Dawro Full Bible Ethiopic
ኤርማሳ 15
ይሁዳ አሳ ቦላ ጋክያ ፕርዳ
ሄዋፐ ጉይያን፥ መና ጎዳይ ታዉ ሀዋዳን ያጌዳ፤ “ሀራይ አቶ ሙሴነ ሳሜል ታ ስንን ኤቂንቶነ፥ ታ ዎዛናይ ሀ አሳቱዋኮ ስመና። ኡንቱንታ ታ ስንፐ ድጋ፤ ኡንቱንቱ ቢኖ።1 ቃይ ኡንቱንቱ ኔና፥ ‘ኑን ሀቃ ባኔ?’ ጊደ ኦቾፐ፥ መና ጎዳይ ሀዋዳን ያጌ ጋደ ኡንቱንቶ ኦዳ፤2 ‘ሀይቆ ፕርደቴዳዋንቱ፥ ሀይቆ ቢኖ። ማሻዉ ፕርደቴዳዋንቱ፥ ማሻዉ ቢኖ። ኮሻዉ ፕርደቴዳዋንቱ፥ ኮሻዉ ቢኖ። ኦሞደታናዉ ፕርደቴዳዋንቱ፥ ኦሞዶ ቢኖ’ ያጌ” ያጌዳ።
መና ጎዳይ ሀዋዳን ያጌ፤ “ታን ኦይዱ ቆሞ ባየ ኡንቱንቱ ቦላ አሀና፤ ሄዋንቱነ፥ ኡንቱንታ ዎናዉ ማሻ፥ ኡንቱንቱ አሃ ጎቻናዉ ካናቱዋ፥ ኡንቱንቱ አሹዋ ሚደ ይሳናዉ ሳሉዋ ካፎቱዋነ ሳኣ ዶአቱዋ። ህዝቂያሳ ናአይ፥ ይሁዳ ካቲ ምናሰ የሩሳላመን ኦዳ ፓላ ድራዉ፥ ታን ኡንቱንታ ሳኣ ካዉተ ኡባዉ ዳጋማ ኦና።3
“የሩሳላመ አሳቶ፥ ህንተዉ ኦኔ ቃረታናዌ? ህንተዉ ካዮታናዌ ኦኔ? ‘ህንተ አይ ማሌ?’ ጊደ ህንተና ኦቻናዉ ኤቃናዌ ኦኔ?” ያጌ።
መና ጎዳይ ሀዋዳን ያጌ፤ “ህንተ ታና አጌድታ፤ ሀእ ሀእካ ህንተ ጉየ ስሜድታ። ሄዋ ድራዉ፥ ታን ህንተ ቦላ ታ ኩሽያ የዳደ ህንተና ይሳድ፤ ታን ህንተዉ ቃረታደ ዳቡራድ። ታን ኡንቱንታ ሄ ቢታ ካታማቱዋ ፐንግያን ላይዳ አካደ ሰጻድ። ኡንቱንቱ ናናቱዋካ ዎ ዉርሳድ፤ ታን ታ አሳ ይሳድ። አያዉ ጎፐ፥ ኡንቱንቱ ባረንቱ ኢታ ኦግያፐ ስመናን እጼድኖ። ታን ኡንቱንቱ አምኤቱዋ ፓይዱዋ አባ ሻፍያፐካ ዳርሳድ። ታን ጋላሳ ሴታን ኡንቱንቱ ዎዳላቱዋ ዎ ይስያዋንታ ኡንቱንቱ አየቱዋ ቦላ አሃድ። ቆፐናን ደእሺና፥ ምሹዋነ ዳጋማ ታን ኡንቱንቱ ቦላ ዱገ የዳድ። ላፑን ናናቱ ሀይቄዳ አታ ሸምፑዋ ላባናዱ። እዝዉ ጋላሳይ ቃሜዳ፤ አ ካዉሻዱነ ዬላታዱ። ብሮ ፓጻ ደእያዋንታካ ታን ኡንቱንቱ ሞርከቱዋ ስንን ማሻን ሲፍሳድ። ታን መና ጎዳይ ሀዋ ኦዳድ” ያጌ።
ኤርማስ ባረ መቱዋ ጾሳዉ ማጋኔዳ
ታዉ አየ ታ አቴ! ታና የለናን አጋርኪሻ! ታን ቢታ ኡባን ደእያ አሳና ዋላቀትያነ ባጸትያ አሳ ግዳድ። ታን ኦስነ ታልአበይከ፥ ዎይ ኦፐነ ታልኣደ አካበይከ፤ ግዶፐነ፥ አሳይ ኡባይ ታና ሸቄ።
መና ጎዳይ ሀዋዳን ያጌዳ፤ “ቱሙፐ ታን ኔና ሎኦባዉ አሻ አካና። ቱሙፐ ነ ሞርከቱ መቱዋ ዎደነ ዋይያ ዎደ ነዉ ዋትዋታናዳን፥ ታን ኦና።
“ዎን አሳይ ብራታ፥ ሁጲሳ ባጋና ይያ ብራታ ዎይ ናስያ መንናዉ ዳንዳዪ? ቢታ ኡባን ህንተ ኦዳ ናጋራ ድራዉ፥ ታን ህንተ አቁዋ ፔሻ፥ ጮ ቦንቂያዋንቶ እማና። ታን ህንተና ህንተ ኤረና ቢታን ህንተ ሞርከቶ አይለያና፤ አያዉ ጎፐ፥ ታ ሀንቁ ምያ ታማ ግዲደ፥ መናዉ ኤጻና” ያጌዳ።
አቤት መና ጎዳዉ፥ ኔን ኤራሳ። ታና ሀሳያደ ማዳ፤ ታና የደርስያዋንቱ ቦላ ታ ሀሉዋ ከሳ። ኔን ኡንቱንቶ ዳንዳያደ፥ ታና ዎራ የጎፓ። ታን ነ ድራዉ ሸቀትያዋ ቆፓ። አቤት መና ጎዳዉ፥ ኡባ ዳንዳይያ ጾሳዉ፥ ታን ነ ሱንን ጼሰቴዳ ድራዉ፥ ነ ቃላይ ታኮ ዪና ማድ። ታና ፓሽክሴዳነ ታ ዎዛና ናሸቼዳ። ጮ ፖጩምያዋንቱ ጩጉዋን ኡታበይከ፤ ኡንቱንቱና ናሸታበይከ። ኔን ነ ኩሽያ ታ ቦላ ዎዳ ድራዉነ ታዉ ይሎቲደ ድራዉ፥ ታን ታረካ ዱማ ኡታድ። ሳኩ ታፐ ዱጸናን እጽያዌነ ታ ማዱይ ፓጸናን እጽያዌ አያሴ? ኔን ታዉ መልያ ሻፋዳን፥ ቶእያ ፑልቱዋዳን፥ ሀናና ሀናይዬ?
ሄዋ ድራዉ፥ መና ጎዳይ ሀዋዳን ያጌ፤ “ኔን ታኮ ስሞፐ፥ ታን ዛራደ ኔና አካና፤ ኔን ታዉ ኦና። ሀዳ የዉዋ አጋደ፥ ቦንቾ ቃላ ጻላላ ኦዶፐ፥ ኔን ታ ዶና ግዳናሳ። ሀዋንቱ አሳቱ ኔኮ ስማና፤ ሽን ኔን ኡንቱንቱኮ ስማካ። ታን ኔና ሀ አሳዉ ናስያ ግያ ብራታና ግምበቴዳ ግምቢያ ኦና። ኡንቱንቱ ኔናና ኦለታና፤ ሽን ኔና ጾንክኖ። አያዉ ጎፐ፥ ታን መና ጎዳይ ኔና አሻናዉነ ዎ አካናዉ ኔናና ደአይ። ኢታቱዋ ኩሽያፐ ታን ኔና አሻና፤ ቃረት ባይናዋንቱፐካ ታን ኔና ዎዛና” ያጌ።
Source notes (3)
- Cross-reference ህዝ. 32:11-14፤ ፓይ. 14:13-19፤ 1 ሳሜላ 7:5-9
- Cross-reference ሳፃ 13:10
- Cross-reference 2 ካታ. 21:1-16፤ 2 ኦዱዋ 33:1-9
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.