Dawro Full Bible Ethiopic
ኤርማሳ 34
ኤርማሳ ዱማ ዱማ ኦሶቱዋ
ካትያ ሰደቅያሳዉ ኦደቴዳ ትምቢትያ
ባብሎነ ካቲ ናቡካዳናጾር፥ አ ኦላንቻቱ ኡባይነ እ ሞድያ ካዉተቱዋን አሳይ ኡባይ፥ የሩሳላመነ የሩሳላመ ዩሹዋን ደእያ ካታማቱዋ ኡባ ኦልያ ዎደ፥ ሀ ቃላይ መና ጎዳፐ ኤርማሳዉ ዬዳ፤1 መና ጎዳይ እስራኤልያ ጾሳይ ሀዋዳን ያጌዳ፤ “ባ፤ ባደ ይሁዳ ካትያ ሰደቅያሳ ሀዋዳን ያጋ፤ መና ጎዳይ ሀዋዳን ያጌ፤ ‘በአ፥ ታን ሀ ካታማ ባብሎነ ካትያ ኩሽያን አደ እማና፤ እ ሀ ካታማ ታማን ጹጋና። ኔን አ ኩሽያፐ ከሳ አካካ፤ ኔን ኦሞደታናነ አዉ አ እመታና። ኔን ነ አይፍያን ባብሎነ ካትያ በአና፤ እካ ኔናና ሃሳያና። ሄዋፐ ጉይያን፥ ኔን ባብሎነ ቢታ ባና ያጌ።
“ ‘ግዶፐነ፥ ይሁዳ ካትያዉ ሰደቅያሳ፥ መና ጎዳይ ግያዋ ስሳ! ነዋ መና ጎዳይ ሀዋዳን ያጌ፤ “ኔን ኦላን ሀይቃካ፤ ኔን ሳሮ ሀይቁዋ ሀይቃና። ኔፐ ካሰ ደኤዳ ካተቱዋ ቦንቾ፥ ነ ማይዛ አዋቶ እጻና ጩዋዬዳዋዳን፥ አሳይ ነ ቦንቾካ እጻና ጩውሳና። ያቲደ፥ አዬ ኑ ካትያዉ ያጊደ ነዉ ዬካና። ታን መና ጎዳይ ሀዋ ኦዳይ” ያጌ’ ያጋደ ኦዳ” ያጌዳ።
ሄዋፐ ጉይያን፥ ትምቢትያ ኦድያ ኤርማስ ሀ ትምቢትያ ኡባ ይሁዳ ካትያ ሰደቅያሳዉ የሩሳላመን ኦዴዳ። ሄ ዎደ ባብሎነ ካትያ ኦላንቻቱ የሩሳላመ ካታማነ ይሁዳን አቴዳ ካታማቱዋ ኦሌድኖ። ላክሻነ አዜቃ ጌተትያ ካታማቱዋ ጻላላይ ይሁዳን አቴዳ ግምበቴዳ ካታማቱዋ።
አይለቱዋ አይለተፐ ከስያ አዋዩዋ
ካቲ ሰደቅያስ አይለቱዋ አይለተፐ ከስያ አዋዩዋ አዋያናዉ የሩሳላመን አሳ ኡባና ቃላ ጫቁዋ ጫቀቴዳዋፐ ጉይያን፥ ኤርማሳዉ መና ጎዳፐ ቃላይ ዬዳ። ሄ አዋዩ፥ “አሳይ ኡባይ ባረ እብራዌ አቱማ አሳቱዋነ ማጫ አሳቱዋ አይለተፐ ከሶ፤ ኦንነ አይሁዳ አሳ ግዴዳ ባረ እሻ አይለ ኦፖ” ያጌ። ሄዋ ድራዉ፥ አሳይ ኡባይነ ካፓቱ ኡባይ ጫቀቴዳ ጫቁዋዳን፥ ባረንቱ አቱማነ ማጫ አይለቱዋ አይለተፐ ከሳናዉነ ላኤን ዛሪደ አይለየናን አጋናዉ ማዬድኖ፤ ኡንቱንታ አይለተፐ ከሴድኖ። ሽን ባረንቱ ቆፋ ላሚደ፥ አይለተፐ ከሴዳ ባረንቱ አቱማነ ማጫ አይለቱዋ ዛሪደ አይለዬድኖ።
ሄዋፐ ጉይያን፥ መና ጎዳ ቃላይ ኤርማሳኮ ዬዳ። መና ጎዳይ እስራኤልያ ጾሳይ ሀዋዳን ያጌ፤ “ታን ህንተ ማይዛ አዎቱዋ ግብጼፐ፥ አይለተ ቢታፐ ከሴዳ ዎደ፥ ኡንቱንቱና ቃላ ጫቁዋ ጫቃ ኡታድ። ሄ ቃላ ጫቁዋ ማራን፥ ‘እብራዌ አይሊ ደእያ አሳይ ኡባይ፥ አይለቱዋ ኡሱፑን ላይ ኦስስ ስሚደ፥ ላፑን ላይ አይለተፐ ከስ የድተ’ ያጋደ አዛዛድ። ሽን ህንተ ማይዛ አዎቱ ታን ኦድያዋ ስሰናን እጼድኖ ታዉ አዛዘትበይክኖ።2 ህንተካ ማታ ዎድያፐ ካሰ ህንተ ናጋራ አጊደ፥ አይለቱዋ አይለተፐ ከሳናዉ አዋዬድታ፤ ታ ስንን ልከባ ኦድታ። ቃይ ሄዋ ኦናዉ ታ ስንን፥ ታ ሱንይ ጼሰትያ ታ ጌሻ ጎልያን ጫቁዋ ጫቀቴድታ። ሽን ሀእካ ህንተ ህንተ ቆፋ ላሚደ፥ ታ ሱን ቱንሴድታ። ዎቲደ ጎፐ፥ ኡንቱንቱ ኮዬዳዋዳን፥ አይለተፐ ከሴዳ ህንተ አቱማነ ማጫ አይለቱዋ ዛሪደ አይለዬድታ።
“ሄዋ ድራዉ፥ ታን መና ጎዳይ ኦድያዌ ሀዋ: ህንተ ታዉ አዛዘተናን እጺደ፥ ህንተ እሻ ዎይ ህንተ ሾሩዋ አይለተፐ ከስያ አዋዩዋ አዋይበይክታ። በእተ፥ ህንተ ቦላ ኦላይ ኢታ ሀርጊነ ኮሻይ ከሳና ማላ፥ ታን አዋያይ። ታን ህንተና ሳኣ ቦላ ደእያ ካዉተቶ ዳጋማ ኦና። ታ ቃላ ጫቁዋ መንዳ አሳ፥ ታ ስንን ቃላ ጫቀቴዳ ጫቁዋ ቃላቱዋ ናገናን እጼዳ አሳ፥ ኡንቱንቱ ጫቆ ሹኪደ፥ ባጋ ባጋ ከስ ማራን ዎደ፥ ላኡ ባጋፐ ግዱዋና አደ፥ ሄ ማራዳን ታን ኡንቱንታ ኦና። ሄ አሳቱካ ይሁዳ ካፓቱዋ፥ የሩሳላመ ካፓቱዋ፥ ቢታ ሞድያዋንታ፥ ቄሳቱ ዋነ ማራን ዎዳ ማራ አሹዋ ግዱዋና መንዳ አሳ ኡባ። ታን ኡንቱንታ ኡንቱንቱ ሞርከቱዋ ኩሽያንነ ኡንቱንታ ዎናዉ ኮይያ አሳቱዋ ኩሽያን አደ እማና፤ ኡንቱንቱ አሃይ ሳሉዋ ካፎቶነ ሳኣ ዶአቶ ቁማ ግዳናዋ።
“ታን ይሁዳ ካትያ ሰደቅያሳነ አ ካፓቱዋካ ኡንቱንቱ ሞርከቱዋ ኩሽያን፥ ኡንቱንታ ዎናዉ ኮይያዋንቱ ኩሽያንነ ህንተና ኦልያዋ አጌዳ ባብሎነ ካትያ ኦላንቻቱዋ ኩሽያን አደ እማና። ታን መና ጎዳይ ባብሎነ ኦላንቻቱዋ አዛዛና፤ ኡንቱንቱ ሀ ካታማ ስማና። ኡንቱንቱ ሀ ካታማ ኦላና፥ ኦሞዳናነ ታማን ጹጋና። ይሁዳን ደእያ ካታማቱዋካ አሳይ ደኤና አይነ ባይና ሳኣ ኦና” ያጌ።
Source notes (2)
- Cross-reference 2 ካታ. 25:1-11፤ 2 ኦዱዋ 36:17-21
- Cross-reference ዶመ 21:2፤ ዛረ. 15:12
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.