Dawro Full Bible Ethiopic
ኤርማሳ 32
ኤርማስ ጋድያ ሻሜዳ
ይሁዳ ካቲ ሰደቅያስ ካተቴዳ ታማን ላይን፥ ባብሎነ ካቲ ናቡካዳናጾር ካተቴዳ ታማነ ሆስፑን ላይን መና ጎዳፐ ኤርማሳዉ ካላይ ዬዳ።1 ሄ ዎደ ባብሎነ ካትያ ኦላንቻቱ የሩሳላመ ዶዴድኖ፤ ትምቢትያ ኦድያ ኤርማስ ይሁዳ ካትያ ጎልያን ደእያ፥ ናግያዋንቱ ዳባባን ጎርደት ኡቴዳ።
ይሁዳ ካቲ ሰደቅያስ አ ሄዋን ቃቺደ፥ ሀዋዳን ያጌዳ፤ “ኔን አያዉ ሀዋዳን ያጋደ ትምቢትያ ኦዳይ? መና ጎዳይ ሀዋዳን ያጌ፤ ‘በአ፥ ታን ሀ ካታማ ባብሎነ ካትያ ኩሽያን አደ እማና ሀናይ፤ እምና እ ኦሞዳና። ይሁዳ ካቲ ሰደቅያሳዉ ባብሎናቱዋ ኩሽያፐ ከስ አከና፤ እ ቱሙዋፐ ባብሎነ ካትያ ኩሽያን ገላና። እ አ ስንን ኤቂደ፥ አናና ሃሳያና፤ እ አ ባረ አይፍያን በአና። ሄዋፐ ጉይያን፥ ናቡካዳናጾር ሰደቅያሳ ባብሎነ አፋና፤ ታን አባ በአና ጋካናዉ፥ እ ያን ደአና። ታን መና ጎዳይ ሀዋ ኦዳይ። ኔን ባብሎነቱዋና ኦለትያዋ ግዶፐ፥ ሄዌ ኔና ከሰና ያጌ’ ያጋዳ” ያጌዳ።
ኤርማስ፥ “መና ጎዳ ቃላይ ሄ ዎደ ታኮ ሀዋዳን ያጊደ ዬዳ፤ ‘ነ አዉዋ እሻ ሻሉማ ናአይ፥ ሀናምኤል ኔኮ ዪደ፥ “አናቶታ ካታማን ደእያ ታ ጋድያ ሻማ፤ አያዉ ጎፐ፥ ዎዛናዉ ዳቦታይ ጋያዌ ኔና” ያጋናዋ’ ያጌዳ።
“መና ጎዳይ ጌዳዋዳን፥ ታ አዉዋ እሻ ናአይ ሀናምኤል ታኮ ናግያዋንቱ ዳባባ ዪደ፥ ‘ቢንያማ ቢታን አናቶታን ደእያ ታ ጋድያ ሻማ፤ ጋድያ ዎዛናዉነ ቡዞታናዉ በስያዌ ኔና’ ያጌዳ። ታን ሄዋን መና ጎዳ ቃላ ግድያዋ ኤራድ። ያታደ አናቶታ ካታማን ደእያ ጋድያ ታ አዉዋ እሻ ናኣ ሀናምኤላፐ፤ ሻማደ እ አክያ ጋትያ አዉ ሚዛናን ልካድ፤ ታማነ ላፑን ጻጋራ ብራ ግዴዳ። ሻማ ፓራማ ማርካቱ ደእያ ሳን ፓራማደ፥ አሻጋደ ማታፋ አን ዎድ፤ ሚሻካ ሚዛናን ልካደ እማድ።
“ሄዋፐ ጉይያን፥ ታን አሻገቲደ አታመቴዳ ሻማ ሀኖታ ቆንጭስያ ፓራማነ አታመትቤና ሻማ ሀኖታ ቆንጭስያ ፓራማ አካድ። ታ አዉዋ እሻ ናአይ ሀናምኤል፥ ሻማ ፓራማ ፓራሜዳ ማርካቱነ ናግያዋንቱ ዳባባን ኡቴዳ አይሁዳቱ ኡባይ ጼልሽን፥ ሄ ሻማ ፓራማ ማህሴያ ናኣ ናኣ፥ ኔርያ ናኣ ባሮካዉ እማድ። ኡንቱንታ ስንን ታን ባሮካ ሀዋዳን ያጋደ አዛዛድ፤ ‘ኡባፐ ዎልቃማ መና ጎዳይ፥ እስራኤልያ ጾሳይ፥ ሀዋዳን ያጌ፤ “ዳሮ ዎድያ ጋምአና ማላ፥ ሀ ሻማ ሀኖታ ቆንጭስያ አሻገቲደ አታመቴዳ ፓራማነ ሻማ ሀኖታ ቆንጭስያ አታመትቤና ፓራማ አካ አፋደ፥ ኡርቃፐ መቴዳ ኦቱዋን ዎ” ያጌ። አያዉ ጎፐ፥ ኡባፐ ዎልቃማ መና ጎዳይ፥ እስራኤልያ ጾሳይ፥ ሀዋዳን ያጌ፤ “ሀ ቢታን አሳይ ዛሪደካ ጎልያ፥ ጋድያነ ዎይንያ ቱራ ቶክያ ሳኣ ሻማና” ያጌ’ ያጋድ” ያጌዳ።
ኤርማሳ ዎሳ
ታን ኔርያ ናኣ ባሮካዉ ሻማ ፓራማ ዋራቃታ እሜዳዋፐ ጉይያን፥ መና ጎዳ ሀዋዳን ያጋደ ዎሳድ፤ “አቤት ኡባ ሞድያ መና ጎዳዉ፥ ኔን ሳሎቱዋነ ሳኣ ነ ዎልቃማ ዎልቃንነ ነ ምጨቴዳ ኩሽያን መዳ! ነዉ ዳንዳየተናዌ ኡባካ ባዋ። ኔን ሻአቶ አገና ሲቁዋ በሳሳ፤ ሽን አዎቱዋ ባይዙዋ ኡንቱንቱ ናናቱዋ ቦላ ዛራሳ። አቤት ቃነ ዎልቃማ ጾሳዉ፥ ነ ሱንይ ኡባፐ ዎልቃማ መና ጎዳ ጌተቴ። ነ ዞሪ ዎልቃማ፤ ነ ኦያ ኦሱካ ዎልቃማ። አሳ ኦግያ ኡባ ኔን በኣሳ፤ አሳዉ ኡባዉካ አ ኦግያዳንነ አ ኦሱዋዳን ዛራሳ።
“ኔን ግብጼን ማላታነ ኦራባ ኦዳ፤ ሀች ጋካናዉካ ሀ ኦራ ኦሶቱዋ እስራኤልያ አሳ ግዶንነ ሀራ ካዉተቱዋ ኡባ ግዶን ኦያዋ አጋ በይካ። ሄዋፐ ደንዴዳዋን ነ ሱንይ ኡባ ሳን ኤረቴዳ። ኔን ነ አሳ እስራኤልያ ግብጼፐ ማላታንነ ኦራባን፥ ነ ምኖ ቀስያንነ ነ የዴዳ ኩሽያን፥ ቃይ ዎልቃማ ዳጋማን ከሳዳ። ኡንቱንቱ ማይዛ አዋቶ ኔን እማናዉ ጫቄዳ ቢታ፥ ማይነ ኤሳይ ጎግያ ሀ ቢታ ኡንቱንቶ እማዳ፤ ኡንቱንቱ ሀ ቢታ ገሊደ ላቴድኖ። ሽን ኡንቱንቱ ነዉ አዛዘትበይክኖ፤ ነ ህግያካ ካልበይክኖ፤ ኡንቱንቱ ኦናዳን ኔን አዛዜዳዋ ኡባካ ኦበይክኖ። ሄዋ ድራዉ፥ ኔን ኡንቱንቱ ቦላ ሀ ባሻ ኡባ አሃዳ።
“በአ፥ ባብሎነቱ ካታማ ኦይቃናዉ ግምቢያ ዩሹዋን ቢታ ዶሪደ ዶድ ደኢኖ፤ ኦላፐ፥ ኮሻፐነ ኢታ ሀርግያፐ ደንዴዳዋን፥ ካታማይ ኡንቱንቱና ኦለትያ ባብሎናቱዋ ኩሽያን አደ እመት ደኤ። ኔን ሀእ በእያዋዳን፥ ነ ጌዳዌ ኡባይ ፖለቴዳ። አቤት ኡባ ሞድያ መና ጎዳዉ፥ ካታማይ ባብሎነቶ እመታናዉ ሀኖደካ፥ ኔን ታና፥ ‘ማርካቱዋ ጼሳደ፥ ሻሉዋን ሀ ጋድያ ሻማ’ ያጋዳ” ያጋደ ዎሳድ።
ሄዋፐ ጉይያን፥ መና ጎዳ ቃላይ ኤርማሳዉ ሀዋዳን ያጊደ ዬዳ፤ “ታን መና ጎዳ፥ አሳ ኡባ ጾሳ። ታዉ ዳንዳየተናዌ ደኢ?” ያጌዳ። ሄዋ ድራዉ፥ መና ጎዳይ ሀዋዳን ያጌ፤ “ታን ሀ ካታማ ባብሎነቶነ ባብሎነ ካትያ ናቡካዳናጾራዉ አደ እማና፤ ኡንቱንቱ አ ኦይቃና።2 ሀ ካታማ ቦላ ኦላዉ ከሴዳ ባብሎነቱ ዪደ፥ ካታማ ታማን ጹጋና፤ ጎልያ ቦላን ደምባዪደ ኦድኖ ባኣላዉ እጻና ጩዋይሲድነ ሀራ ጾሳቶ ኡሻ ያርሹዋ ጉሲደ፥ ታና ሀንቀዳ አሳቱ ደኤዳ ጎለቱዋካ ጹጋና።
“እስራኤልያ አሳይነ ይሁዳ አሳይ ባረንቱ ያላጋተፐ ዶሚደ፥ ታ ስንን ኢታባ ኦድኖፐ አትና፥ ሀራባ ኦበይክኖ፤ ኡንቱንቱ ባረንቱ ኩሽያን ኦዳ ኦሱዋን ታና ሀንቀድኖ ያጌ መና ጎዳይ። ኬጸቴዳ ዎድያፐ ሀች ጋካናዉ፥ ሀ ካታማ አሳቱ ታና ሀንቀድኖነ ይሎዬድኖ፤ ሄዋ ድራዉ፥ ታን ሀ ካታማ ታ ስንፐ ይሳና። እስራኤልያ አሳይነ ይሁዳ አሳይ፥ ኡንቱንቱ ካተቱነ ካፓቱ፥ ኡንቱንቱ ቄሳቱ ነ ትምቢትያ ኦድያዋንቱ ኦዳ ኢታ ኦሱዋ ኡባን ታና ሀንቀድኖ። ኡንቱንቱ ባረንቱ ሶምኡዋ አጊደ፥ ባረንቱ ዞክያ ታዉ ዛሬድኖ። ታን ኡንቱንታ ዛራ ዛራደ ታማርስንቶካ፥ ኡንቱንቱ ስስበይክኖነ ሴራካ አክበይክኖ። ኡንቱንቱ ሸነይያ ባረንቱ ኤቃቱዋ ታ ሱንን ጼሰቴዳ ጌሻ ጎልያ ግዶን ኤሲደ ቱንሴድኖ።3 ኡንቱንቱ ባረንቱ አቱማ ናናቱዋነ ማጫ ናናቱዋ ሞሎካ ኤቃዉ ያርሻናዉ ህኖማ ዛንጋራን ባኣላዉ ያርሽያ ቃ ሳአቱዋ ጊግሴድኖ። ኡንቱንቱ ሄዋ ኦና ማላ፥ ታን ኡንቱንታ አዛዛበይከ፤ ይሁዳ አሳ ኡንቱንቱ ናጋራ ኦስሳናዉ ሄዋ ማላ ሸነይያዋ ኦናዌ ታ ዎዛናን ኡባካ አቤና” ያጌዳ።4
ጾሳይ እስራኤልያ አሳ ዛራደ እሻልሳና ያጌዳ
ህንተ የሩሳላመ አሳይ፥ “ሀ ካታማይ ኦላን፥ ኮሻንነ ኢታ ሀርግያን ባብሎነ ካትያ ኩሽያን አደ እመታና” ያጌዳ ሀ ካታማባ መና ጎዳይ እስራኤልያ ጾሳይ ሀዋዳን ያጌ፤ “በእተ፥ ታን ታ ሱሎ ሀንቁዋንነ ታ ዎልቃማ ይሉዋን ኡንቱንታ ላሌዳ ቢታ ኡባፐ ሺሻና፤ ሀ ሳኣ ዛራደ አሃደ፥ ኡንቱንቱ ሳሮተን ደአናዳን ኦና። ኡንቱንቱ ታ አሳ ግዳና፤ ታንካ ኡንቱንቱ ጾሳ ግዳና። ኡንቱንቱ ታዉ መናዉ ያያና ማላ፥ ታን ኡንቱንቶ እት ዎዛናነ እት ኦግያ እማና፤ ሄዌ ኡንቱንቶነ ኡንቱንቱፐ ጉይያን፥ ኡንቱንቱ ናናቶ ሎአ ግዳናዋ። ታን ኡንቱንቱና መናዉ ቃላ ጫቁዋ ጫቀታና። ሄ ጫቁዋን ታን ኡንቱንቶ ሎኦባ ኦያዋ አግከ፤ ኡንቱንቱ ታፐ ዎራ ስመና ማላ፥ ታን ኡንቱንቱ ታዉ ያያናዳን ኦና። ታን ኡንቱንቶ ሎኦባ ኦያዋዳን ናሸታና፤ ቃይ ታን ታ ኩመን ዎዛናፐነ ታ ኩመን ሸምፑዋፐ ሀ ቢታን ኡንቱንታ ቱሙዋፐ ቶካና” ያጌ።
ቃይካ መና ጎዳይ ሀዋዳን ያጌ፤ “ታን ሀ አሳ ቦላ ሀ ኢታ ባየ ኡባ አሄዳዋዳን፥ ሄዋዳንካ ታን ኡንቱንቶ እማና ጌዳ ሎኦባ ኡባ እማና። ህንተ፥ ‘ሀ ቢታይ አሳይካ መሂካ ደኤና፥ አይነ ባይና ቢታ ግዳናዋ፤ እ ባብሎነቶ እመት ክቼዳ’ ያጌዳ ቢታን አሳይ ዛረደ፥ ጋድያ ሻማና። አሳይ ጋድያ ሻሉዋን ሻማና፤ ማርካ ስንን ፓራማ ፓራሚደ፥ ማታፋ ዎና። ሀዌ ኡባይ ቢንያማ ቢታን፥ የሩሳላመ ዩሹዋን ደእያ ሄራቱዋን፥ ይሁዳ ካታማቱዋን፥ ገዝያን ደእያ ካታማቱዋን፥ ዞዝያፐ ጋርሳና ደእያ ካታማቱዋንነ ኔጌባ መላ ቢታ ካታማቱዋ ኡባን ሀናና። አያዉ ጎፐ፥ ታን ኡንቱንቱ ዛራደ እሻልሳና። መና ጎዳይ ሀዋ ኦዳይ” ያጌ።
Source notes (4)
- Cross-reference 2 ካታ. 25:1-7
- Cross-reference 2 ካታ. 25:1-11፤ 2 ኦዱዋ 36:17-21
- Cross-reference 2 ካታ. 23:10፤ ኤር. 7:30-31፤ 19:1-6
- Cross-reference ዎጋ 18:21፤ 2 ካታ. 23:10፤ ኤር. 7:31
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.