ ግድያዌ
ሄዋንቱ ማላ ግደና።
አያዉ ጎፐ፥ እ ኡባባ መዳዋ፤
እስራኤሊ እ ባረዉ ዶሬዳ ካዉተ።
አ ሱንይካ ኡባፐ ዎልቃማ መና ጎዳ።
ይያ ኢታ
ህንተኖ፥ ሞርኪ ዶዴዳዋንቶ፥ ቢታፐ ከሳናዉ ህንተዉ ደእያዋ ቆሪደ ሺሽተ። አያዉ ጎፐ፥ መና ጎዳይ ሀዋዳን ያጌ፤ “ታን ሀ ዎድያን ሀ ቢታን ደእያ አሳቱዋ ከሳደ ያምባራና። ህንተ ኦሞደታና ማላ፥ ታን ህንተ ቦላ ኢታባ አሀና” ያጌ።
አየ ታ ማዱዉ! ታ ማዱይ ፓጸናዋ። ሽን ታን፥ “ሀዌ ታ ሀርግያ፤ ታን ዳንዳያናዉ በሴ” ያጋድ።
ታ ዱንካኒ ኮለት ዬዳ፤ አ ዎዶሩ ኡባይ ዱጸረቴዳ። ታ ናናቱ ኡባይ ታፐ ሻከቲደ ብ ክቼድኖ፤ ኡንቱንቱ ባዋ። ታ ዱንካንያ ዛሪደ ቶላናዉ ዎይ ታ ጋርዱዋ ካቃናዉ ሀእ እት አሳይነ አትቤና።
ሄንንቻቱ ዳሜድኖ፤ ኡንቱንቱ መና ጎዳ ኦችበይክኖ። ሄዋ ድራዉ፥ ኡንቱንቶ እንጀተናን እጼዳነ ኡንቱንቱ ዉዲ ኡባይ ላለቴዳ። ስስተ! ኦራ ኦዱ ዬዳ፤ ሄዌነ፥ “ሁጲሳ ባጋና ደእያ ካዉተን ዎልቃማ ድርባይ ደንዴ” ያግያዋ። አ ኦላንቻቱ ዪደ፥ ይሁዳ ካታማቱዋ ባዙዋነ ዎራካናቱ ጌሶይያሳ ከሳና።
አቤት መና ጎዳዉ፥ አሳ ደኡ ሄ አዎ ቡዞ ግደናዋነ ባረ ሄመታ ሱርሳናዌ አዉ ሸነ ግደናዋ ታን ኤራይ። አቤት መና ጎዳዉ፥ ታና ሴራ፤ ሽን ልክያን ግዶ። ነ ሀንቁዋን ግዶፖ፤ ሄዌ ዮፐ ኔን ታና ጉደ ይሳና። ነ ሀንቁዋ ኔና ኤረና ካዉተቱዋ ቦላነ ነ ሱን ጼሰና አሳቱዋ ቦላ ትጋ። አያዉ ጎፐ፥ ኡንቱንቱ ያቆባ አሳ ሜድኖ፤ ኡንቱንቱ ኡንቱንታ አሸናን ም ድጌድኖነ ኡንቱንቱ አዉዋ ቢታ ይሴድኖ።
Source notes (1)
- Cross-reference ሳፃ 15:4
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.