उत्पत्ति

उत्पत्ति के किताब

उत्पत्ति कर किताब

परचा

उत्पत्ति सब्द कर मतलब हबै “सुरुआत” अउ हइ बाइबल के पुरान नियम के पहली किताब हबै। मूल हिब्रू हइ सब्दन लग सुरू होथै “सुरुआत हे।” हइ दरसाथै कि सगलू कुछ कछो लग आइस, अउ बिसेस रूप लग मनसेन के संग भगवान कर बेउहार कसना सुरू हुइस। आज बिद्वमान के लिघ्घो ऊ मनसे या मनसेन के बारे हे कइठे सिद्धांत हबै, जउन उत्पत्ति लिखिस अउ हइ कि हइ कब लिखे गय रथै। कुछ मनसेन के माने के हबै, कि इके 5-6 वीं सताब्दी ईसा पूरव हे पुरान दस्ताबेजन लग संकलित करे गय होही। बेबीलोन हे, दूसर मनसे हइ पारंपरिक मानता के स्बीकार करथै, कि मूसा उत्पत्ति, संग ही निरगमन, लैव्यबेवस्था, गिनती अउ बेवस्थाविवरन लगभग 1300 या 1400 साल ईसा पूरव लिखे रथै। उत्पत्ति हे बोहत खास जानकारी हबै, जउन मसीहन के बाइबल के बाकी हिस्सन, पुरान अउ नबा नियम दोंनो के समझै हे मदत करथै। हइ हमके दिखाथै, कि पाप दुनिया हे कसना परबेस करिस, अउ मनसेन के अक्ठी मुकति करै बाले कर जरूरत हबै। हइ मनसेन के बचामै के निता भगवान कर योजना के परगट करथै। इके यीसु के बारे हे पहली आगू कर बात (उत्पत्ति 3:15) अउ इब्राहीम लग भुंइ हे सगलू देसन के आसीरवाद देय के भगवान कर टीमा (उत्पत्ति 12:3) लग देखे जाय सकथै।

रूप रेखा

1. जसना कि अध्याय 1 अउ 2 हे गुठे गय हबै, भगवान दुनिया अउ आदम अउ हब्बा कर रचना करिस।

2. अध्याय 3 - 5 हे आदम अउ हब्बा, उनखर पाप अउ उनखर बिरादरी कर बिस्तार हबै।

3. अध्याय 6 - 9 तक नूह अउ बडा बाढ के बारे हे गुठेबै।

4. फेरै उत्पत्ति कर किताब अध्याय 10 अउ 11 हे बिस्तार करथै, कि नूह के टेम अउ अब्राहम के टेम के बीच काहिन हबै, जेहमा बाबेल कर मीनार सामिल हबै।

5. अध्याय 12 - 50 अब्राहम, ओखर परवार अउ इस्राएल देस के सुरुआत के बारे हे हबै।

ए. इब्राहीम अउ ओखर डउकी सारा कर जीवन अध्याय 12 लग 25 हे सामिल हबै।

बी. इसहाक अउ ओखर डउकी रिबका कर जीवन अध्याय 21 - 28 हे बिस्तार हबै, अउ ओखर मिरतू कर बिस्तार अध्याय 35 हे करे गय हबै।

सी. याकूब, ओखर टोरवन कर जीवन अउ कनान लग मिस्र तक उनखर स्थान्तरन अध्याय 25 - 50 हे सामिल हबै।

डी. अध्याय 37 - 50 याकूब कर परसंद टोरवा यहोसू कर जीवन हे केंद्रित हबै अउ ऊ मिस्र हे कसना राजा बनिस।